قازاقستاندا سوڭعى كەزدەرى كوشەدە بەتتەرىن پارانجىمەن جاۋىپ, قارا كيىنىپ جۇرەتىن نەمەسە مەكتەپ جاسىنداعى قىز بالالارعا ورامال تاقتىراتىن كورىنىستەر ورىن الىپ وتىرعانى راس. ەلىمىزدە ءدىندى وقىپ, ۇيرەنۋگە, ۇستانۋعا ەشقانداي تىيىم سالىنباعان. «اركىم اتا-باباسىنان قالعان ءدىندى قۇرمەتتەۋگە قۇقىلى. دەسەك تە, زايىرلى دامۋ باعىتىن ۇستانعان قوعامدا ءومىر ءسۇرىپ وتىرعاندىقتان ءتۇرلى ۇلتتار مەن ۇلىستاردىڭ كوزقاراسىن, قازاق حالقىنىڭ تاريحي ەرەكشەلىگىن دە ەسكەرگەن ءجون», دەيدى سەمەي قالاسى اكىمىنىڭ ورىنباسارى نادەجدا شاروۆا.
قالا اكىمى ورىنباسارىنىڭ ايتۋىنشا, 2009 جىلدىڭ 1 قىركۇيەگىنەن باستاپ مەكتەپتەردە ء«دىنتانۋ» نەگىزدەرى ءپانى كىرگىزىلگەن. ال ء«دىنتانۋ نەگىزدەرى جانە زايىرلىلىق» كۋرسى قازاقستاندا جانە الەمدە ورىن الىپ وتىرعان جاعدايلارعا بايلانىستى ەندى قولعا الىنىپ وتىر. بۇل ءالى كامەلەتكە تولماعان, وڭ مەن سولىن ايىرا المايتىن مەكتەپ جاسىنداعى وقۋشىلاردىڭ ەكسترەميزم مەن تەرروريزم باعىتىنا كەتىپ قالماۋى ءۇشىن بەرىلەتىن ساپالى ءبىلىم سانالادى.
سەمەي قالالىق ءبىلىم ءبولىمىنىڭ باسشىسى ناتاليا فەسەنكونىڭ ايتۋىنشا, 8- سىنىپ وقۋشىلارىنا جاڭادان ەنگىزىلەتىن كۋرستىڭ وقۋلىقتارىن وبلىستىق ءدىن ىستەرى باسقارماسى ۇسىنعان كىتاپتار تولىقتىراتىن بولماق. ساباق ۇستىندە وسى باسقارما بەكىتكەن كىتاپتار عانا پايدالانىلاتىن بولادى.
– ساباق بارىسىندا ەلىمىزدەگى بارلىق ءدىن تاريحى تولىق وقىتىلادى, – دەدى ن.فەسەنكو. تاقىرىپتار مۋلتيمەديالىق كابينەتتەردە وتكىزىلەدى. مۇعالىمدەر ءدىني تەررورلىق ۇيىمداردىڭ كىمدەردەن تۇراتىندىعىن, ولاردىڭ قاۋىپتىلىگىن وقۋشىلارعا باعىت-باعدار بەرۋ ارقىلى ءتۇسىندىرۋ كەرەك. وقۋشىلارعا تاپسىرما بەرىلەدى. ولار ءوز بەتتەرىمەن ۇيرەنىپ, ىزدەنىپ, باق ارقىلى نەمەسە وقۋلىقتار ارقىلى كوزقاراستارىن كەڭەيتۋلەرى قاجەت. وسىلايشا ولار وزدەرىن جانە تۋىستارى مەن جولداستارىن تەرىس ءدىني اعىمداردان ساقتانۋدىڭ جولدارىن ۇيرەنەدى. جاڭا كۋرس مىنە, وسى ءۇشىن اسا قاجەت.
راۋشان نۇعمانبەك,
جۋرناليست
سەمەي
