قازاقستان رەسپۋبليكاسىنىڭ باس پروكۋرورى اسحات داۋىلباەۆتىڭ مالىمدەمەسى

كەشە, 2011 جىلدىڭ 16 جەلتوقسانى كۇنى ساعات 11.30-دا ماڭعىستاۋ وبلىسىنىڭ جاڭاوزەن قالاسىنداعى مەرەكەلىك ءىس-شارا كەزىندە ءبىر توپتىڭ قىلمىستىق ارەكەتى سالدارىنان جاپپاي تارتىپسىزدىك ورىن الدى. تاۋەلسىزدىكتىڭ 20 جىلدىق مەرەيتويىن مەرەكەلەۋ ءۇشىن ورتالىق الاڭعا جينالعان بەيبىت ازاماتتار بۇزاقىلاردان قۇرالعان توپتىڭ شابۋىلىنا ۇشىرادى. قوعامدىق ءتارتىپتى ورەسكەل بۇزعان بۇزاقىلار پولي­تسيا قىزمەتكەرلەرىنە شابۋىل جاساپ, جاڭاجىلدىق شىرشانى قۇلات­تى, مەرەكەگە بايلانىستى قويىلعان وتاۋ مەن ساحنانى قيراتتى جانە پوليتسيانىڭ اۆتوبۋسىن ورتەپ جىبەردى. بۇزاقىلار بەيبىت تۇر­عىنداردى ۇرىپ-سوعىپ, الاڭعا تاياۋ تۇرعان اۆتوكولىكتەرگە زاقىم كەلتىرە باستادى. باسبۇزار توپ زاڭسىز ارەكەتتى توقتاتۋعا شاقىرعان قۇقىق قورعاۋ ورگان­دارىنىڭ ەسكەرتۋلەرىن تىڭداماي, ءتارتىپ ساقشىلارىنا قارۋلارىن تارتىپ الۋ ماقساتىندا شابۋىل جاسادى. بۇزاقىلار وقپەن اتاتىن جانە سۋىق قارۋلار قولداندى. جاپپاي ءتارتىپ بۇزۋشىلىق كەزىندە قالالىق اكىمدىك عيماراتى, قوناق ۇيلەر جانە «وزەنمۇنايگاز» كومپانياسىنىڭ اكىمشىلىك عيماراتى ورتەندى. سونىمەن قاتار, جەكە جانە زاڭدى تۇل­عالاردىڭ م ۇلىكتەرى قيرادى, اۆتوكولىكتەر جالىنعا ورانىپ, بانكوماتتار تونالدى. الدىن الا مالىمەتتەرگە قاراعاندا, جاپپاي ءتارتىپ بۇزۋشىلىق سالدارىنان 10 ادام قايتىس بولدى, جارالانعاندار اراسىندا پوليتسيا قىزمەتكەرلەرى بار. جاپپاي تارتىپسىزدىك فاكتىلەرى بويىنشا قىلمىستىق ءىس قوزعالدى. مەملەكەت باسشىسىنىڭ تاپسىرماسىمەن قازاقستان رەسپۋبلي­كاسىنىڭ ىشكى ىستەر ءمينيسترى ق.قاسىموۆ باستاعان جەدەل تەرگەۋ توبى قىلمىستىق ارەكەتتەردىڭ الدىن الۋ, جاپپاي تارتىپسىزدىكتى ۇيىم­داستىرۋشىلاردى تابۋ جانە جازاعا تارتۋ, قالاداعى قوعامدىق قاۋىپ­سىزدىكتى قالپىنا كەلتىرۋ ماقساتىندا جاڭاوزەن قالاسىنا ۇشىپ شىقتى. باس پروكۋراتۋرا تارتىپسىزدىكتى ۇيىمداستىرۋشىلارعا ولاردىڭ زاڭ الدىنداعى جاۋاپكەرشىلىكتەرىن ەسكەرتىپ, زاڭ بۇزۋشىلىق ارەكەتتەردى توقتاتۋعا شاقىرادى. قۇقىق قورعاۋ ورگاندارى ازاماتتاردىڭ قاۋىپسىزدىگى مەن تىنىش­تىعىن بۇزاتىن بارلىق ارەكەتتەرگە توسقاۋىل قويادى.