ءباسپاسوز جيىنىندا «سامۇرىق-قازىنا» ۇاق» اق-نىڭ 2018 جىلدىڭ ءبىرىنشى جارتىجىلدىعىنداعى قورىتىندى ناتيجەلەرى جاريالاندى. ءمالىم بولعانداي «سامۇرىق-قازىنا» قورىندا بارلىق نەگىزگى قارجىلىق كورسەتكىشتەر بويىنشا ءوسىم تىركەلگەن. «سامۇرىق-قازىنا» اق ەكونوميكا جانە قارجى جونىندەگى تەڭ باسقارۋشى ديرەكتورى ە.ءجانادىلدىڭ مالىمدەۋىنشە, وعان بىرنەشە فاكتور ارقاسىندا قول جەتكىزىلگەن. مىسالى, اتالعان كەزەڭدە مۇناي وڭدەۋ كولەمى 13 پروتسەنتكە, ەلەكتر ەنەرگياسىنىڭ ءوندىرىسى 28 پروتسەنتكە, تەمىرجول جۇك تاسىمالىنىڭ كولەمى 9 پروتسەنتكە ارتتى, سونىمەن قاتار, كومىرسۋتەكتەر باعاسى كوتەرىلدى.
قور مەن ونىڭ جەتەكشى پورتفەلدىك كومپانيالارىنىڭ قارجىلىق تۇراقتىلىعىن نىعايتۋ باعىتىنداعى جۇمىس ناتيجەلەرى دە ءسوز بولدى. ايتالىق, 2018 جىلدىڭ ءى جارتى جىلدىعىندا قور سىرتقى قارىز كولەمىن $900 ميلليونعا ازايتتى, «قازمۇنايگاز» ۇك» اق-نىڭ $1,6 ملرد حالىقارالىق وبليگاتسيالارى وتەلگەن, «سامۇرىق-ەنەرگو» اق 39 ملرد تەڭگەگە جۋىق قارىزىن مەرزىمىنەن بۇرىن تولەنگەن. ە.ءجانادىل سونىمەن قاتار قور بۇعان دەيىن قازكوممەرتسبانكىندە جاتقان كولەمى 117 ملرد تەڭگەنى قۇرايتىن بۇعاتتالعان دەپوزيتتەگى قارجىسىن مەرزىمىنەن بۇرىن العانىن, سونداي-اق كەزەكتى ەكىنشى دەڭگەيلى بانكپەن 220 ملرد تەڭگە كولەمىندەگى دەپوزيتتى قايتارۋ تۋرالى كەلىسىمگە قول قويىلعانىن اتاپ ءوتتى.
«بوساتىلعان قاراجات نارىقتاعى كورسەتكىشتەردەن تومەن مولشەرمەن «سامۇرىق-قازىنا» قورىنىڭ پورتفەلدىك كومپانيالارىنا قارىزعا بەرىلەدى. اتاپ ايتقاندا, «قازاقستان تەمىر جولى» ۇك» اق – 75 ملرد تەڭگە, «قازاقتەلەكوم» اق – 75 ملرد تەڭگە جانە «قازاتومونەركاسىپ» ۇاك» اق – $200 ملن الادى. ورتاشا مەرزىمدە بۇل شارا 50 ملرد تەڭگە كولەمىندە قورعا وڭ ناتيجەسىن بەرەدى», دەدى ە. ءجانادىل.
سونىمەن قاتار, ءباسپاسوز ءماسليحاتىندا «سامۇرىق-قازىنا» اق ستراتەگيالىق دامۋ جونىندەگى باسقارۋشى ديرەكتورى بالجيت گرەۆال ءبىرىنشى جارتىجىلدىقتا اتالعان ناتيجەلەرگە جاڭا دامۋ ستراتەگياسىنىڭ اياسىندا قوردا جۇزەگە اسىرىلعان قۇرىلىمدىق وزگەرىستەردىڭ ارقاسىندا قول جەتكىزىلگەنىن اتاپ ءوتتى. ناقتىراق ايتقاندا, حولدينگتىڭ ەنشىلەس كومپانيالارىنىڭ سانى 359-دان 312-گە دەيىن قىسقارتىلعان. قۇنى 28,5 ملرد تەڭگە بولاتىن 15 اكتيۆ ساتىلعان. بۇل باعىتتا «سامۇرىق-قازىنا» قورى تاعى 51 اكتيۆتى ساتىپ, 102 ستراتەگيالىق ماڭىزى جوق اكتيۆتەن شىعۋدى جوسپارلاۋدا. اتالعان جۇمىس جەكەشەلەندىرۋ باعدارلاماسى اياسىندا جۇزەگە اسىرىلماق.
«ستراتەگيامىزدىڭ 2018 جىلدىڭ ءى جارتىسىندا ىسكە اسىرىلۋى وڭ قارجىلىق ناتيجەلەرگە اكەلدى. وسى جىلدىڭ ءىى جارتىسىندا ءبىز ءۇش ۇلتتىق كومپانيانىڭ IPO-سىن, ءبىزدىڭ نەگىزگى ەمەس اكتيۆتەرىمىزدىڭ ساتىلىمىن, باسقارۋ دەڭگەيلەرىن تومەندەتۋدى, سونداي-اق ءبىزدىڭ پورتفەلدىك كومپانيالارعا ستراتەگيالىق ينۆەستورلاردى تارتۋدى قامتيتىن ستراتەگيالىق باستامالارعا باسا نازار اۋداراتىن بولامىز», دەپ ناقتىلادى قوردىڭ باسقارۋشى ديرەكتورى.سونىمەن قاتار, ب. گرەۆال جاڭا ستراتەگيا اياسىندا قۇرۋ جوسپارلانعان كەلەشەك بۋىن قورىنىڭ تۇجىرىمداماسىن ءتۇسىندىرىپ ءوتتى. ونىڭ ايتۋىنشا, ەگەر بۇعان دەيىن قوردىڭ مانداتى تەك ءال-اۋقاتتى جاساۋ بولسا, جاڭا ستراتەگيا اياسىندا ول قوس ءرول اتقارادى. «بۇل – كەلەر ۇرپاق ءۇشىن قازاقستاننىڭ ءال-اۋقاتىن نىعايتۋ جانە ساقتاۋ. ءبىز تەڭگەرىمدى ءارتاراپتاندىرامىز, ودان كەيىن قازاقستانعا قارجى رەسۋرستارىنىڭ اعىنىن قامتاماسىز ەتەمىز. بۇدان وزگە, كومپانيانىڭ اكتسيونەرلەرىنە تولەنەتىن ديۆيدەندتەر كولەمىن ۇلعايتۋدى, كەلەر ۇرپاقتىڭ ءال-اۋقاتىن ساقتاۋدى كوزدەيمىز. كەلەر ۇرپاق قورىنىڭ بۇل مانداتى باسقا دا الەمدىك ۇلتتىق ءال-اۋقات قورلارىنىڭ مانداتتارىنا ۇقساس», دەدى ب. گرەۆال.
اتالعان بريفينگكە سونداي-اق «سامۇرىق-قازىنا» ۇاق» اق ستراتەگيالىق دامۋ دەپارتامەنتىنىڭ ديرەكتورى ءلاززات بورانقۇلوۆا, قوعاممەن بايلانىس جانە ماركەتينگتىك كوممۋنيكاتسيالار دەپارتامەنتىنىڭ ديرەكتورى سەرگەي كۋيانوۆ تا قاتىستى.
دينارا بىتىك,
«ەگەمەن قازاقستان»
