قىرعىزستاننىڭ توتەنشە جاعدايلار مينيسترلىگى ءباسپاسوز قىزمەتى جەتەكشىسىنىڭ مىندەتىن اتقارۋشى ەلميرا شاريپوۆانىڭ حابارلاۋىنشا, تاس كوشكىنى قىرعىزستان استاناسىنان 40 شاقىرىم قاشىقتىقتا, شۋ اۋدانىنىڭ اۋماعىندا تىركەلگەن. تەڭىز دەڭگەيىنەن 4100 مەتر بيىكتىككە شىققان تۋريستەر تاس كوشكىنىنە تاپ بولعان. وقيعا استانا ۋاقىتىمەن 13-00-دە تىركەلگەن.
اتالعان وقيعا جايىندا دەرەۋ ەلىمىزدىڭ ىشكى ىستەر مينيسترلىگىنە حابارلانىپ, زارداپ شەككەندەردى بىرلەسە قۇتقارۋ وپەراتسيالارىنىڭ جايى تالقىلانعان. وعان قوسا بىشكەك قۇتقارۋ جاساقتارى مەن تىكۇشاقتى قازاقستاننان جىبەرۋدى سۇراعان.
سىرتقى ىستەر مينيسترلىگى ءباسپاسوز قىزمەتىنىڭ جەتەكشىسى ايبەك سمادياروۆتىڭ ءمالىم-
دەۋىنشە, العاشقى كۇنى كۇننىڭ بۇلتتىلىعى سالدارىنان كورشى مەملەكەتتەگى تاۋلى ايماققا تىكۇشاق جىبەرۋ مۇمكىن بولماعان.
ال كەشە تاڭەرتەڭ ەلىمىزدىڭ توتەنشە جاعدايلار كوميتەتى رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى «قازاۆياقۇتقارۋ» تىكۇشاعىمەن سكريابين مۇزدىعىنا جەتىپ, قۇتقارۋ وپەراتسياسىن جۇرگىزدى. قۇتقارۋ توبى الماتىدان قۇرامىندا ەكى كينولوگيالىق توبى بار 9 ادامنان قۇرالىپ, مي-171 تىكۇشاعىمەن اتتانعان.
قۇتقارۋ وپەراتسياسىنىڭ قورىتىندىلارى تۋرالى العاشقى مالىمەتتەردى استانادا ىشكى ىستەر ءمينيسترىنىڭ ورىنباسارى يۋري يلين حابارلادى.
ونىڭ ايتۋىنشا, №9 سكريابين مۇزدىعىندا قازا تاپقان ازامات الماتى قالاسىنىڭ تۇرعىنى, 1976 جىلى دۇنيەگە كەلگەن. الدىن الا دەرەكتەرگە قاراعاندا مارقۇم الماتىداعى عىلىمي-زەرتتەۋ ينستيتۋتتارىنىڭ بىرىندە قىزمەت ەتكەن.
ال زارداپ شەككەن وزگە ەكى ادام دا الماتىلىق, تاعى بىرەۋى – شىعىس قازاقستان وبلىسىنىڭ تۇرعىنى.
ال وتانداستارىمىزبەن بىرگە بولعان رەسەي ازاماتتارىنىڭ ۇشەۋى دە تومسك قالاسىنىڭ تۇرعىندارى ەكەن.
– قۇتقارۋ وپەراتسياسى 4100 مەتر بيىكتىكتە جۇرگىزىلدى. قازا تاپقان ازاماتتىڭ دەنەسى مەن قۇتقارىلعاندار ماناس اۋەجايىنا جەتكىزىلگەن بويدا تەرگەۋ امالدارى جۇرگىزىلىپ, كۋاگەرلەردەن جاۋاپ الىندى. ال زارداپ شەككەندەردىڭ دەنساۋلىقتارى الماتى اۋەجايىندا ءجىتى تەكسەرىلىپ, ولاردىڭ وزدەرى اۋرۋحاناعا جاتۋدان باس تارتتى. ولاردىڭ بارلىعى دا ەر ادامدار. مارقۇمنىڭ دەنەسى ساراپتاما جۇرگىزۋ ءۇشىن الماتى قالالىق ىشكى ىستەر دەپارتامەنتىنە تاپسىرىلدى, – دەدى ىشكى ىستەر ءمينيسترىنىڭ ورىنباسارى.
يۋري ءيليننىڭ پايىمداۋىنشا, توتەنشە وقيعاعا تاياۋداعى جەر سىلكىنىسىنەن سوڭ تاۋ جىنىستارىنىڭ قوزعالىسى مەن اۋا رايىنىڭ قۇبىلىسى سەبەپ بولۋى مۇمكىن. ال قىرعىزستاننىڭ توتەنشە جاعدايلار مينيسترلىگى ءباسپاسوز قىزمەتى ەل اۋماعىنداعى تاۋ جوتالارىندا بيىلعى جىل باسىنان بەرى تاس كوشكىنى بولماعاندىعىن اتاپ ءوتتى.
ەلميرا شاريپوۆانىڭ ايتۋىنشا, سكريابين مۇزدىعى جەر-جەردەن اۋەسقوي الپينيستەردى قۇمارتىپ تۇراتىن ايماق ەكەن. ال تومەن قۇلديلاعان ۇساق تاستاردىڭ ءوزى ادام ومىرىنە اسا قاۋىپتى سانالادى.
مۇنداي تابيعي قۇبىلىستار ادەتتە تاۋدىڭ باسى مۇزدان تازاراتىن جاز مەزگىلىنىڭ ەكىنشى جارتىسىندا كوپتەپ تىركەلەدى. وعان قوسا تۋريستەردىڭ شالىس باسۋى دا تاۋ قىرتىستارىنىڭ قوزعالىسىنا سەبەپ بولۋى مۇمكىن. ال توتەنشە وقيعانىڭ ءمان-جايىن تەرگەۋ ورگاندارى انىقتاۋى ءتيىس.
جالپى, №9 سكريابين مۇزدىعىنىڭ بيىكتىگى 4800 مەترگە جۋىقتايدى.
سەرىك ابدىبەك,
«ەگەمەن قازاقستان»
