ەلباسى نۇرسۇلتان نازارباەۆ بيىلعى جولداۋىنىڭ ونىنشى تاراۋىن «اقىلدى قالالار» «اقىلدى ۇلت» ءۇشىن» دەگەن تاقىرىپقا ارناپ, زاماناۋي تەحنولوگيالار جىلدام ءوسىپ كەلە جاتقان مەگاپوليستىڭ پروبلەمالارىن ءتيىمدى شەشۋگە بىرنەشە جول ۇسىنعان بولاتىن. مەملەكەت باسشىسى ءوز سوزىندە «سمارت سيتي» تۇجىرىمداماسى مەن قالاعا قونىس اۋداراتىن ادامداردىڭ قۇزىرەتتەرىن دامىتۋ نەگىزىندە قالالىق ورتانى باسقارۋدى كەشەندى تۇردە ەنگىزۋ قاجەت» دەدى.
شىنىمەن دە باس قالامىزدىڭ زاماناۋي قالىپتاسۋى جانە ەۋرازيانىڭ ماڭىزدى دامۋ ورتالىقتارىنىڭ قاتارىنا قوسىلۋى بارشامىزدىڭ ورتاق مىندەتىمىز. جولداۋدا ايتىلعان مەجەلى مىندەتتەر ەلىمىزدە كەزەڭ-كەزەڭىمەن ءساتتى جۇزەگە اسا باستادى.
سونىڭ ءبىرى جۋىردا استانانىڭ سول جاعالاۋىندا ورناتىلعان 39 سمارت ورىندىق. اتالعان «اقىلدى ورىندىقتاردى» ەلوردانىڭ 20 جىلدىعىنا وراي پاۆلودار وبلىسى سىيعا تارتىپ وتىر. پاۆلودار وبلىسى اكىمدىگىنىڭ ءباسپاسوز قىزمەتى حابارلاعانداي, زاماناۋي قۇرىلعىلارمەن جاساقتالعان ورىندىقتاردىڭ سمارتفوندارعا بليۋتۋز ارقىلى قوسىلۋ جانە ديناميكا ارقىلى مۋزىكا تىڭداۋ قىزمەتتەرى بار. سونداي-اق ۇيالى تەلەفونداردى سىمسىز جانە USB پورت ارقىلى قۋاتتاۋعا بولادى. ورىندىقتارعا ەلەكتر قۋاتى وعان ورناتىلعان كۇن باتارەيالارى ارقىلى كەلەدى. ەڭ باستىسى, بۇل ورىندىقتار ۆەلوسيپەدشىلەر ءۇشىن تۇراق قىزمەتىن اتقارادى.
سمارت ورىندىقتاردىڭ جاڭا ۆەلوجول ماڭايىنا ورناتىلعان سەبەبى دە سول. ويتكەنى استانا كۇنىنە تارتۋ ەتىلگەن 56 شاقىرىم ۆەلوجولدا پاۆلودارلىقتاردىڭ دا ۇلەسى بار. جەتى وبلىس اتىنان, ياعني پاۆلودار, اتىراۋ, تۇركىستان, سولتۇستىك قازاقستان, قوستاناي, اقمولا جانە جامبىل وبلىستارى تارتۋ ەتكەن ۆەلوجول ەسىل وزەنىنىڭ سول جاعالاۋى, ەكسپو كەشەنى ارقىلى ءوتىپ, قالا باعىنىڭ شاڭعى-روللەرلىك تراسساسى مەن قاراوتكەل اۋىلىنان باستالاتىن «جاسىل بەلدەۋ» ارقىلى وتەتىن ۆەلوسيپەد جولىن بايلانىستىرادى.
پاۆلودار وبلىسىنىڭ اتىنان تابىس ەتىلگەن جول مەن «اقىلدى ورىندىقتار» ERG كومپانياسى قاراجاتىنىڭ ەسەبىنەن سالىنعانىن ايتا كەتكەنىمىز ءجون.
باعاسى 1,2 ملن تەڭگە تۇراتىن سمارت-ساكىلەردىڭ ءۇش جىلعا دەيىن كەپىلدىك مەرزىمى بار. «سمارت سيتي» ستاندارتىن قالىپتاستىرۋدىڭ ءبىر ۇلگىسى رەتىندە وسى «اقىلدى ورىندىقتاردى» اتاۋعا بولادى. راسىمەن دە «اقىلدى قالالار» وڭىرلىك دامۋدىڭ, يننوۆاتسيانى تاراتۋدىڭ جانە ەلىمىزدىڭ بارلىق اۋماعىندا تۇرمىس ساپاسىن ارتتىرۋدىڭ جوباسىنا اينالادى.
ايتا كەتەيىك, مۇنداي سمارت ورىندىقتار پەتروپاۆل, قاراعاندى سياقتى وبلىس ورتالىقتارىنا دا قويىلا باستادى. «اقىلدى قالا» باعدارلاماسى اياسىندا جۇزەگە اسىپ جاتقان جوبالاردى جاڭا تۇرپاتتى قازاقستاننىڭ جەتىستىكتەرى قاتارىندا اتاۋعا تولىق نەگىز بار.
ميراس اسان,
«ەگەمەن قازاقستان»
