باعدارلامانىڭ ماقساتى – ايماقتارداعى مەكتەپ وقۋشىلارىن قولداۋ مەن ۇلتتىق جانە شەتەلدىك جوعارى وقۋ ورىندارىندا ءبىلىم الۋعا ىنتالاندىرۋ. IQanat تۇڭعىش رەت وسىنداي ءىرى دەڭگەيدە وتكىزىلۋدە. وليمپيادانىڭ ىرىكتەۋ كەزەڭى جىل بويى جۇزەگە اسىرىلدى. 9, 10-سىنىپ وقۋشىلارىنىڭ ىشىندە ەڭ ۇزدىك دەپ تانىلعاندارى ەلورداداعى وليمپيادانىڭ اقتىق مارەسىنە جولداما العان. گرانت يەگەرلەرىنىڭ كيپر, ليتۆا, قىتاي, رەسەي, قازاقستانداعى 10 جوعارى وقۋ ورنىندا ءبىلىم الۋعا مۇمكىندىكتەرى بار.
وليمپياداعا شىعىس قازاقستان وبلىسىنىڭ 6 اۋدانىنان مەكتەپ وقۋشىلارى قاتىستى. سايىس 5 ءتۇرلى باعىتتا ءوتتى: ماتەماتيكا, فيزيكا, اعىلشىن ءتىلى, «ەرۋديت» ەسسە جازۋ كونكۋرسى, جەڭىل اتلەتيكا. باق سىناعان 1500 ۇمىتكەردىڭ ىشىنەن سۋىرىلىپ شىققان 177 وقۋشى استاناعا كەلدى.
باعدارلامانىڭ باستاماشىسى ايدىن راحيمباەۆ:
«بۇل باعدارلاماعا قازاقستاندىق بيزنەسمەندەر قولداۋ كورسەتەدى. بۇل جەرگە ەڭ مىقتى, ەڭ قابىلەتتى بالالار جينالدى. ءبىز ءبىلىم جانە عىلىم مينيسترلىگىمەن جانە «بولاشاق» باعدارلاماسىمەن كەلىسىم جاسادىق. وقۋشىلار سەرتيفيكاتتار مەن ديپلومدارعا قول جەتكىزگەن سوڭ, مەكتەپتى تامامداعانشا ەكى جىل ارنايى باعدارلاما اياسىندا دايىندىقتان وتەتىن بولادى», دەپ اتاپ ءوتتى.
ءبىرىنشى ورىن يەلەنگەن وقۋشىلار گرانتتان بولەك, ءوزى ءبىلىم الىپ جاتقان مەكتەپتى جابدىقتاۋعا 2 ملن تەڭگە ۇتىپ الدى. IQanat باعدارلاماسىنىڭ ۇيىمداستىرۋشىلارى بۇل قارجىعا Fab Lab قۇرىلعىسىن ورناتپاق. بۇل – روبوت-تەحنيكا بويىنشا قۇرىلعىلار مەن 3D-پرينتەرلەر.
فيناليستەر ەلوردادا ۋاقىتتارىن ءتيىمدى وتكىزدى. جاڭا دوستار تاۋىپ, ەلوردانىڭ كورىكتى جەرلەرىن, مۇراجايلارىن تاماشالادى, تابىستى ادامداردىڭ ترەنينگتەرىنە قاتىستى. زايسان اۋدانىنان كەلگەن قالامقاس سەيتپاكوۆا استانانى ەرەكشە ۇناتقانىن ايتتى.
«استانادا بولعان 5 كۇندە كەرەمەت اسەرگە بولەندىم. بارلىق ۇيىمداستىرۋشىعا زور العىسىمدى بىلدىرەمىن. وليمپياداعا كەلگەن جولىمنىڭ ءوزى قىزىق پەن قيىنشىلىققا تولى بولدى. وليمپيادا باستالماستان ءبىراز ۋاقىت بۇرىن جول اپاتىنا ۇشىرادىم. بالداقپەن جۇرسەم دە سايىسقا مىندەتتى تۇردە قاتىسامىن دەپ بەكىندىم. وزگەلەرگە قاراعاندا ماعان قيىنىراق بولسا دا قازىر ءوزىمدى ناعىز جەڭىمپاز سەزىنەمىن. وليمپياداعا اعىلشىن ءتىلى پانىنەن قاتىسىپ, شەتەلدىك ۋنيۆەرسيتەتكە گرانت جانە مەكتەپتى جابدىقتاۋعا 3 ملن تەڭگە ۇتىپ الدىم», دەيدى ول.
بيىلعى جىلى اقتىق باسەكەگە تەك شىعىس قازاقستان وبلىسىنىڭ اۋداندارىنان وقۋشىلار قاتىسسا, كەلەسى جىلدان باستاپ قوستاناي, اقمولا, اقتوبە, تۇركىستان وبلىستارىنىڭ وقۋشىلارى دا قاتىسادى دەپ جوسپارلانۋدا. ۇيىمداستىرۋشىلار وزگە دە مەتسەناتتار مەن وقۋ ورىندارىن IQanat باعدارلاماسىن قولداۋعا شاقىرادى. بۇگىنگى تاڭدا ونى داۋرەن جاقسىبەك, ايدىن راحىمباەۆ, باۋىرجان يساباەۆ, ارمانجان بايتاسوۆ, يسلامبەك سالجانوۆ, سەرىك ءتولباسوۆ, رۇستەم يتەميروۆ, سەرجان جۇماشوۆ ەسىمدى ازاماتتار قولدادى.
سامال مۇرات
