كەزدەسۋ بارىسىندا سپورت مەكتەبىنىڭ ديرەكتورى وتەگەن ءسابيتوۆ دەپۋتاتتارعا 9-15 جاس ارالىعىنداعى 750 بالانىڭ 42 سپورت توبىندا جاتتىعىپ, ولارعا 26 جاتتىقتىرۋشى ساباق بەرەتىنىن ايتىپ ءوتتى. «وقۋشىلارىمىز رەسپۋبليكالىق جانە حالىقارالىق دەڭگەيدەگى وليمپيادالاردان جۇلدەلى ورىندار الىپ, توپ جارىپ ءجۇر. ماسەلەن, ولار كوكشەتاۋدا وتكەن ازيا چەمپيوناتى مەن الەمدىك قول كۇرەسى ويىندارىندا ۇزدىك شىقتى. بالالار مەن جاسوسپىرىمدەردى سپورتقا باۋلىپ كەلە جاتقان وقۋ ورداسىنىڭ ىرگەتاسى 2015 جىلى قالانسا دا بۇگىنگى كۇنى وقۋشىلارعا تارشىلىق ەتىپ وتىر», – دەدى ءو.ءسابيتوۆ.
ءوز كەزەگىندە, ءماجىلىس دەپۋتاتتارى بۇل ماسەلەنىڭ شەشىلۋىن باقىلاۋلارىنا الاتىنىن جەتكىزدى.
پارلامەنت ءماجىلىسى ەكونوميكالىق رەفورما جانە وڭىرلىك دامۋ كوميتەتىنىڭ توراعاسى نۇرتاي سابيليانوۆ شىعىس قازاقستان وبلىسىندا ءوڭىر حالقىمەن كەزدەسۋلەر وتكىزۋدە.
دەپۋتات اياگوز اۋدانىنىڭ اقشاۋلى, مىڭبۇلاق اۋىلدارىندا, كوكپەكتى اۋدانىنىڭ كوكپەكتى, سامارسكوە, باستاۋشى اۋىلدارىندا, كۇرشىم اۋدانىنىڭ كۇرشىم, مارقاكول, قالجىر جانە بوران اۋىلدارىندا تۇرعىندارمەن جۇزدەستى. وندا دەپۋتات نۇرتاي سابيليانوۆ اۋىل تۇرعىندارىنا «پرەزيدەنتتىڭ بەس الەۋمەتتىك باستاماسىنىڭ» قازاقستاندىقتارعا ماڭىزى زور ەكەنىن ءتۇسىندىردى. سونداي-اق ولاردى جۇزەگە اسىرۋدىڭ مىندەتتەرى مەن مەملەكەت باسشىسى ن.نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋىنىڭ نەگىزگى مىندەتتەرىنىڭ جۇزەگە اسۋى تۋرالى جەتكىزدى. سونىمەن قاتار دەپۋتات پارلامەنتتىڭ زاڭ شىعارۋ قىزمەتى تۋرالى سايلاۋشىلارعا اقپارات بەردى.
اۋدان تۇرعىندارى, ءوز كەزەگىندە اۋىل شارۋاشىلىعىن, كاسىپكەرلىكتى دامىتۋ, شاعىن نەسيەلەۋ, تۇرعىن ۇيمەن, اۋىز سۋمەن, گازبەن قامتاماسىز ەتۋ, اۆتوجولداردى جوندەۋ, حالىقتى جۇمىسپەن قامتۋ, الەۋمەتتىك قامسىزداندىرۋ, دەنساۋلىق ساقتاۋ, ينتەرنەت-بايلانىستى دامىتۋ جانە الەۋمەتتىك نىسانداردى سالۋ سياقتى باسقا دا ماسەلەلەردى كوتەردى. سايلاۋشىلارمەن وتكەن كەزدەسۋ بارىسىندا دەپۋتات ەلدەگى سۋمەن جابدىقتاۋ نىساندارىنىڭ قۇرىلىسى مەن اۆتوجولداردى رەكونسترۋكتسيالاۋ بارىسىمەن تانىستى. كەزدەسۋ شىعىس قازاقستان وبلىسى زايسان, تارباعاتاي, ءۇرجار اۋداندارىنا قاراستى ەلدى مەكەندەردە جالعاسادى.
ءماجىلىس دەپۋتاتتارى گۇلجان قاراقۇسوۆا مەن تاتيانا ياكوۆلەۆا اقمولا وبلىسىنداعى اقمول اۋىلىندا ورنالاسقان «جاڭا سەرۆيس-2007» كاسىپورىن ۇجىمىمەن كەزدەستى.
بۇگىنگى تاڭدا اۆتوكلاۆتى گاز-بەتون شىعاراتىن زاۋىت ايماقتى عانا ەمەس, وڭىردەگى بارلىق قۇرىلىس بازارلارىن زاماناۋي جانە ساپالى ماتەريالدارمەن ۇزدىكسىز قامتاماسىز ەتۋدە. بيىلعى مامىر ايىنان بەرى 1344 شارشى مەتر گازوبلوك شىعارىپ ۇلگەرگەن كاسىپورىن تسەلينوگراد اۋدانىنىڭ يندۋستريالاندىرۋ كارتاسىنا ەنگەن. ساپار بارىسىندا ءماجىلىس دەپۋتاتتارى زاۋىتتاعى ءوندىرىس پروتسەسىمەن تانىسىپ, كاسىپورىن جۇمىسشىلارىنا ەلىمىزدە جۇزەگە اسىپ جاتقان بەس الەۋمەتتىك باستامانى ىسكە اسىرۋ تەتىكتەرىنە توقتالىپ, قۇرىلىس يندۋسترياسىنا ارنالعان پەرسپەكتيۆالار زاۋىتتىڭ دامۋىنا جاڭا مۇمكىندىكتەر تۋعىزاتىنىن جەتكىزدى.
ءماجىلىستىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى مۇحتار ەرمان مەن دەپۋتات سەرگەي زۆولسكي سولتۇستىك قازاقستان وبلىسىنداعى جۇمىس ساپارى اياسىندا پەتروپاۆل قالاسىنداعى وقۋشىلار سارايىنىڭ قۇرىلىسىمەن تانىستى.
جاڭا وقۋشىلار سارايى 1800 بالاعا ەسەپتەلگەن, قۇرىلىسىنىڭ اياقتالۋ مەرزىمى وسى جىلدىڭ قىركۇيەك ايىنا جوسپارلانىپ وتىر. نىساننىڭ باستى ماقساتى – بالالاردىڭ جوبالاۋ-زەرتتەۋ قىزمەتىن جانە عىلىمي-تەحنيكالىق شىعارماشىلىعىن دامىتۋ. كەلەشەكتە وقۋشىلار سارايىنىڭ بازاسىندا IT-ورتالىق, زەرتحانالار, يننوۆاتسيالىق كوۆوركينگ-ايماق بولادى. وندا سويلەسۋ بولمەلەرى, سمارت-كەڭسەلەر, كومپيۋتەرلەندىرىلگەن ايماقتار قامتىلادى. سونداي-اق سارايدا كوركەمدىك-ەستەتيكالىق باعىتتاعى شىعارماشىلىق ايماق تا نازاردان تىس قالماعان. وندا بالالار حورەوگرافيا, تەاتر جانە ۆوكالدىق داعدىلاردى ۇيرەنەدى. ءماجىلىس دەپۋتاتى مۇحتار ەرمان قۇرىلىس نىسانىمەن تانىسا كەلىپ, «نۇر وتان» پارتياسىنىڭ جاستارعا باعىتتالعان جاڭا جوبالارى بار ەكەنىنە, ول ەلىمىزدەگى كوپتەگەن تالانتتى جاستاردىڭ ءوز الەۋەتىن جان-جاقتى ىسكە اسىرۋعا مۇمكىندىك بەرەتىنىن جەتكىزدى.
