مەنىڭشە, بۇل جولداۋدان ءاربىر قازاقستاندىق قازىرگى تاڭدا ءوزىن مازالاعان كەز كەلگەن ماسەلەگە, مەملەكەتتىڭ دامۋ ستراتەگياسىنا, ماقساتى مەن مىندەتتەرىنە, ەڭ ماڭىزدىسى, كۇتكەن ناتيجەگە قاتىستى جاۋاپ تابا الادى.
جولداۋ – مەملەكەت باسشىسى نۇرسۇلتان نازارباەۆتىڭ ەشقانداي دەلدالسىز ءاربىر ازاماتپەن تىكەلەي اڭگىمەلەسۋى دەپ ايتساق بولادى. ول جاسقا دا, كارىگە دە ورتاق. بۇل ءتورتىنشى ونەركاسىپتىك رەۆوليۋتسيا جاعدايىندا تاريحي بەلەستىڭ الدىندا تۇرعان حالىقتىڭ بىرلىگىن قامتاماسىز ەتۋدىڭ ساياسي تۇراقتىلىق پەن قوعامدىق كەلىسىمگە قول جەتكىزۋدىڭ باستى شارتى. قازاقستان حالقى ءوز پرەزيدەنتتەرىنىڭ دانالىعى مەن ءسوزىنىڭ بەرىكتىگىنە, كورەگەن ساياساتىنا سەنەدى.
جولداۋ مەملەكەتتىڭ قازىرگى جاعدايىن, ەكونوميكالىق جانە الەۋمەتتىك-ساياسي ومىردەگى نەگىزگى وزگەرىستەردى تالداۋدان باستالادى. ۇلت جوسپارى جۇزەگە اسىرىلىپ جاتىر, قازاقستاننىڭ ءۇشىنشى جاڭعىرۋى باستالدى, يندۋستريالاندىرۋ باعدارلاماسى ورىندالۋدا, «تسيفرلى قازاقستان» باعدارلاماسى قابىلداندى. سونىمەن قاتار قازاقستاننىڭ بارلىق ازاماتتارى ءۇشىن ەڭ باستىسى مەملەكەتتىك ساياساتتىڭ بەرىكتىگى مەن ۇزاقمەرزىمدى جوسپاردىڭ وزگەرمەۋى.
بۇگىندە بۇكىل الەم مويىنداپ, سەنەتىن ءارى قۇرمەتتەيتىن تاۋەلسىز قازاقستان قۇرىلدى. قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلاندى, ەكسپو-2017 حالىقارالىق مامانداندىرىلعان كورمەسىن ءساتتى وتكىزدى. مۇندا نارىقتىق ەكونوميكانىڭ مودەلى ءساتتى جۇمىس ىستەيدى. ورتاشا توپ قالىپتاستى, كەدەيشىلىك ايتارلىقتاي تومەندەدى, جۇمىسسىزدىق دەڭگەيى ازايدى. كوپتەگەن پوستكەڭەستىك مەملەكەتتەردەن, ءتىپتى قازىرگى ەۋروپادان ايىرماشىلىعى قازاقستاندا ازاماتتىق بەيبىتشىلىك, ەتنوسارالىق جانە كونفەسسيالىق كەلىسىم بار. بۇنىڭ ءبارى مەملەكەت باسشىسىنىڭ ماڭىزدى جانە جاھاندىق جەتىستىكتەرگە قول جەتكىزىپ, جاڭا مىندەتتەر قويۋعا مۇمكىندىك بەرەدى. بۇل ماقساتقا جەتۋ ءۇشىن يندۋستريالاندىرۋ, رەسۋرستىق الەۋەتتى ودان ءارى دامىتۋ, اگروونەركاسىپتىك كەشەندى دامىتۋدىڭ قۇرامداس بولىگى رەتىندە «اقىلدى تەحنولوگيالاردى» جەتىلدىرۋ, كولىك-لوگيستيكالىق ينفراقۇرىلىمنىڭ تيىمدىلىگىن ارتتىرۋ, مەملەكەتتىڭ قوعامدىق قۇرىلىسىندا زاماناۋي تەحنولوگيالار قولدانۋ, قارجى سەكتورىن دامىتۋ جانە ساپاسىن كوتەرۋ, ادام كاپيتالىن ەل ەكونوميكاسىن دامىتۋعا ءتيىمدى پايدالانۋ قاجەت.
ادام كاپيتالىنا ەرەكشە كوڭىل ءبولۋ – ابدەن زەردەلەنگەن مەملەكەتتىك ساياساتتىڭ ۇلگىسى. ياعني, قازاق ءتىلىن ۇيرەنۋدىڭ تاسىلدەرى, ورتا مەكتەپتەگى وقۋشىلارعا جۇكتەمەنى رەتتەۋ, قازاق ءتىلىن جاڭعىرتۋدىڭ قاجەتتىلىگى, مەكتەپ وقۋشىلارىنىڭ اعىلشىن ءتىلىن ەركىن مەڭگەرۋى, تسيفرلى ءبىلىم بەرۋ رەسۋرستارىن دامىتۋ, ۋنيۆەرسيتەتتەردە عىلىمدى دامىتۋعا باسىمدىق بەرۋ ايتىلادى. وسى ماسەلەلەردى ورىنداعان جاعدايدا قازاق قوعامى ءوز تاريحىن, ءتىلىن, مادەنيەتىن بىلەتىن, شەت تىلدەرىن مەڭگەرگەن, وزىق جانە جاھاندىق كوزقاراستارى بار زاماناۋي ورتاعا اينالادى.
بۇدان بولەك, جولداۋدا مەملەكەتتىك باسقارۋدى ءتيىمدى جۇرگىزۋ, سىبايلاس جەمقورلىقپەن كۇرەس جانە زاڭنىڭ ۇستەمدىگى, «اقىلدى ۇلت» ءۇشىن «اقىلدى قالالار» ماسەلەلەرى ايتىلعان.
اتالعان مىندەتتەر قازاقستاننىڭ ىشكى تۇراقتىلىعىن قامتاماسىز ەتىپ, حالىقارالىق ارەنادا بەدەلىن ودان ءارى نىعايتاتىنىنا سەنىمدىمىز. قازاقستان ەۋروپاداعى, ازياداعى جانە لاتىن امەريكاداعى كوپتەگەن ەلدەرگە سينگاپۋر ءتارىزدى ۇلگى بولا الادى. «اقىلدى» حالىقتىڭ «اقىلدى» مەملەكەتى قانداي ەكەنىن كورسەتەدى.
مەن قازاقستاننىڭ وركەندەۋىن, تىنىشتىقتا بولۋىن, جوسپارلانعان رەفورمالاردى باتىل جۇزەگە اسىرۋىن, گۇلدەنۋىن تىلەيمىن.
نيكولاي كورەتسكي,
مەملەكەتتىك باسقارۋ عىلىمدارىنىڭ دوكتورى, پروفەسسور, ۋكراينا عىلىمى مەن تەحنيكاسىنىڭ قۇرمەتتى قىزمەتكەرى, «كونستانتين يپسيلانتي» اتىنداعى كيەۆ قالاسى گرەكتەر قوعامداستىعىنىڭ» توراعاسى
