وسى ورايدا كوپتەن ەل اۋزىندا, قاعاز جۇزىندە, اقپارات ايدىنىندا جۇرگەن كەندىرلى شىعاناعى الدىمەن اۋىزعا ىلىگەدى. جاڭاوزەن قالاسىنان 70 شاقىرىم قاشىقتىقتاعى شالعاي شەتتە قولعا الىنعان, كاسپي تەڭىزىنىڭ قازاقستاندىق بولىگىندە الەمدىك دەڭگەيدەگى العاشقى كۋرورتتىڭ قۇرىلىسىن سالۋ ەل ۇكىمەتىنىڭ 2014 جىلعى 19 مامىرداعى № 508 قاۋلىسىمەن بەكىتىلگەن جانە قازاقستاننىڭ تۋريستىك سالاسىن 2020 جىلعا دەيىنگى دامىتۋ تۇجىرىمداماسىندا بەلگىلەنگەن باسىم جوبالاردىڭ ءبىرى بولىپ تابىلاتىن جوبانىڭ جۇزەگە اسىرىلۋىندا اسىعىستىق جوق.
جىل سايىن «وزەنمۇنايگاز» اق-قا قاراستى دەمالىس بازاسى دەڭگەيىندە قىزمەت ەتىپ, مۇنايشىلاردى جانە از-ماز قوناقتاردى قابىلداپ كەلە جاتقان شىعاناققا قاتىستى جوبانىڭ مەجەلەنگەن شىڭىنا شارىقتاي شىعىپ, تەڭىز جاعاسىنداعى ايتۋلى كۋرورتتى ايماق رەتىندە جارقىراي كوز تارتىپ, الىس-جاقىن ەلدەردىڭ تۋريستەرىن شاقىرۋىنا قاشان قول جەتكىزەمىز؟
جوبانى جۇزەگە اسىرۋ اياسىندا, ياعني كەندىرلى كۋرورتىن دامىتۋ جۇيەلىك جوسپارىنا سايكەس, سىيىمدىلىعى 60 مىڭ توسەك-ورىن, ونىڭ ىشىندە 40 مىڭ ورىن تۋريستەرگە جانە 20 مىڭ ورىن قىزمەتكەرلەر مەن ولاردىڭ وتباسىلارىنا ارنالعان 22 قوناق ءۇي, 16 400 رەزيدەنتسيا سالۋ كوزدەلگەن. سونداي-اق كەلۋشىلەرگە قىزمەت كورسەتۋ ءۇشىن بولشەك ساۋدا ورتالىقتارى, اشىق اسپان استىنداعى جانە جابىق جەرلەردەگى سپورتتىق جارىستار ءۇشىن عيماراتتار, ءۇش گولف الاڭى, ياحتالىق ايلاق جانە جەرگىلىكتى حالىق ءۇشىن قوعامدىق ماقساتتاعى ءارتۇرلى عيماراتتار, وزگە دە كوپتەگەن عيماراتتاردىڭ قۇرىلىسىن سالۋ قاراستىرىلعان. جالپى قۇنى شامامەن 3,3 ملرد اقش دوللارىن قۇرايتىن جوبادا 2020 جىلعا دەيىنگى ەسەپتەلگەن ينۆەستيتسيا كولەمى 1,96 ملرد اقش دوللارىن قۇرايدى.
قازىرگى تاڭدا كەندىرلى كۋرورتتى ايماعىن جۇزەگە اسىرۋ ءۇشىن تولىق ينفراقۇرىلىمعا قول جەتكىزۋ, اۋەجاي قۇرىلىسىن سالۋ جانە ايماققا گاز جەتكىزۋ ماسەلەلەرى كۇن تارتىبىندە تۇر. الدىمەن اۋقىمدى جوبانى قولعا الاتىن سەنىمدى ينۆەستور تابۋ وزەكتى. بۇل تاۋەكەلگە, ياعني كۋرورتتى دامىتۋعا گەرمانيالىق ChironGmbH كومپانياسى (نەگىزگى ينۆەستورلار – Analoga جانە CESAInvest) قىزىعۋشىلىق بىلدىرگەن. «كەندىرلى» كۋرورتتى ايماعى قۇرىلىسىن سالۋعا قاتىستى قازاقستان ۇكىمەتى مەن گەرمانيا اراسىنداعى كەلىسىمنىڭ جوباسى ماڭعىستاۋ وبلىسى اكىمدىگىنىڭ ءتيىستى مەملەكەتتىك ورگاندارىمەن قاراستىرىلىپ, ۇسىنىستار مەن ەسكەرتۋلەر ينۆەستيتسيالار جانە دامۋ مينيسترلىگىنە جولدانعان.
نەمىس كومپانياسى كەندىرلى شىعاناعىندا 2700 گەكتارعا جاقىن القاپتا جايلى قوناقۇي كەشەندەرىن, ياحتاعا ارنالعان ايلاقتار, بولشەك ساۋدا دۇكەندەرى, تۇرعىن ۇيلەر مەن كەڭسەلەر جانە باسقا دا كۋرورتتىق قالانىڭ ءومىرى ءۇشىن قاجەتتى ينفراقۇرىلىم ەنگىزىلەتىن تۋريستىك كۋرورتتىق قالا اشۋعا نيەت بىلدىرۋدە. جوبانىڭ ءبىرىنشى كەزەڭىن ىسكە اسىرۋدا ءۇش قوناقۇي, ونىڭ ىشىندە بىرەۋى بەس جۇلدىزدان كەم ەمەس دارەجەدەگى قوناقۇي-كازينو, قاجەتتى ينجەنەرلىك-كولىك ينفراقۇرىلىمى, ودان كەيىنگى جىلدارى ءارى قاراي كەڭەيتۋمەن تۇرعىن ۇيلەر كەشەنىن, تۇرمىس قىزمەتىن كورسەتۋ نىساندارىن سالۋ كىرگەن.
ينۆەستورلاردى تارتۋ ءۇشىن قولايلى جاعدايلار جاساۋ ماقساتىندا «كەندىرلى» كۋرورتىنىڭ سىرتقى ينجەنەرلىك ينفراقۇرىلىمى نىساندارىن رەسپۋبليكالىق بيۋدجەت ەسەبىنەن سالۋ جوسپارلانعان. ونىڭ ىشىندە «وكارەم-بەينەۋ» گاز قۇبىرى تارتىلدى, «وزەنمۇنايگاز» اق كەندىرلىدە سۋ تۇششىتۋ زاۋىتى قۇرىلىسىن سالۋدى جۇزەگە اسىرۋ بويىنشا جۇمىستار جۇرگىزۋدە.
كەندىرلى اۋەجايى قۇرىلىسىنىڭ تەحنيكالىق-ەكونوميكالىق نەگىزدەمەسىن تۇزەتۋ بويىنشا جۇمىس جۇرگىزىلىپ, مەملەكەتتىك ساراپتاما مەن ەكونوميكالىق ساراپتامانىڭ قورىتىندىسى الىندى. وبلىس اكىمدىگى «ماڭعىستاۋ وبلىسىنىڭ كەندىرلى كۋرورتتىق ايماعىنىڭ اۋماعىندا ۇشۋ-قونۋ الاڭىمەن كەندىرلى اۋەجايىنىڭ قۇرىلىسىن سالۋ» جوباسىن كونتسەسسيالىق جوبا رەتىندە جۇزەگە اسىرۋ تۋرالى شەشىم قابىلدادى.
دەمەك, كۋرورتتى دامىتۋ باعىتىنداعى جۇمىستار ازىرگە تەك جوبا كۇيىندە, ۇسىنىستار, شەشىمدەر رەتىندە قۇجاتتاردا عانا ء«ومىر سۇرۋدە». كەندىرلىدەگى كوپ ءىستىڭ كەشەۋىلدەۋىنە نە كەدەرگى – قاراجات پا, ايدالاعا اپارىلار ينفراقۇرىلىم قيىندىعى ما, الدە باردى ءبىلىپ, جوقتى ءتۇسىنىپ, ءتيىمدى كەلىسىمگە كەلەتىن ينۆەستور تابۋ ما؟ ءالى قانشا ۋاقىتقا دەيىن كوكەيدەگى ادەمى كۋرورت پەن قاعازداعى جىلتىراق ەسەپتەرگە تەلمىرەتىنىمىز بەلگىسىز...
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
