حالىقتىڭ ءومىر ءسۇرۋ جاسىنىڭ ۇزارۋىنا جانە جاڭا تەحنولوگيالاردىڭ دامۋىنا بايلانىستى مەديتسينالىق قىزمەتتەردى تۇتىنۋ كولەمى جىلدان-جىلعا ارتىپ كەلەدى. بۇل رەتتە مەملەكەت باسشىسى نۇرسۇلتان نازارباەۆ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا بيزنەستى قايتا رەتتەۋ بويىنشا جۇيەلى شارالار لەگىن قابىلداۋدى تاپسىرعانى بەلگىلى. ونىڭ ىشىندە جەكە قىزمەت كورسەتۋ سەكتورىن, سونداي-اق مەديتسينا سالاسىن دا دامىتۋ كوزدەلگەن بولاتىن.
بىلتىر ەل ۇكىمەتى دەنساۋلىق ساقتاۋ جۇيەسىن قايتا رەتتەۋ بويىنشا اۋقىمدى جۇمىس اتقاردى. بيزنەسكە كەدەرگىلەردى قىسقارتۋ ناتيجەسىندە جەكە ۇسىنۋشىلاردان مەديتسينالىق قىزمەتتەردى ساتىپ الۋ ۇلەسى 2017 جىلعى 8%-تەن 2018 جىلى 13 %-كە دەيىن ارتتى. وتكەن جىلى دەنساۋلىق ساقتاۋ سالاسىنا سالىنعان ينۆەستيتسيا كولەمى 50%-كە كوبەيىپ, 91,4 ملرد تەڭگەنى قۇرادى. جەكە ينۆەستيتسيا ۇلەسى 2016 جىلعى دەڭگەيگە شاققاندا 90%-كە (23,3 ملرد تەڭگەدەن 44,2 ملرد تەڭگەگە دەيىن) دەيىن ارتتى.
الماتىدا ىسكە قوسىلعان وڭتۇستىككورەيالىق امبۋلاتورلىق كلينيكا ورتالىق ازيا اۋماعىنداعى شەتەلدىك ينۆەستيتسيا ەسەبىنەن سالىنعان العاشقى مەديتسينالىق مەكەمە. ەمحانادا ءتيىمدى وتا جاساۋ جۇيەلەرى مەن كورەيادان جەتكىزىلگەن وزىق دياگنوستيكالىق تەحنولوگيالار بار. سونىمەن قاتار سينگاپۋر تەحنولوگيالارى دا پايدالانىلادى.
وبىر سكرينينگىن جۇزەگە اسىرۋ ءۇشىن سەۋل ۇلتتىق ۋنيۆەرسيتەتى جانىنداعى BIOiNFRA عىلىمي بيولوگيالىق كومپانياسى وبىردى انىقتاۋ ۇدەرىسىنە تولىق تەحنيكالىق قولداۋدى قامتاماسىز ەتپەك. ال سينگاپۋرلىق كومپانيا (POCT MDx) One Biomed مولەكۋلالىق دياگنوستيكاسىنا نەگىزدەلگەن گەنەتيكالىق جانە جۇقپالى اۋرۋلارعا زەرتتەۋلەر جۇرگىزۋ ءۇشىن تەحنيكالىق سەرىكتەس بولادى. سونىمەن قاتار كلينيكا كورەياداعى جەتەكشى زەرتحانالاردىڭ ءبىرى Seegene Medical Foundation ينۆەستيتسيالارىن تارتىپ, قازاقستاندا ورتالىقتاندىرىلعان زەرتحانالىق جەلىنى قۇرۋ ىسىمەن اينالىسادى. MPKQAZ قازاقستاندا وپەراتسيالىق مەنەدجمەنتتى كورەيالىق مەديتسينا ماماندارى جۇرگىزەتىن مەديتسينالىق كومپانيالار توبىن قۇرۋعا نيەتتى. ەمحانا پاتسيەنتتەرگە جۇيەلى جانە قولايلى قىزمەت كورسەتۋدى قامتاماسىز ەتىپ قانا قويماي, كورەيالىق دارىگەرلەردىڭ كومەگىمەن جان-جاقتى جۇيەلى ساپالىق باقىلاۋ جۇرگىزەدى.
MPKQAZ باس ديرەكتورى, پروفەسسور عالىمجان توعىزباەۆ بۇل كلينيكا قازاقستان مەن كورەيانىڭ ىنتىماقتاستىعىنىڭ, اتاپ ايتقاندا, «blood mix» جارقىن مىسالى بولىپ وتىرعانىن جەتكىزدى. 5 جىلدان سوڭ Medical Partners Korea Qazaqstan ەمحاناسى قازاقستانداعى العاشقى شەتەلدىك مەديتسينالىق كلينيكا رەتىندە كورەيا قور نارىعى قاتىسۋشىلارىنىڭ قاۋىمداستىعىنا (KOSDAQ) كىرۋدى جوسپارلاپ وتىر.
«MPKQAZ كورەيانىڭ وزىق مەديتسينالىق تەحنولوگيالارىن جانە قىزمەت كورسەتۋ سالاسىنداعى باي تاجىريبەسىن قولدانۋ ارقىلى پاتسيەنتتەرگە قىزمەت كورسەتۋ جۇيەسى مەن كوپ ۇلتتىق مەديتسينالىق وپەراتسيا جۇيەسىن قۇرۋعا ءازىر», دەيدى مەديتسينالىق ديرەكتور, كارديولوگ-دارىگەر حيسۋك مين.
«ەگەمەن-اقپارات»
