فەستيۆال اياسىندا استانا قالاسىنىڭ 20 جىلدىق مەرەكەسىنە ارنالعان بۇقارالىق-مادەني ءىس-شارالار اشىق اسپان استىندا ەرەكشە كوتەرىڭكى كوڭىل كۇيدە ءوتتى. اۆتوشەرۋ فلەشموبى, شاحمات بويىنشا بليتس-تۋرنير, كۇي-شەرۋ, جاستار اراسىندا گيتارادا تانىمال اندەردى ورىنداۋ, قولونەرشىلەر بۇيىمدارىنىڭ كورمەسى سىندى ءتۇرلى جانرداعى قىزىقتى شارالار جاستاردىڭ كوتەرىڭكى كوڭىل كۇيىمەن مەرەكە ءسانىن ونان سايىن ارتتىرا ءتۇستى.
اتالعان ءىس-شاراعا قوعامدىق دامۋ ءمينيسترى دارحان كالەتاەۆ جانە استانا قالاسى اكىمىنىڭ ورىنباسارى ەرمەك امانشاەۆ قاتىسىپ جاستاردىڭ جارقىن باستاماسىنا قولداۋ كورسەتتى. يگى ىستەن ەلىمىزدىڭ ەسترادا انشىلەرى دە سىرت قالماعان. قىدىرالى بولمانوۆ, قاراقات ءابىلدينا باستاپ, قانات ۇمبەتوۆ, اعايىندى جۇگىنىسوۆتەر قوستاعان باسقا دا انشىلەر ءان سالىپ فەستيۆال كورىگىن قىزدىردى.
«فەستيۆال وتكىزۋدەگى ماقسات – جاستاردىڭ ازاماتتىق جانە شىعارماشىلىق بەلسەندىلىگىن ارتتىرۋ بولىپ تابىلادى. 20 جىل ىشىندە ەلوردا جاستاردىڭ قالاسىنا اينالدى. بۇگىنگى ەلوردادا جاستاردىڭ قاتىسۋىمەن اسا كوپ قارجىلىق شىعىنسىز اۋقىمدى جانە جاپپاي ءىس-شارالاردى وتكىزۋ ءۇشىن بارلىق جاعدايلار مەن مۇمكىندىكتەر جاسالاعان. بۇگىنگى «جان جۇرەگىم – استانا!» جاستار شىعارماشىلىق فەستيۆالى وسىنىڭ دالەلى», دەيدى قوعامدىق دامۋ مينيسترلىگىنىڭ جاستار ساياساتى دەپارتامەنتىنىڭ باسشىسى اسحات ورالوۆ.
اتالمىش شارا رەسپۋبليكالىق جاستار ۇيىمدارىنىڭ باستاماسى بويىنشا ۇيىمداستىرىلعان. اتاپ ايتقاندا, «قازاقستان جاستار كونگرەسى», «جاسىل ەل», «جاس ۇلان», ۇيىمدارى, «قازاقستان كۆن وداعى», رمك «ۇلتتىق دەلفي كوميتەتى» قق, «قازاقستان ستۋدەنتتەرىنىڭ اليانسى» قق, سونداي-اق قازاقستان رەسپۋبليكاسى پرەزيدەنتىنىڭ «بولاشاق» حالىقارالىق ستيپەندياسى ستيپەنديانتتارىنىڭ قاۋىمداستىعى قولداۋ كورسەتكەن.
ۇلاربەك نۇرعالىم ۇلى,
«ەگەمەن قازاقستان»
