ەكى قاباتتى ەڭسەلى عيماراتتا ورنالاسقان جاڭا مۋزەي ەلباسى ن.ءا.نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ «تۋعان جەر» باعدارلاماسى اياسىندا اشىلىپ وتىر. مۋزەيدە ازىرگە 300-گە جۋىق جادىگەر قويىلعان. بىراق اۋىل تۇرعىندارىنىڭ ىستىق ىقىلاسىنا قاراعاندا, جادىگەر سانى ەسەلەپ ارتىپ, تۋعان جەردىڭ تاريحى تەز تۇگەندەلەتىن ءتۇرى بار سياقتى. ءتىپتى وسى مۋزەيدىڭ اشىلۋىنا دا اۋىل كاسىپكەرلەرى باقىت نەتاليەۆا, باۋىرجان ساكپيرەەۆ, سايرا ومىرباەۆا سىندى اۋىلداستار قارجىلاي ۇلەس قوسقان.
مۋزەيدە زەلەنوۆ اۋدانىنىڭ وتكەن تاريحى, دامۋ جولى, وڭىردەن شىققان تۇلعالار تۋرالى تولىققاندى مالىمەت الۋعا بولادى. عيماراتتىڭ تومەنگى قاباتىندا ورنالاسقان ءبىرىنشى زالدا – قازاقستان تاريحى, ەجەلگى زاماننان بۇگىنگى كۇنگە دەيىنگى ۇلت تاريحىنىڭ دامۋ كەزەڭدەرى كورىنىس تاپقان. ەكىنشى زال – ولكە تابيعاتىنا ارنالعان. ءۇشىنشى زال – ءوڭىردىڭ نەگىزگى شارۋاشىلىعى – ەگىنگە, استىقتى القاپ تىنىسىنا ارنالعان. ءتورتىنشى زالدا گەولوگيالىق ماتەريالدار, وڭىردە كەزدەسەتىن تابيعي جىنىس ۇلگىلەرى قويىلعان.
– مۋزەي عيماراتىنىڭ ەكىنشى قاباتىندا كورمە زالى جۇمىس ىستەيدى. مۇندا اۋدان قولونەر شەبەرلەرىنىڭ, سۋرەتشى, مۇسىنشىلەردىڭ جۇمىستارى قويىلادى. وسى جەردەگى كونفەرەنتس-زالدا ءتۇرلى تاقىرىپتاعى عىلىمي-پراكتيكالىق كونفەرەنتسيالار, سەمينار-كەڭەستەر وتكىزۋ جوسپارلانعان. ءبىز مۋزەيدى عىلىمي-شىعارماشىلىق ورتالىققا اينالدىرعىمىز كەلەدى, – دەيدى مۋزەي ديرەكتورى نۇرجان ءدۇزباتىر.
مۋزەي عيماراتىنىڭ ءبىر بۇرىشىندا اسسامبلەيا كابينەتى دە جۇمىس ىستەمەك. اۋداندا شوعىرلانعان 40-تان استام ۇلت وكىلدەرى وسى زالدا باس قوسىپ, سالت-ءداستۇر, مادەنيەت پەن ونەر, ت.ب. باعىتتا جۇمىستار جۇرگىزۋگە مۇمكىندىك الماق.
مۋزەيدىڭ العاشقى جۇمىس كۇنى مۇندا «ولكەتانۋ: وتكەننىڭ ءىزى – بۇگىنگە باعدار» اتتى عىلىمي كونفەرەنتسيا ءوتتى. بۇل جيىنعا ولكەتانۋشى ارداگەر جايساڭ اقباي, باتىس قازاقستان وبلىستىق تاريح جانە ارحەولوگيا ورتالىعىنىڭ ديرەكتورى, تاريح عىلىمدارىنىڭ دوكتورى مۇرات سىدىقوۆ, الاشتانۋشى, تاريح عىلىمدارىنىڭ كانديداتى دامەتكەن سۇلەيمەنوۆا, باتىس قازاقستان وبلىستىق ءماسليحاتىنىڭ دەپۋتاتى, مەتسەنات اقسەرىك ءايتىموۆ, تاريحشى عالىم جاڭابەك جاقسىعاليەۆ جانە تاعى باسقالار قاتىستى. ەڭبەك ارداگەرلەرى م.جۇباندىقوۆ, ف.يافاروۆ, اۋداندىق ءماسليحات حاتشىسى ر.يسماعۇلوۆ ءسوز سويلەپ, مۋزەيگە سىيعا كىتاپتار تارتۋ ەتتى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
