ويلانىپ-تولعانا كەلە, سولتۇستىكتىڭ جۇرتىنا نە قات ەكەندىگىن اقىل تارازىسىنا سالعان. اقىرى جىلىجاي سالسام دەگەن شەشىمگە كەلدى. «دامۋ» قورىنان 10 ميلليون تەڭگە نەسيە العان. ونىسى جەتپەي قالىپ, اكەسىنىڭ قالتاسىن دا شامالاپ قاعادى. اقىرى جارتى گەكتار جەرگە تاپ-تۇيناقتاي ەتىپ جىلىجاي سالىپ, كونستانتين كاسىپتى باستاپ كەتەدى.
بۇرىن-سوڭدى تاجىريبەسى بولماعاندىقتان, قىسى-جازى ءونىم بەرەتىن جىلىجايدىڭ قۇرىلىسىن ينتەرنەتتەن ىزدەگەن. حالىقتىق تاجىريبەگە دە سۇيەندى. اقىر سوڭىندا كىسى بويى ورلاپ قازىپ, جوعارعى جاعىن كۇمبەزدەپ پوليكاربوناتپەن قاپتادى. ورلانعان تومەنگى جاققا قوس قاباتتان جىلۋ قۇبىرىن جۇرگىزدى. پەش سالدى. اۋىزەكى تىلدە «ساماۋىر» دەپ اتالاتىن قوس قاپتالى, تومەنگى جانە جوعارعى جاعى سۋعا تولىپ تۇراتىن پەشكە ىستىق سۋدى قۋالايتىن ناسوس ورناتتى. ال قىستىگۇنى كوكونىستەرىن سۋاراتىن سۋدى پەشتىڭ ۇستىندەگى ىدىستا جىلىتىپ الادى. بىلاي قاراعاندا تىم قاراپايىم.
– وسىنداي جۇمىس ىستەۋ ءۇشىن اسا كوپ ءبىلىمنىڭ كەرەگى جوق, – دەپ كۇلەدى كونستانتين نيكولاەۆيچ. تەك ىنتا بولسا بولعانى. «مەملەكەتتىڭ قامقورلىعىنىڭ ارقاسىندا قازىر تۇرمىسىمىز ءتاۋىر. جىلىجايدان تاۋلىگىنە 250-300 كەلى شاماسىندا ءونىم الامىن. ءونىم وتكىزۋدە ەشبىر قيىندىق جوق. اۋدان ورتالىعى, ءتىپتى, ستەپنوگورسك قالاسى مەن استانادان دا تاپسىرىستار ءتۇسىپ جاتادى», دەيدى كاسىپكەر.
اۋىلداستارىنىڭ داستارحانىنا دا جاس كاسىپكەردىڭ ءونىمى قويىلىپ جاتىر ەكەن. جەر بار, سۋ جەتكىلىكتى, كوكونىسكە كەرەكتى كوڭ دەگەنىڭىز تاۋ-تەڭىز. سوندا اۋىل تۇرعىندارىنىڭ ءوز باقشالارىندا كوكونىس ەكپەي, كونستانيننەن كەلىسىن ءۇش ءجۇز تەڭگەگە نەگە ساتىپ الاتىندىعىن ءتۇسىنىپ كورىڭىز ەندى؟
قىستا كوكونىستىڭ باعاسى تىپتەن شارىقتايدى. اسىرەسە جاڭا جىلدىڭ الدىندا قاسقالداقتىڭ قانىنداي تاپتىرمايدى. قارا جۇمىسقا قاجىرلى كونستانتين ەكى جىلعا جەتەر-جەتپەس ۋاقىتتا ەپتەپ ەڭسەسىن باسقان قارىز اتاۋلىدان ءبىرجولا قۇتىلعان. قازىر قىسىلعان جانعا قول ۇشىن بەرەتىن قاۋقارى بار.
جالعىز جىلىجاي عانا ەمەس, ونىمەن قوسا بال اراسىن دا ۇستايدى ەكەن. ون ەكى ۇيا. ارقايسىسىنان شامامەن ماۋسىمىنا 200 مىڭ تەڭگەدەن كىرىس كىرەدى. جىلىجايدىڭ جانىندا جاسىل شالعىن جايقالىپ, الۋان ءتۇرلى گۇل كوز جاۋىن الىپ سامساپ تۇر. قۇجىناعان, بال جيناعان جۇمىسشى ارانىڭ جۇمىلا كىرىسكەن ورتاق ىسىنە كوزىڭ سۇيسىنەدى. بەينەلەي ايتساق, ومىردەن ءوز كاسىبىن تاپقان كونستانتيننىڭ تىرشىلىگى ءتارىزدى.
بايقال ءبايادىل,
«ەگەمەن قازاقستان»
اقمولا وبلىسى,
ءبىرجان سال اۋدانى
