ازيا قۇراماسى ساپىندا قازاقستاننىڭ قوس جەڭىل اتلەتى ونەر كورسەتەدى. ولار – 33 جاستاعى ولگا رىپاكوۆا مەن 25 جاستاعى ۆيكتوريا زيابكينا. ەكەۋىنىڭ دە ەسىمى جانكۇيەرلەرگە جاقسى تانىس. ءۇش قارعىپ سەكىرۋدىڭ حاس شەبەرى ولگا رىپاكوۆا – لوندون وليمپياداسىنىڭ جەڭىمپازى, بەيجىڭ مەن ريو وليمپيادسىنىڭ قولا جۇلدەگەرى, الەم چەمپيوناتىندا ءۇش رەت جەڭىس تۇعىرىنا كوتەرىلىپ, ازيا ويىندارىنىڭ ءۇش مارتە التىننان القا تاعىنعان ساقا سپورتشى. قىسقا قاشىقتىققا جۇگىرۋدە سايىسقا تۇسەتىن ۆيكتوريا زيابكينا ازيانىڭ بەس دۇركىن جانە دۇنيەجۇزىلىك ۋنيۆەرسيادانىڭ ءۇش دۇركىن چەمپيونى, ازيا ويىندارىنىڭ كۇمىس جۇلدەگەرى.
قۇرلىقتىڭ كۋبوك – ءتورت جىلدا ءبىر رەت وتەتىن حالىقارالىق جەڭىل اتلەتيكا فەدەراتسياسىنىڭ باعدارلاماسىنا ەنگەن ءدۇبىرلى دودا. بۇل جارىستا ەۋروپا, امەريكا, افريكا جانە ازيا مەن مۇحيت جاعالاۋىنىڭ بىرىككەن قومانداسى كۇش سىناسادى. ايتۋلى باسەكەگە ۆيكتوريا زيابكينا العاش رەت قاتىسىپ وتىرسا, ولگا رىپاكوۆا وسىدان سەگىز جىل بۇرىن حورۆاتياينىڭ سپليت قالاسىندا جالاۋى جەلبىرەگەن جارىستا باس جۇلدەنى ولجالاعان بولاتىن.
عالىم سۇلەيمەن,
«ەگەمەن قازاقستان»
الماتى
