ليۋدميلا بيۋرابەكوۆانىڭ ايتۋىنشا دارىلىك زاتتار بويىنشا ەۋروپالىق اگەنتتىك (EMA), اقش-تىڭ تاماق ونىمدەرى مەن ءدارى-دارمەكتەرى ساپاسىن سانيتارلىق قاداعالاۋ باسقارماسى (FDA) لينحاي پروۆينتسياسىندا (قحر) ورنالاسقان قىتايدىڭ چجەتسزيان حۋاحاي فارماسيۋتيكالس كومپانياسىمەن وندىرىلگەن بەلسەندى سۋبستانتسيا ۆالسارتاندى نارىقتان قايتارىپ الۋدا.
«قايتارىپ الۋ سەبەبى – پرەپاراتتىڭ بەلسەندى سۋبستانتسيامەن كەيبىر پارتيالارىندا قاۋىپتى قوسپانىڭ بولۋى. ۆالسارتان پرەپارتتارى قان قىسىمى جوعارى ناۋقاستارعا قولدانىلادى. قايتارىپ الۋ قىتايلىق كومپانيا وندىرۋشىلەرىنە جەتكىزەتىن ۆالسارتان بەلسەندى فارمسۋبستانتسياسىندا N-نيتروزوديمەتيلامين (NDMA) تابىلعاننان كەيىن باستاماشىلىق ەتىلدى. NDMA ىقتيمال ادام كانتسەروگەنى رەتىندە جىكتەلەدى. ونىڭ ۆالسارتاندا بولۋى, بەلسەندى زاتتىڭ ءوندىرىلۋ ءتاسىلىنىڭ وزگەرۋىمەن بايلانىستى دەپ ەسەپتەلەدى. EMA, FDA قازىر NDMA دەڭگەيىن جانە پرەپاراتتى قابىلداعان پاتسيەنتتەردىڭ ىقتيمال اسەرىن باعالاۋدى جۇرگىزۋدە. جاڭا اقپارات جاريالانعان كەزدە, ول رەتتەۋشى ورگانداردىڭ سايتتارىندا دا جاريالانادى. ۆالسارتان بەلسەندى فارماتسەۆتيكالىق سۋبستانتسياسى مىنا پرەپاراتتاردا انىقتالعان. ولار, نورتيۆان, تابلەتكا ءۇلبىرلى قابىقپەن قاپتالعان 40 مگ, 80 مگ, 160 مگ وندىرگەن «گەدەون ريحتەر» ااق, ۆازار تابلەتكالار 40 مگ, 80 مگ, 160 مگ جانە ۆازار-ن تابلەتكالار 80/12,5مگ, 160/12,5 مگ, 160/25 مگ, وندىرگەن بالكانفارما-دۋپنيتسا اد جانە ءۇشىنشىسى كومبي كاردوفيكس-سانوۆەل پليۋس تابلەتكالار 5/160/12,5 مگ, 5/160/25 مگ, 10/160/12,5 مگ, 10/160/25 مگ وندىرگەن سانوۆەل فارماكو- يندۋستريالىق ساۋدا كومپانياسى, تۇركيا. ۆالسارتان بار دارىلىك پرەپاراتتاردى وندىرۋشىلەر وسى پرەپاراتتىڭ بەلسەندى زاتىنا شيكىزات شىعاراتىن كومپانيادان وسى شيكىزاتتىڭ قاناعاتتانارلىقسىز ساپاسى تۋرالى حابارلاما الدى. «گەدەون ريحتەر» ااق وكىلدىگى حاتى نەگىزىندە 2018 جىلدىڭ 10 شىلدەسىندە قازاقستان رەسپۋبليكاسى دەنساۋلىق ساقتاۋ مينيسترلىگىنىڭ فارماتسيا كوميتەتىنىڭ ءتورايىمىنىڭ بۇيرىعىمەن 40 مگ, 80 مگ جانە 160 مگ ءۇلبىرلى قابىقپەن قاپتالعان تابلەتكالارداعى نورتيۆان دارىلىك زاتىنىڭ بىرقاتار توپتامالارى قايتارىپ الىندى. سانوۆەل كومپانياسى تىركەۋ ساتىنەن باستاپ ءوز ونىمدەرىن قازاقستان اۋماعىنا اكەلگەن جوق. قازاقستان رەسپۋبليكاسى دەنساۋلىق ساقتاۋ مينيسترلىگىنىڭ فارماتسيا كوميتەتىنىڭ ىشكى تەرگەۋى بارىسىندا ۆازار پرەپاراتىنىڭ تىركەۋ كۋالىگىن قايتارىپ الۋ تۋرالى شەشىم قابىلداندى. پرەپاراتتار اۋىر دەرتتەردى ەمدەۋدە قولدانىلعاندىقتان, ەمدەۋشى دارىگەردىڭ رۇقساتىنسىز پرەپاراتتاردى قولدانۋدى توقتاتۋدىڭ قاجەتى جوق. وسىعان بايلانىستى, كورسەتىلگەن وندىرۋشىلەردىڭ ۆالسارتانىن قولداناتىن بارلىق ناۋقاستارعا دەرەۋ دارىگەرگە بارىپ, پەراپارتتاردى اۋىستىرۋى كەرەك», دەدى فارماتسيا كوميتەتىنىڭ ءتورايىمى.
سونىمەن قاتار ول بالكان فارما ءوندىرۋشىسى ءوز ءوندىرىسىنىڭ پرەپاراتىن قابىلداعان پاتسيەنتتەردى قاداعالاۋدى ءوز مىندەتىنە الاتىنىن جەتكىزدى.
«قايتارىپ الۋعا جاتاتىن پرەپاراتتى قابىلداعان ناۋقاستارعا جاعىمسىز اسەرلەر پايدا بولعان جاعدايدا ەمدەۋشى دارىگەرگە بارۋ قاجەت, ول ءارى قاراي دارىلىك پرەپاراتتى وندىرۋشىگە قابىلداۋمەن بايلانىستى انىقتالعان اسەرلەر تۋرالى باياندايدى. سونداي-اق, مۇنداي اسەرلەردى ءوندىرۋشىنىڭ قازاقستانداعى وكىلدىگى «Ratiopharm Kazakhstan» جشس-عا 8 (727) 325 1615 تەلەفونى بويىنشا تۋرالى حابارلاۋعا بولادى», دەدى «Ratiopharm Kazakhstan» جشس مەديتسينالىق ديرەكتورى زايرا سمايلوۆا.
