وراسان تاجىريبەسى, ءبىلىمى مەن قابىلەتىنىڭ ارقاسىندا ول جەكە كاسىبىن اشىپ, IT-تەحنولوگياسى سالاسىندا تابىستى كاسىپكەر اتانىپ, شەتەلدى باعىندىرار مۇمكىندىگى بار ەدى. الايدا, ول عىلىمدى تاڭداپ, ءومىرىن وقىتۋشىلىق قىزمەتكە ارنادى. تاباندى ەڭبەگىنىڭ ارقاسىندا دوكتورلىق ديسسەرتاتسيا قورعاپ, اقش-تىڭ بەلدى مەملەكەتتىك وقۋ ورنىنىنىڭ پروفەسسەرى اتاعىنا يە بولدى.
ساپارعا شىعار الدىندا جاس عالىم سدۋ قابىرعاسىنا كەلىپ, جەكە جەتىستىگىمەن ءبولىستى. مەيرامنىڭ ايتۋىنشا, ماتەماتيكا عىلىمىنا دەگەن قۇشتارلىق ونىڭ بويىنا مەكتەپتە ساباق بەرگەن اناسىنان دارىعان.
- بالا كەزىمنەن, ماتەماتيكالىق تاپسىرمالاردى, ويجۇمباقتاردى شەشۋگە قۇمارتىپ, اقتوبەلىك قازاق-تۇرىك ليتسەيىنىڭ قابىرعاسىندا جۇرگەندە-اق رەسپۋبليكالىق جانە حالىقارالىق وليمپيادالاردان جۇلدەلى ورىندارعا يە بولاتىنمىن. سدۋ-دى تاڭداۋىم كەزدەيسوق ەمەس, ويتكەنى وقۋ ورنىنىڭ شەتەلگە جول اشاتىن باستى ەرەكشەلىگى – اعىلشىن تىلىندە ءبىلىم بەرۋى بولدى. جاراتىلىستانۋ فاكۋلتەتىنىڭ ءۇشىنشى كۋرسىندا ءجۇرىپ, مەن وقىتۋشىنىڭ كومەكشىسى رەتىندە العاش رەت ساباق بەرە باستادىم, - دەيدى مەيرام.
باكالاۆريات پەن ماگيستراتۋرانى تامامداعان سوڭ, 2012 جىلى مەيرام پەنسيلۆانيا شتاتىنىڭ ۋنيۆەرسيتەتىنە كومپيۋتەرلىك عىلىمدار سالاسى بويىنشا دوكتارانتۋراعا قابىلداندى. سودان بەرى التى جىل بويى مەيرام ۋنيۆەرسيتەت قابىرعاسىندا ءدارىس بەرىپ, دوكتورلىق ديسسەرتاتسياسىن قوعاعان. پروفەسسەر دارەجەسىن يەلەنگەن جاس عالىم, ساناۋلى كۇندەر ارالىعىندا جاڭا عىلىمي دارەجەدە ءوز جۇمىسىنا كىرىسپەك.
ول سدۋ-داعى تاجىريبەسى جايلى ەرەكشە ىقىلاسپەن ەسكە الادى جانە مانسابىنىڭ العاشقى قادامى وسى ءبىلىم ورداسىندا باستاۋ العانىن ايتادى.
- باكالاۆرياتتى اياقتاعان سوڭ, مەن سدۋ ماگيستراتۋراسىنا ماتەماتيكا عىلىمى سالاسىنا ءتۇستىم. سول كەزەڭنەن-اق, مەن عىلىممەن ايناسىپ, پروفەسسور بولۋ ءۇشىن, ماعان دوكتورلىق دارەجە قاجەت ەكەندىگىن ناقتى ءتۇسىندىم. ءدال وسى كەزدە ءبىلىمىمدى شەتەلدە جالعاستىرامىن دەپ بەل بۋدىم, - دەيدى مىرزابولاتوۆ.
وتانىنان شالعايدا, پەنسيلۆانيا ۋنيۆەرسيتەتىندەگى ارىپتەستەرى اراسىندا جالعىز قازاق بالاسى بولا تۇرا, مەيرامدى ەلدەگى عىلىمنىڭ دامۋى تولعاندىردى. ول وتانداستارىن ساعىنىپ, اعايىن-تۋىس پەن ۇلتتىق تاعامدى, تۋعان جەردىڭ توپىراعىن اڭساسا دا, قايتسەم ءبىلىمىمدى شىڭداپ, ەلگە ورالىپ, عىلىمدى دامىتامىن دەگەن وي ساناسىنا تىنىم بەرمەگەن. قازىر دە بۇل وي وعان كۇش-قۋات بەرىپ, بولاشاققا جول سىلتەۋدە.
- قازىرگى تاڭدا ەلدەگى عىلىمنىڭ دارەجەسى ونداعىداي ەمەس ەكەندىگى بارشامىزعا بەلگىلى. ارينە عىلىم دەڭگەيىن كوتەرىپ, باتىستان دا جوعارى دارەجەگە جەتكىزۋ ارمانى ماعان مازا بەرمەيدى. الايدا بۇل ءۇشىن ءبىلىمدار ادامدار كەرەك. مۇمكىن مەنىڭ قاراپايىم مىسالىم وزگە دە جاس ۇرپاق وكىلدەرىنە تۇرتكى بولىپ, ولار شەتەلدەن ءبىلىم الىپ, وتانىمىزعا كەلىپ تاجىريبەسىمەن بولىسەر, - دەگەن ۇمىتتە پروفەسسور.
بۇل كۇنى جاستار تەز تابىس تاۋىپ, جەتىستىككە جىلدام قول جەتكىزۋگە قۇمار بولسا دا, مەيرام جاقىن ارادا عىلىمنىڭ قۇنى ارتىپ, ءبىلىمدى جاس بۋىن وكىلدەرى ەلدەگى ءبىلىم سالاسىن كوركەيتەدى دەگەن زور سەنىمدە.
باتىستىق ءبىلىم مەن وتاندىق ءبىلىم ايىرماشىلىقتارىنا توقتالا وتىرىپ, مەيرام بىزدەگى ءبىلىم جۇيەسىنىڭ كەمشىل تۇستارى مەن جەتىستىگىن اشىق ايتتى.
- ايتا كەتەتىن جايت, ءبىزدىڭ مەملەكەتتە باكالاۆريات, اسىرەسە Iت باعىتى بويىنشا باتىستىق دارەجەدەن ەش كەم ەمەس. الدىڭعى قاتارلى تەحنيكالىق وقۋ ورىندارى زاماناۋي ۇردىستە ءبىلىم بەرۋدە ءارى ستۋدەنتتەر باتىستىق جۇيە بويىنشا تولىق اقپاراتتى الۋدا, دەپ ناقتى ايتا الامىن. بىراق ماگيستراتۋرا مەن عىلىمي-زەرتتەۋ باعىتتارى ەلىمىزدە كەنجە قالۋدا, - دەگەن پىكىردە جاس عالىم.
ستۋدەنتتىك قاۋىمداستىققا كەلسەك, مەيرامنىڭ پىكىرىنشە, ءبىزدىڭ جاستار باتىستىق قۇربىلاستارىنا قاراعاندا الدەقايدا قاراپايىم. شەتەلدىك جاستار بالا كەزىنەن وزدەرىن كوشباسشى ساناپ, بار ءبىلىمىن كورسەتۋدەن قىمسىنبايدى, كەيدە بويلارىندا مەنمەندىك تە باسىم, دەيدى ول.
20-تامىزدان باستاپ, مەيرام اقش-قا قايتا ورالىپ كۇندەلىكتى جۇمىسىنا كىرىسەدى. وقىتۋشىلىق قىزمەتپەن قاتار جاس پروفەسسور عىلىمي جۇمىستارىن جوعارى يمپاكت-فاكتورلى عىلىمي باسپالارعا شىعارۋدى جوسپارلاۋدا. مىرزابولاتوۆتىڭ بىرقاتار عىلىمي جۇمىستارى ديسسەرتاتسيالىق ەڭبەگىن قورعاۋ بارىسىندا باسپا بەتتەرىندە جارىق كورگەن. بۇل پروفەسسورلىق قىزمەتتىڭ نەگىزگى بولىگى, دەيدى مەيرام.
- امەريكاندىقتاردان نە ۇيرەنۋگە بولادى؟ بۇل كوزدەگەن ماقساتىڭدى بىرنەشە جىل بۇرىن ناقتى جوسپارلاۋ قاسيەتى. نەلىكتەن شەتەلدەگى ءبىلىم ساپالى؟ وندا پروفەسسورلار گرانتقا تاپسىرىس بەرەدى, جوسپار قۇرىپ, ءوز جوبالارىنا سايكەس گرانتقا يە بولادى. وسى ورايدا گرانت وقۋ اقىسى مەن شاكىرتاقىسىن تولىقتاي قامتيدى. وسىنداي شارت بويىنشا مەنىڭ دە جەتەكشىم مەنى جۇمىسقا الىپ وتىر. ناتيجەسىندە ارقايسىمىز موينىمىزعا جۇكتەلگەن مىندەتتى تەرەڭ سەزىنەمىز, – دەپ ءبولىستى مەيرام.
تۋعان ءبىلىم وشاعىندا مەيرامدى ارىپتەستەرى مەن دوستارى قۇشاق جايا قارسى الىپ, اق جول تىلەپ, مەن بيىك بەلەستەردى باعىندىرۋعا باتالارىن جاۋدىردى. ساناۋلى كۇندەردىڭ ارالىعىندا ول قايتا مۇحيت اسىپ, ءوز قىزمەتىنە كىرىسىپ كەتەدى. الايدا ونىڭ ەلىم دەپ سوققان, پاتريوتتىق سەزىمگە تولى جۇرەگى كىندىك قانى تامعان جەرىندە قالادى. وتانىما ورالام دەگەن وي ونى كەز-كەلگەن اتاق-دارەجە, مانساپتان دا جوعارى قاناتتاندىرىپ, جاڭا جەتىستىكتەرگە جەتەلەيدى. مىنە, پەنسيلۆانيا شتاتى ءبىلىم ورداسىنىڭ ەڭ جاس پروفەسسورىنىڭ تابىس كىلتى مەن قاراپايىم وقيعاسى وسىنداي.
- وتاندىق جاستارعا ايتارىم, ءاردايىم الدارىڭا بيىك ماقسات قويىپ, وعان قول جەتكىزۋگە ايانباي كۇش سالۋ قاجەت. ەش ۋاقىتتا جالقاۋلىققا جول بەرمەي, الدىن الا ءبارىن جوسپارلاپ, قيىندىققا مويىماۋ. جارىم جول ءجۇرىپ تە جەتىستىكتىڭ تەڭ جارتىسىنا قول جەتكىزۋگە بولادى. ءاردايىم شىنشىل بولىپ, ەگەر وزىڭنەن ءبىلىمى اسقان ادام كەزدەسسە, وعان جول بەرۋ قاجەت. بالكىم, مەنىڭ ومىرلىك ۇستانىم مەن ۇرانىم وسى بولار, - دەگەن پىكىرىن ءبىلدىردى مەيرام مىرزابولاتوۆ.
