وقۋ-جاتتىعۋ بارىسىندا قازاقستان مەن وزبەكستان ارنايى وپەراتسيالار كۇشتەرىنىڭ بولىمشەلەرى تۇنگى ۋاقىتتاعى بارلاۋ, جاۋىنگەرلىك ءىس-قيمىلداردى جۇرگىزۋ بويىنشا تاپسىرمالاردى ورىندادى.
ءىس-شارانىڭ شارتتى جوسپارى بويىنشا ۇشقىشسىز ۇشۋ اپپاراتتارى 2500 مەتر بيىكتىكتەن اۋە بارلاۋىن جۇرگىزۋى كەزىندە سۋ-30 سم ۇشاعى جويعان زاڭسىز قارۋلى قۇرىلىمنىڭ جان ساقتاپ ۇلگەرگەن توبى انىقتالدى. بۇل دابىلدان سوڭ جەدەل تۇردە قارسىلاستىڭ قوزعالۋ باعىتى بويىنشا 2000 مەتر بيىكتىكتەن دەسانت ءتۇسىرىلىپ, مايداندىق اۆياتسيانىڭ اتقىلاۋىن باعىتتاپ وتىردى. اتالعان زاڭسىز قۇرىلىم ەلدىمەكەن اۋماعىندا وقشاۋلانىپ, شابۋىلداۋ جاساقتارىمەن ءبىر ۋاقىتتا ۇشقىشسىز ۇشۋ اپپاراتتارى جانە جەرۇستى ەلەكتروندىق-وپتيكالىق بارلاۋ قۇرالدارى قولدانىلدى.
– قازاقستان مەن وزبەكستان قارۋلى كۇشتەرى ارنايى وپەراتسيالار كۇشتەرىنىڭ بولىمشەلەرىنە قويىلعان تاپسىرمالار ءساتتى ورىندالدى, بىرلەسكەن وقۋ-جاتتىعۋدىڭ ءبىرىنشى كەزەڭىنىڭ ماقساتتارىنا قول جەتكىزىلدى. وقۋ-جاتتىعۋدىڭ ەكىنشى كەزەڭىنىڭ وتكىزىلۋى وزبەكستان رەسپۋبليكاسىنىڭ «فوريش» وقۋ-جاتتىعۋ ورتالىعىنىڭ بازاسىندا جوسپارلانىپ وتىر. ساپار بارىسىندا ءبىز ەلباسى – جوعارعى باس قولباسشى قويعان تاپسىرمالار شەڭبەرىندە كوپتەگەن ماسەلەلەردى شەشتىك دەپ ايتقىم كەلەدى. ءبىز جەدەل جاۋىنگەرلىك دايارلىق جانە كادرلاردى دايارلاۋ ماسەلەلەرىن شەشۋدە تولىققاندى ۇعىنۋ مەن ۇيلەسىمدىلىككە قول جەتكىزدىك, – دەدى قازاقستاننىڭ قورعانىس ءمينيسترى س.جاسۇزاقوۆ.
ءوز كەزەگىندە, وزبەكستان اسكەري ۆەدومستۆوسىنىڭ باسشىسى, گەنەرال-مايور ا.ازيزوۆ بىرلەسكەن جاتتىعۋلاردىڭ, كەزدەسۋلەردىڭ ءجيى وتكىزىلۋى ەكى ارميانىڭ ءوزارا قارىم-قاتىناستارىنا جوعارى سەرپىلىس بەرەتىنىن اتاپ ءوتتى.
– بىرلەسكەن وقۋ-جاتتىعۋلار تۇنگى جاعدايلاردا جاۋىنگەرلىك اۆياتسيانى اناعۇرلىم زاماناۋي تەحنيكانى قولدانۋدا ارنايى بولىمشەلەرىمىزدىڭ تولىق ۇيلەسىمدىلىگى مەن ءوزارا تۇسىنىستىگىن كورسەتتى. مەنىڭ ويىمشا, وقۋ-جاتتىعۋ ءساتتى ءوتتى دەپ باعالاۋعا بولادى, – دەدى وزبەكستاننىڭ قورعانىس ءمينيسترى.
سەرىك ابدىبەك,
«ەگەمەن قازاقستان»
