كەشە مەملەكەت باسشىسى نۇرسۇلتان نازارباەۆتىڭ توراعالىعىمەن قاۋىپسىزدىك كەڭەسىنىڭ وتىرىسى ءوتتى.
قاۋىپسىزدىك كەڭەسىنىڭ وتىرىسى بارىسىندا ماڭعىستاۋ وبلىسىنىڭ جاڭاوزەن قالاسىنداعى جاعداي تالقىلاندى. باس پروكۋرور ا.داۋىلباەۆ, ۇقك ءتوراعاسى ن.ابىقاەۆ, جاۋاپتى مەملەكەتتىك ورگانداردىڭ وكىلدەرى ءسوز سويلەدى. وتىرىستى مەملەكەت باسشىسى قورىتىندىلادى.
ەلباسىنىڭ قازاقستان حالقىنا ارناۋ سوزىندە بىلاي دەلىنگەن:
قۇرمەتتى قازاقستاندىقتار!
كەشە ماڭعىستاۋ وبلىسىنىڭ جاڭاوزەن قالاسىنداعى مەرەكەلىك ءىس-شارا كەزىندە ءبىر توپتىڭ قىلمىستىق ارەكەتى سالدارىنان جاپپاي تارتىپسىزدىك ورىن الدى. تاۋەلسىزدىك مەرەيتويىن مەرەكەلەۋ ءۇشىن ورتالىق الاڭعا جينالعان بەيبىت ازاماتتار بۇزاقىلاردان قۇرالعان توپتىڭ شابۋىلىنا ۇشىرادى. قوعامدىق ءتارتىپتى بۇزعان بۇزاقىلار پوليتسيا قىزمەتكەرلەرىنە شابۋىل جاساپ, مەرەكەگە بايلانىستى قويىلعان كيىز ءۇيدى قيراتىپ, پوليتسيانىڭ اۆتوبۋسىن ورتەپ جىبەردى. ولار بەيبىت تۇرعىنداردى ۇرىپ-سوعىپ, الاڭعا تاياۋ تۇرعان اۆتوكولىكتەرگە زاقىم كەلتىرىپ, ولاردى جاعىپ جىبەردى. باسبۇزار توپ زاڭسىز ارەكەتتى توقتاتۋعا شاقىرعان قۇقىق قورعاۋ ورگاندارىنىڭ ەسكەرتۋلەرىن تىڭداماي, قارۋلارىن تارتىپ الۋ ماقساتىندا قۇقىق قورعاۋ ورگاندارىنىڭ قىزمەتكەرلەرىنە شابۋىل جاسادى. جاپپاي ءتارتىپ بۇزۋشىلىق كەزىندە قالالىق جانە سەلولىق اكىمدىك عيماراتتارى, قوناق ۇيلەر, «وزەنمۇنايگاز» كومپانياسىنىڭ اكىمشىلىك عيماراتى ورتەلدى. جەكە جانە زاڭدى تۇلعالاردىڭ م ۇلىكتەرى قيرادى, اۆتوكولىكتەر ورتەندى, بانكوماتتار, دۇكەندەر, بانكتەر جانە ت.ب. تونالدى. بارلىعى 46 نىسان شابۋىلعا ۇشىرادى. شاعىن قالادا شامامەن بارلىق نىسان شابۋىلعا ۇشىرادى, ورتەلدى نەمەسە قيراتىلدى. وكىنىشكە وراي, وسى تارتىپسىزدىك سالدارىنان ادامدار, ءبىزدىڭ ازاماتتارىمىز قايتىس بولدى. الدىن-الا مالىمەتتەر بويىنشا, 10 ادام قايتىس بولعان, اۋىر جاراقاتتار العان, جارالانعاندار اراسىندا پوليتسيا قىزمەتكەرلەرى بار. پوليتسيا قىزمەتكەرلەرى وزدەرىنىڭ قىزمەتتىك مىندەتتەرىن بۇلجىتپاي ورىندادى جانە زاڭ بويىنشا ءوز وكىلەتتىكتەرى اياسىندا ارەكەت جاسادى. قايتىس بولعاندار مەن زارداپ شەككەندەردىڭ ارقايسىسىنىڭ وتباسى, جاقىن تۋىستارى بار. مەن ولاردىڭ قايعىلارىنا ورتاقتاسىپ, كوڭىل ايتامىن. قايتىس بولعاندار مەن زارداپ شەككەندەردىڭ وتباسىلارىنا كومەك كورسەتىلەتىن بولادى. جاپپاي تارتىپسىزدىك فاكتىلەرى بويىنشا قىلمىستىق ءىس قوزعالدى. مەنىڭ تاپسىرمام بويىنشا ىشكى ىستەر ءمينيسترى باستاعان جەدەل تەرگەۋ توبى قۇرىلدى. ول كوميسسيا جاپپاي تارتىپسىزدىكتى ۇيىمداستىرۋشىلاردى تابۋ جانە جازاعا تارتۋ, قالاداعى قوعامدىق قاۋىپسىزدىكتى قالپىنا كەلتىرۋ جونىندەگى بارلىق قاجەتتى شارانى قابىلدايدى. قازىرگى ۋاقىتتا جاعداي قۇقىق قورعاۋ ورگاندارىنىڭ باقىلاۋىندا. كىنالى ادامدار زاڭ بويىنشا جازاعا تارتىلاتىن بولادى. وسى ورايدا, مۇنايشىلاردىڭ ەڭبەك داۋىن وزدەرىنىڭ قىلمىستىق نيەتتەرى ءۇشىن وسى جاعدايدى پايدالانىپ قالعىسى كەلگەن بۇزاقىلاردىڭ ارەكەتىمەن شاتاستىرۋعا بولمايدى. ءبىز بۇل ىسپەن كىم اينالىسقانىن, قايدان قارجىلاندىرىلعانىن اشاتىن بولامىز. وسى جىلدار ىشىندە جاڭاوزەن حالقىنىڭ الەۋمەتتىك جاعدايىن شەشۋ ءۇشىن كوپتەگەن شارالار اتقارىلدى. جالاقى كولەمى جوعارىلادى. ءار ەلدە شاشىراپ جۇرگەن وتانداستارىمىزدى جاڭاوزەنگە شاقىردىق. ولارعا بارلىق جاعدايدى جاسادىق. وسى ءۇشىن ولار مەملەكەتكە ريزا بولۋى ءتيىس. جاڭاوزەندەگى ەڭبەك داۋىن شەشىپ, ورىن العان جانە قابىلداناتىن شارالاردى تۇرعىندارعا ءتۇسىندىرۋ ءۇشىن ۇكىمەتتىڭ, «قازمۇنايگازدىڭ» ارنايى كوميسسياسى بارادى. باس پروكۋراتۋراعا وزگە قۇقىق قورعاۋ ورگاندارىمەن بىرلەسىپ ورىن العان جاعدايدى ءجىتى تەكسەرۋدى, اقپاراتتىڭ بارىنشا اشىقتىعىن قامتاماسىز ەتۋدى, ناتيجەسى تۋرالى حالىققا حابارلاۋدى, قاجەت بولعان جاعدايدا تاۋەلسىز ساراپشىلاردى تارتۋدى تاپسىرامىن. ەسكەرەتىن ءجايت, وسىنداي وقيعالار, جاپپاي تارتىپسىزدىكتەر بۇگىندە دۇنيە ءجۇزى ەلدەرىندە دە بولىپ تۇرادى. سوندىقتان وعان جاhاندىق قارجى-ەكونوميكالىق داعدارىستىڭ اسەرىنەن بولعان الەمدىك رەتسەسسيانىڭ سالدارى دەپ قاراعان ءجون. ءبىز وسى جىلداردىڭ ىشىندە ەلىمىزدەگى تۇراقتىلىقتى, بەيبىتشىلىك پەن كەلىسىمدى نىعايتتىق. ءبىز وسى بەرەكەلى بىرلىگىمىز ارقىلى بيىك بەلەستەردى باعىندىردىق. ءبىز قازاقستاندا قالىپتاسقان بەيبىتشىلىك پەن تىنىشتىقتى بۇزۋعا, ءبىزدىڭ تاۋەلسىزدىگىمىزدىڭ جەتىستىكتەرىن تارك ەتۋگە ەشقانداي جاعدايدا دا جول بەرمەيمىز. سوندىقتان جۇرتشىلىقتى الاڭداتارلىقتاي ەشقانداي سەبەپ جوق. جاعداي تولىعىمەن باقىلاۋدا. زاڭنىڭ اتى – زاڭ. زاڭنىڭ تالاپتارى بارلىعىمىز ءۇشىن بىردەي. زاڭ قالانىڭ قاۋىپسىزدىگى مەن تۇرعىنداردىڭ تىنىشتىعىن قامتاماسىز ەتۋ ءۇشىن قولدانىلاتىن بولادى. مەملەكەت ءبىزدىڭ ازاماتتارىمىزدىڭ تىنىشتىعى مەن قاۋىپسىزدىگىن بۇزۋشىلىقتىڭ كەز كەلگەن ارەكەتىنە قاتاڭ توسقاۋىل قويادى. بارشا قازاقستاندىقتاردى ءبىزدىڭ ەلىمىز ءۇشىن جات ارەكەتتى ايىپتاۋعا, تىنىشتىق ساقتاۋعا شاقىرامىن. جاڭاوزەندىكتەردى اقىلعا جانە بايسالدىلىققا شاقىرامىن. ءبىز بۇل ماسەلەلەردىڭ بارلىعىن انىقتايتىن بولامىز. جاڭاوزەن قالاسىنىڭ ەكونوميكاسىن قالپىنا كەلتىرۋ, ورتەنگەن نىسانداردى قالپىنا كەلتىرۋ ءۇشىن جانە ەڭ باستىسى, ازاماتتاردىڭ قاۋىپسىزدىگىن قامتاماسىز ەتۋ ءۇشىن مەن كونستيتۋتسياعا جانە توتەنشە جاعداي تۋرالى زاڭعا سايكەس جاڭاوزەن قالاسىندا توتەنشە جاعدايدى ەنگىزۋ تۋرالى جارلىق شىعارامىن. جارلىق بۇگىننەن باستاپ 20 كۇن كۇشىندە بولادى. ەگەر ءبىز وعان دەيىن بارلىق ماسەلەنى انىقتاساق, تىنىشتىق ورناسا, ول كەز كەلگەن ۋاقىتتا كۇشىن جويادى.
