قازاقستان رەسپۋبليكاسى ءبىلىم جانە عىلىم مينيسترلىگى «مەكتەپكە جول» ءداستۇرلى رەسپۋبليكالىق قايىرىمدىلىق اكتسياسىن وتكىزۋ تۋرالى جاريالايدى. ءبىلىم جانە عىلىم مينيسترلىگىنىڭ الەۋمەتتىك باعىتتاعى باستاماسى بۇكىل رەسپۋبليكا بويىنشا 2018 جىلعى 1 تامىزبەن 30 قىركۇيەك ارالىعىندا وتكىزىلەدى.
اكتسيانىڭ ماقساتى – از قامتىلعان جانە كوپ بالالى وتباسىلارىنان, جەتىم جانە اتا-اناسىنىڭ قامقورلىعىنسىز قالعان بالالارعا جاڭا وقۋ جىلىنا دايىندىق كەزەڭىندە كومەك كورسەتۋ جانە الەۋمەتتىك سەبەپتەر بويىنشا بالالاردىڭ مەكتەپكە بارماۋىن الدىن الۋ.
شاراعا ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى نۇربەك ورشۋبەكوۆ; «نۇر وتان» پارتياسى ورتالىق اپپاراتىنىڭ ۇيىمداستىرۋ جانە ايماقتىق جۇمىسى دەپارتامەنتى ديرەكتورىنىڭ ورىنباسارى ساقتاعان سادۋاكاسوۆ; استانا قالاسى ءبىلىم باسقارماسى باسشىسىنىڭ ورىنباسارى باعلان سماتاەۆا قاتىستى.
«اكتسيانى وتكىزۋدىڭ ون جىلى ىشىندە 2 ملن.-نان استام بالاعا جالپى سوماسى 17 ملرد. تەڭگەدەن استام ماتەريالدىق كومەك كورسەتىلدى. دەمەۋشىلەر مەن مەتسەناتتار جالپى سوماسى 7,9 ملرد. تەڭگەدەن استام كومەك پەن قولداۋ كورسەتتى. مەملەكەتتىك ورگاندار, ۇلتتىق كومپانيالار جانە اكتسيونەرلىك قوعامدار جىل سايىن اكتسياعا بەلسەندى قاتىسادى».
قازاقستان رەسپۋبليكاسى ءبىلىم جانە عىلىم مينيسترلىگى ەلىمىزدىڭ بارلىق ازاماتتارىنا, بيزنەسمەندەرگە, كاسىپكەرلەرگە, مەتسەناتتارعا اكتسياعا قوسىلۋعا جانە ومىرلىك قيىن جاعدايعا تاپ بولعان بالالارعا, وتباسىلارعا كومەك كورسەتۋدە, سونداي-اق مەكتەپكە ءوز جولىن تابۋعا قول ۇشىن بەرۋدە ۇلەستەرىن قوسۋعا شاقىرادى.
بارلىق اكتسياعا قوسىلۋعا تىلەك بىلدىرۋشىلەرگە بالالاردىڭ قۇقىقتارىن قورعاۋ كوميتەتىنىڭ تەلەفونىنا – 8 (7172) 74 21 40, سونداي-اق وبلىستاردىڭ, استانا, الماتى جانە شىمكەنت قالالارىنىڭ ءبىلىم باسقارمالارىنا حابارلاسۋىڭىزدى سۇرايمىز.
