«ۇلتتىق بىرىڭعاي تەستىلەۋدىڭ ورتاشا بالى بويىنشا وبلىسىمىز ۇزدىك 5 ءوڭىردىڭ قاتارىندا. ال 5 جىل بۇرىن 16-ورىندا بولاتىن. رەسەيدىڭ جەتەكشى تەحنيكالىق ۋنيۆەرسيتەتتەرىمەن تىعىز بايلانىس ورناتۋدىڭ ارقاسىندا بۇگىندە 452 مەكتەپ ءبىتىرۋشىمىز ماسكەۋ جانە سانكت-پەتەربۋرگ قالالارىنىڭ ۇزدىك جوعارى وقۋ ورىندارىندا ءبىلىم الىپ جاتىر. بيىل ستۋدەنتتەردىڭ العاشقى لەگى ديپلوم الادى, ولاردىڭ جۇمىسقا ورنالاسۋ ماسەلەسىن ءبىز الدىن-الا دايىندادىق», دەدى قىرىمبەك ەلەۋ ۇلى.
پارلامەنتارالىق اسسامبلەيا جانىنداعى ۋنيۆەرسيتەت قۇرامىندا 3 ينستيتۋت, 4 فاكۋلتەت پەن 17 كافەدرا بار. ۋنيۆەرسيتەت رەكتورى ەرلان ىسقاقوۆ وقۋ ورنىنىڭ نەگىزگى ماماندىقتارى قاتارىندا بيزنەس-ينفورماتيكا, زاڭگەرلىك قىزمەت كورسەتۋ, تۋريزم, ەكونوميكا, مەنەدجمەنت, كەدەن ءىسى, جارناما جانە جۇرتشىلىقپەن بايلانىس, كونفليكتولوگيا, ديزاين, قولدانبالى كوركەمونەر جانە ۇلتتىق كاسىپشىلىك, ساۋدا ءىسى, پسيحولوگيا بار ەكەندىگىن ايتتى.
«قىزىلوردا وبلىسى العاشقىلاردىڭ ءبىرى بولىپ كادرلاردى دايىنداۋ سالاسىندا ارىپتەستىك ورناتۋ بويىنشا ۇسىنىسىمىزعا كەلىسكەنىنە وتە قۋانىشتىمىز. قازىرگى تاڭدا مامانداردى دايارلاۋ ماسەلەسىندە جەكە كوزقاراس ءتيىمدى. بيىل ۋنيۆەرسيتەتىمىزگە قوسىلعان جاڭا باعىت – بيزنەس-ينفورماتيكا. بۇل ماماندىق اياسىندا ستۋدەنتتەر تسيفرلى ەكونوميكا دامىعان زاماندا بلوكچەين مەن كريپتوۆاليۋتا سالاسىن زەرتتەيتىن بولادى», دەدى ول.
سونىمەن قاتار ۋنيۆەرسيتەت وكىلدەرى قىزىلوردالىق مۇعالىمدەر مەن عىلىمي قىزمەتكەرلەردى نوبەل سىيلىعىنىڭ لاۋرەاتى جورەس يۆانوۆيچ الفەروۆ باسقاراتىن ەۋرازيالىق عىلىمي فورۋمعا قاتىسۋعا شاقىردى. فورۋم جىل سايىن كۇزدە تمد ەلدەرىنىڭ قاتىسۋىمەن وتەدى.
مەموراندۋم اياسىندا تاراپتار بىرلەسكەن ءىس-شارالار مەن جوبالاردى قولعا الماق. ۋنيۆەرسيتەت وقۋعا ءتۇسۋ سىناقتارىنان ءساتتى وتكەن قىزىلوردالىق تۇلەكتەرگە جىل سايىن 10 گرانت بولەتىن بولادى.
قىزىلوردا تۇلەكتەرىنە 2014 جىلدان باستاپ ماسكەۋ بولات جانە قورىتپالار ينستيتۋتى, سانكت-پەتەربۋرگ وسىمدىك پوليمەرلەرى مەملەكەتتىك تەحنولوگيالىق ۋنيۆەرسيتەتى, ك.ا.تيميريازەۆ اتىنداعى رەسەي مەملەكەتتىك اگرارلىق ۋنيۆەرسيتەتى مەن ي.م.گۋبكين اتىنداعى رەسەي مەملەكەتتىك مۇناي جانە گاز ۋنيۆەرسيتەتى وڭىرگە قاجەتتى ماماندىقتار بويىنشا وقىتۋ ءۇشىن گرانتتاردى ءبولىپ كەلەدى. سونىمەن قاتار بيىلدان باستاپ قىزىلوردالىق جاستار ءۇشىن «كيبەرقاۋىپسىزدىك» جانە «ماتەماتيكالىق پروتسەستەردى مودەلدەۋ» ماماندىقتارى بويىنشا م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ ماگيستراتۋراسىنا 20 گرانت بولىنەتىن بولدى.
جىل سايىن وبلىس اكىمىنىڭ گرانتتارى ەسەبىنەن اۋىلدى جەردەگى از قامتىلعان وتباسىلاردان شىققان 100-گە جۋىق جاس ءبىلىم الىپ جاتىر. قازىرگى تاڭدا گرانت يەلەرىنىڭ سانى 700-گە جەتتى. بيىل گرانت سانىن 200-گە جەتكىزىپ, ونىڭ 70 پروتسەنتىن اقپاراتتىق تەحنولوگيالار سالاسىنداعى ماماندىقتارعا باعىتتاۋ جوسپارلانعان.
قىزىلوردا وبلىسىنىڭ اكىمدىگى وڭىرگە قات ماماندىقتار بويىنشا ماسەلەنى وسىلايشا شەشىپ جاتىر.
باقتيار تايجان,
«ەگەمەن قازاقستان»
قىزىلوردا وبلىسى
