– مۋزەيدە كسرو كەزىندە يادرولىق جارىلىستار بولعان, سىناقتار جۇرگەن «دەگەلەڭ», «بالاپان», «وپىتنوە پولە» سياقتى الاڭداردان كورىنىستەر تولىق قامتىلعان, – دەدى كۋرچاتوۆ قالاسىنىڭ اكىمى الماس وڭداقانوۆ, – مۋزەي قورىندا 100-دەن استام ءتۇرلى ەستەلىكتەر, ەكسپوناتتار, كارتالار, فوتو جانە بەينەماتەريالدار بار. سىناق الاڭدارىنان تىكەلەي اكەلىنگەن دەرەكتى زاتتاردىڭ بارلىعى دا وسىندا.
«ۇلتتىق قاسىرەتتەن – ۇلتتىق ماقتانىشقا دەيىن» دەپ اتالاتىن ەكسپوزيتسيا زالىندا پرەزيدەنت ن.نازارباەۆتىڭ جارلىعىمەن قۇرىلعان ۇلتتىق يادرولىق ورتالىقتىڭ تاريحى كەڭىنەن قامتىلىپتى. توكاماك كتم, كير «بايكال-1», پيلوتسىز باسقارۋداعى جابدىق, قازىرگى تاڭداعى زاماناۋي ولشەۋىش-ەسەپتەگىش جانە كاسىپورىننىڭ ماراپاتتارى مەن ناگرادالارىن دا وسى ارادان كورە الاسىز.
سەمەيدەن ارنايى ات ارىتىپ جەتكەن قوناقتار «يادرولىق تەحنولوگيالار پاركى» اق-داعى «ەلۆ-4» اۋماعىنا دا باردى. «ەلۆ-4» دەگەنىمىز بۇل ءتۇرلى ماتەريالداردى ارنايى جابدىقتا رادياتسيالىق تەكسەرۋدەن, باعامداۋدان وتكىزۋ جانە مولشەرىن انىقتاۋ قۇرىلعىسى. قازىرگى ۋاقىتتا اتالمىش ەلەكتروندى قوندىرعىدا پوليمەرلىك بۇيىمداردى تىگۋ, مەديتسينالىق زاتتاردى زارارسىزداندىرۋ, رەزەڭكەلەردى قىزدىرىپ وڭدەۋ جۇمىستارى جۇرەدى.
كۋرچاتوۆ قالاسىنىڭ اكىمى الماس وڭداقانوۆتىڭ ايتۋىنشا, كيەلى جەرلەردى ارالاعان كوپشىلىك ايگىلى عالىم ي.ۆ.كۋرچاتوۆتىڭ ەسكەرتكىشىنە بارىپ, عالىم قىزمەت ەتكەن جۇمىس كابينەتىمەن تانىسىپ قايتتى. وسىنىڭ ءوزى تاريحتان ۇلكەن اقپارات بەرەدى, دەدى ول. ال سەمەي يادرولىق سىناق پوليگونى مەن كۋرچاتوۆ قالاسىنىڭ تاريحى تۋرالى كەرەمەت ءفيلمدى كەلۋشىلەر مادەنيەت ۇيىنەن تاماشالادى.
باعدارلاما سوڭىندا ەرەسەكتەرمەن بىرگە كەلگەن سەمەي قالاسىنىڭ وقۋشىلارى «الەم بالالارى اتوم بومباسىنا قارسى!» اتتى ينتەراكتيۆتى ويىنعا قاتىستى. ويىن بارىسىندا ولار بەيبىت اتوم سالاسىن زەرتتەۋدەگى دۇنيە ءجۇزى عالىمدارىنىڭ جۇمىستارىمەن تانىستى. تامىز ايىنىڭ سوڭىنا دەيىن الماتى قالاسى جانە شىعىس قازاقستان وبلىسىنىڭ بارلىق اۋداندارىنان ءارتۇرلى جاستاعى بالالار سەمەي مەن كۋرچاتوۆ قالالارىنا وسى جوباعا وراي ارنايى ساپارلاپ قايتپاقشى.
راۋشان نۇعمانبەك,
جۋرناليست
كۋرچاتوۆ – سەمەي
