كەلەسى كەزەكتە ساياباقتا كورەي ەتنو-مادەني بىرلەستىگىنىڭ وكىلدەرى قالالىقتاردى مەرەكەلىك باعدارلامالارىنا شاقىردى. مەرەكەگە وڭىردەگى ۋسپەن, پاۆلودار اۋداندارىنداعى بىرلەستىك بولىمشەلەرى, الماتىداعى كورەيلەر ورتالىعىنان كەلگەن قۇرمەتتى قوناقتار قاتىستى.
بۇل كۇنى ساياباقتا كورەي اندەرى مەن بيلەرىنىڭ كونتسەرتتىك باعدارلاماسى كورسەتىلىپ, ەرەكشە قولونەر تۋىندىلارىنىڭ كورمەسى اشىلدى. قالا تۇرعىندارى مەن قوناقتارى كورەي حالقىنىڭ ۇلتتىق تاعامدارىنان ءدام تاتتى. بۇگىندە وڭىردە 24 ەتنومادەني بىرلەستىك قىزمەت جاسايدى. سولاردىڭ قاتارىندا «قازاقستان كورەيلەرى اسسوتسياتسياسى» قوعامدىق بىرلەستىگىنىڭ وبلىستىق فيليالى دا بار.
وبلىستىق فيليال توراعاسىنىڭ ورىنباسارى رايسا افاناسەۆا-كيمنىڭ ايتۋىنشا, ءبىزدىڭ وڭىردە قازىر 1000-عا جۋىق كورەي ءومىر سۇرۋدە. بۇگىندە قاۋىمداستىق قازاقستان-كورەيا ءبىلىم بەرۋ ورتالىعىمەن تىعىز بايلانىس ورناتقان. ورتالىق بىرلەستىك مۇشەلەرىنە كورەي تىلىندە كىتاپتار, وقۋلىقتار جولدايدى. ەلىمىزدەگى كورەيا ەلشىلىگىنىڭ مادەني ورتالىعىمەن بىرلەسە قىزمەت جاساپ كەلەدى.
رايسا كيمنىڭ ايتۋىنشا, جالپى, قازاقتار مەن كورەيلەردى جاقىنداستىراتىن ورتاق رۋحاني-مادەني بايلانىستار دا از ەمەس. مىسالى, قازاقتىڭ دومبىراسى مەن جەتىگەنىنە ۇقساس ۇلتتىق اسپاپتارى كورەي حالقىندا دا بار. كورەيلەر دە بالانىڭ تۇساۋىن ءبىر جاسقا تولعاندا كەسىپ, تۋىستاردى داستارقان باسىنا جينايدى ەكەن. كەيبىر سوزدەرىمىز دە ۇقساس. بىزدەگىدەي ۇلكەندەرگە قۇرمەت كورسەتۋ تاربيەسى قالىپتاسقان.
ال, بىرلەستىكتىڭ ءبىر ەرەكشەلىگى, ونىڭ قۇرامىندا كورەيلەرمەن قاتار, قازاق, ورىس, گرۋزين سياقتى ۇلت وكىلدەرى دە بار. ولاردى كورەي حالقىنىڭ وتكەن تاريحى, مادەنيەتى, اندەرى, بيلەرى, تاعامدارى قاتتى قىزىقتىرادى ەكەن. كورەي حالقىنىڭ جاڭا جىل مەرەكەسى-سولنالدى دا بىرگە تويلايدى. مەرەكەنى تابيعاتتىڭ جاڭارۋىمەن, كوكتەمنىڭ كەلۋىمەن بايلانىستىرادى. بالالاردىڭ اتا-انالارىن مەرەكەمەن قۇتتىقتاۋ سالتى «سەبە» دەپ اتالادى. ۇلكەندەر ۇلتتىق كيىمدەرى حانبوكتى كيىپ, ولارعا «توكتام» سالتىمەن باتا بەرەدى. كونتسەرت جۇرگىزۋشىلەرى وسى جانە تاعى باسقا ادەت-عۇرىپتار جونىندە بايانداپ, كەيبىرەۋلەرىن ساحنادا كورسەتتى.
– ەلىمىزدە تۇراتىن ءاربىر ۇلت وكىلدەرى قازاق حالقىنىڭ سالت-ءداستۇرىن ءبىلۋى ءتيىس دەپ ەسەپتەيمىن. بۇل – سىيلاستىق بەلگىسى. جەرگىلىكتى ۋنيۆەرسيتەت ستۋدەنتتەرى نارزانگۇل كاناپينا, قىمبات مۇقانوۆا مىسالى, كورەي اندەرىن ورىندايدى. وزگەگە دەگەن قۇرمەتتىڭ, ءوزارا ىنتىماقتىڭ ارقاسىندا ۇلتتار اراسىندا دوستىق قارىم-قاتىناس وسىلاي ساقتالىپ كەلەدى. استانامىز وسى باقىتتى بىرلىكتىڭ سيمۆولى, – دەيدى رايسا افاناسەۆا-كيم.
ساياباققا جينالعان جۇرتشىلىق گۇلنار اۋتالىپوۆا كوركەمدىك جەتەكشىلىك ەتەتىن «انەن» ءانسامبلى ورىنداعان كورەي ۇلتتىق بيلەرىن قىزىقتادى.
ساياباقتاعى كونتسەرتتىك باعدارلامادا ەتنومادەني بىرلەستىك قۇرامىنداعى «كىمپيتسوري» ۆوكالدىق توبى, «انيون» حورەوگرافيالىق ۇجىمى, «بي يۋنيكس» بي انسامبلدەرى تاماشا ونەر كورسەتتى.
فاريدا بىقاي,
«ەگەمەن قازاقستان»
پاۆلودار
