وعان قول سۇققان باسبۇزارلاردى حالقىمىز ءبىراۋىزدان ايىپتاۋدا
ارانداتۋعا جول بەرىلمەيدى
جەكسەنبى كۇنى اتىراۋداعى «يساتاي-ماحامبەت» الاڭىندا جۇرتشىلىقتىڭ قاتىسۋىمەن ميتينگ ءوتتى. ميتينگكە حالىق وتە كوپ جينالدى. ءار ءتۇرلى سالانىڭ وكىلدەرى بار, مۇنايشىلار دا, مۇعالىمدەر دە, ستۋدەنتتەر دە جاڭاوزەندەگى وقيعانى ايىپتاعان پىكىرلەرىن ءبىلدىردى. الدىمەن ءسوز العان ەڭبەك ارداگەرى كەڭەس قوسىباەۆ «جاڭاوزەن قالاسىنداعى وقيعا قازاقستاننىڭ تاۋەلسىزدىگى ارقىلى قول جەتكىزگەن جەتىستىگىمىزگە, ەلدىڭ بىرلىگى مەن ىنتىماعىنا نۇقسان كەلتىرە المايدى. ءبىز ەلدىڭ تۇراقتىلىعىنا سىنا قاققىسى كەلگەن ارانداتۋشىلار ارەكەتىنە جول بەرە المايمىز», دەدى. ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ ستۋدەنتى ءوسيلا ارمانقىزى «جاڭاوزەندەگى وقيعا ارانداتۋشىلاردىڭ ارەكەتى, مۇنى ەركىن ەلدىڭ ەرتەڭى –جاستار ەشقاشان قولدامايدى. ءبىز ەل ىشىندەگى بىرلىك پەن ىنتىماقتىڭ بۇزىلماعانىن قالايمىز. ءبىز ءۇشىن ەڭ باستى قۇندىلىق – قازاق ەلىنىڭ تاۋەلسىزدىگى. ءبىز ونى كوزىمىزدىڭ قاراشىعىنداي ساقتاۋىمىز قاجەت», دەدى. – ءبىز بۇگىنگى ەڭبەگىمىزدىڭ جەمىسىن بالالارىمىز, كەيىن ۇرپاق كورسە ەكەن دەيمىز. سول سەبەپتەن, ەلدىڭ بىرلىگىن ساقتاپ, كەلەشەك ۇرپاق ءۇشىن ونەگە بولارلىق ءىس جاسايىق, –دەدى يساتاي اۋدانىنداعى «جايىقمۇنايگاز» باسقارماسىنىڭ مۇنايشىسى قوجانتاي سىديىقوۆ. ميتينگكە قاتىسۋشىلار ماڭعىستاۋ جۇرتشىلىعىنا ارنالعان ۇندەۋ قابىلدادى. جولداسبەك شوپەعۇل. اتىراۋ وبلىسى.
