ەل تاۋەلسىزدىگىنىڭ 20 جىلدىعى قارساڭىندا باۋىرلاس تۇرىك ەلىنىڭ پرەزيدەنتى ابدۋللا گۇلدەن سۇحبات الۋدىڭ ءساتى ءتۇستى. تۇرىك مەملەكەتىنىڭ باسشىسى وسى 20 جىلدىڭ ىشىندە قازاقستاننىڭ جەتكەن جەتىستىكتەرى تۋرالى ىقىلاسپەن اڭگىمەلەدى.
– قازاقستان رەسپۋبليكاسى مەن تۇرىك رەسپۋبليكاسىن ءتۇركى حالىقتارىنىڭ ەرەكشە باۋىرلاستىق قاتىناستارى بايلانىستىرىپ تۇر. تۇركيا سوناۋ 1991 جىلى قازاقستان ءوز ءتاۋەلسىزدىگىن جاريالاي سالىسىمەن ونى ءبىرىنشى بولىپ تانىدى, ءبىردەن ديپلوماتيالىق قارىم-قاتىناس ورناتتى. بۇگىنگى كۇنى قازاقستان مەن ءتۇركيانىڭ اراسىندا «ستراتەگيالىق ءارىپتەستىك تۋرالى» شارت جۇمىس ىستەۋدە. ءسىز وسى ۋاقىت ارالىعىندا تاۋەلسىز مەملەكەت رەتىندە قازاقستاننىڭ حالىقارالىق ارەنادا قول جەتكىزگەن جەتىستىكتەرى اراسىنان نەعۇرلىم ماڭىزدىسى رەتىندە قانداي ماسەلەلەردى اتاعان بولار ەدىڭىز؟
– ءيا, ارالارىن تاريحي, مادەني جانە گۋمانيتارلىق تامىرلاستىق پەن جالپى قۇندىلىقتار بايلانىستىراتىن باۋىرلاس ەل رەتىندە تۇركيا قازاقستان ءتاۋەلسىزدىگىن الەم ەلدەرىنىڭ اراسىندا ءبىرىنشى بولىپ تانىدى جانە ديپلوماتيالىق قارىم-قاتىناس ورناتتى. سوندىقتان بۇگىنگى كۇنى ءبىز قازاقستان مەن تۇركيا اراسىندا ورنىققان ديپلوماتيالىق قاتىناستاردىڭ 20 جىلدىعىن دا اتاپ ءوتىپ وتىرمىز. وسى جاعدايعا جانە قازاقستان تاۋەلسىزدىگىنىڭ 20 جىلدىعىنا بايلانىستى ەل حالقىنا شىنايى قۇتتىقتاۋىمدى ارنايمىن.
پرەزيدەنت نازارباەۆتىڭ ءتۇركياعا جاساعان 2009 جىلعى ساپارى كەزىندە قول قويىلعان جانە جۋىقتا رەسمي كۇشىنە ەنگەن «ستراتەگيالىق ارىپتەستىك تۋرالى» كەلىسىم-شارت ءبىزدىڭ قارىم-قاتىناسىمىزدى جاڭا دەڭگەيگە كوتەردى. بۇل كەلىسىم-شارت ءبىزدىڭ قارىم-قاتىناستارىمىزدا قول جەتكىزگەن جەتىستىكتەرىمىزدىڭ ەڭ جارقىن كورىنىسىنىڭ ءبىرى بولىپ تابىلادى. سونىمەن قاتار ول ساياسي, ساۋدا جانە ەكونوميكالىق قاتىناستاردى الداعى ۋاقىتتا ودان ءارى دامىتۋ تۇرعىسىنان العاندا زور ماڭىزعا يە.
قازاقستان تاۋەلسىزدىككە يە بولعان 20 جىلدىڭ ىشىندە ەلدى قايتا قۇرىپ, ونى ءوركەندەتۋ ۇدەرىسىن زور تابىسپەن قورىتىندىلاپ وتىرعاندىعىن كورىپ وتىرمىز. ول ءوز تاۋەلسىزدىگى مەن ەگەمەندىگىن بەكىتتى. كورشى مەملەكەتتەرمەن شەكارالاردى شەگەندەۋ ءماسەلەسىن بەيبىت تۇردە شەشتى. مەنىڭ قىمباتتى دوسىم پرەزيدەنت نازارباەۆتىڭ باستاماشىلدىعى جانە باسشىلىعىمەن ازياداعى ءوزارا ءىس-قيمىل جانە سەنىم شارالارى ءجونىندەگى كەڭەستىڭ (اوسشك) بەرىك ىرگەتاسى قالانىپ, ونىڭ قازىرگى دەڭگەيىنە قول جەتكىزىلدى. وڭىرلىك قاۋىپسىزدىك پەن تۇراقتىلىق ىسىنە ماڭىزدى ۇلەس قوسىپ كەلە جاتقان بۇل ىرگەلى ۇجىمعا توراعالىقتى ءبىز, ياعني تۇركيا قازاقستاننان 2010 جىلدىڭ ماۋسىمىندا قابىلداپ الدىق.
قازاقستان ءوزىنىڭ تۇراقتى تۇردە العا باسۋىنىڭ ناتيجەسىندە ءوز وڭىرىندەگى جەتەكشى مەملەكەتتەردىڭ بىرىنە, حالىقارالىق قوعامداستىقتىڭ قۇرمەتتى مۇشەسىنە اينالدى.
وسى رەتتە قازاقستاننىڭ 2010 جىلى ەقىۇ-عا توراعالىق ەتۋىن جانە ونىڭ ءسامميتىن تابىستى وتكىزۋىن بارلىعىمىزدىڭ ورتاق ماقتانىشىمىز دەپ بىلەمىن. ەلدىڭ حالىقارالىق ۇدەرىستەردىڭ قۇرمەتتى قاتىسۋشى رەتىندەگى بەدەلىن مۇنان كەيىن, ياعني ۇستىمىزدەگى جىلى يسلام ىنتىماقتاستىعى ۇيىمىنا جەتەكشىلىك جاساۋى ودان ءارى ايقىنداي ءتۇستى.
وسىناۋ تاريحي تۇرعىدان العاندا قىسقا 20 جىلدىڭ ىشىندە قازاقستان ءوزىنىڭ قول جەتكىزگەن تابىستارىنىڭ ءناتيجەسىندە وڭىردەگى تۇراقتىلىق پەن قاۋىپسىزدىكتىڭ ورتالىعىنا اينالدى. بۇل ۇلكەن جەتىستىك.
– رەسمي انكارا پوستكەڭەستىك كەڭىستىكتەگى تۇركىتىلدەس مەملەكەتتەر ءتاۋەلسىزدىگىنىڭ ءبىرىنشى كۇنىنەن باستاپ-اق ولارمەن دوستىق قاتىناستار ورناتۋعا ۇمتىلدى. ءتۇركيا بۇل جاڭا كەڭىستىكتە ءوزارا ارەكەتتەستىك ۇدەرىستەرىنىڭ لوكوموتيۆى بولدى. ءسىزدىڭ پىكىرىڭىزشە, سوڭعى ونجىلدىقتاعى جاھاندانۋ ۇدەرىسى ۇدەي تۇسكەن ۋاقىتتا ءتۇركى الەمى دامۋىنىڭ ساياسي جانە ەكونوميكالىق تۇرعىدان قانداي بولاشاعى بار؟ الەمدىك قارجى جانە ەكونوميكالىق داعدارىس پەن قازىرگى كەزەڭنىڭ باسقا دا سىناق-قاتەرلەرىنە تۇركى تىلدەس حالىقتار قانداي تاسىلدەردى بىرىگىپ قارسى قويا الادى؟
– قازىرگى زامانعى الەمدە وڭىرلىك ينتەگراتسيا مەن ىنتىماقتاستىقتىڭ ماڭىزى كۇن وتكەن سايىن ءوسۋ ۇستىندە. قازىر بۇل ۇدەرىستەر جاھاندىق سيپات الىپ وتىر. وسى رەتتە تۇركى تىلدەس رەسپۋبليكالاردىڭ تىلدىك, مادەني, تاريحي بىرلىگى, شىعۋ تەگى مەن ورتاق قۇندىلىقتارى جالپى گەوگرافيالىق ورنالاسۋىمىزدىڭ نەگىزىندە كەڭ كولەمدى ىنتىماقتاستىعىمىزعا قولايلى جاعدايلار تۋدىرادى, سونىمەن قاتار كوپتەگەن ماسەلەلەر ءجونىندە مۇددەلەستىگىمىزدى ۇشتاستىرا تۇسەدى.
وسى نەگىزدەرگە ارقا تىرەي وتىرىپ, ءبىز تۇركىتىلدەس ەلدەر ىنتىماقتاستىعى كەڭەسىن (تتەىك) قۇرۋ ۇدەرىسىنە باستاماشىلىق ەتتىك.
مۇنداي ارىپتەستىكتىڭ جۇمىسى ەۋرازيالىق كەڭىستىكتەگى ەلدەر ىنتىماقتاستىعىنا دا جاعىمدى اسەر ەتەتىندىگى, ونى قالىپتاستىرۋدىڭ تەتىگى بولىپ تابىلاتىندىعى دا انىق.
وتكەن جىلى ءبىز بۇل تەتىكتى ينستيتۋتتاندىرۋ ءىسىن قامتاماسىز ەتتىك. ۇيىمدى قۇرۋ جونىندە شەشىم قابىلدانىپ, كەڭەستىڭ باس حاتشىسى تاعايىندالدى. حاتشىلىققا ىستامبۇلدان ورىن بەردىك. سونىمەن قاتار, وسى باعىتتاعى جۇمىسىمىزعا قولداۋ كورسەتۋ ءۇشىن استانادا ءتۇركى اكادەمياسى, باكۋدە ءتۇركىتىلدەس ەلدەردىڭ پارلامەنتتىك اسسامبلەياسى قۇرىلدى.
ۇستىمىزدەگى جىلدىڭ 20-21 قازانىندا الماتىدا تۇركىتىلدەس ەلدەر ىنتىماقتاستىعى كەڭەسىنىڭ ءبىرىنشى ءسامميتى ءوتىپ, ونىڭ باستى تاقىرىبى ەكونوميكالىق ىنتىماقتاستىق ماسەلەلەرى بولدى. وسى سامميت كەزىندە ىسكەرلىك ورتالاردى بىرىكتىرەتىن تۇركى ءىسكەرلىك كەڭەسىن قۇرۋ جونىندە شەشىم قابىلداندى.
ءبىزدىڭ بۇل باستاماشىلىعىمىز ەكونوميكالىق ىنتىماقتاستىقتى ودان ءارى دامىتۋعا, جاھاندىق ەكونوميكالىق داعدارىسقا بىرىگىپ قارسى تۇرۋىمىزعا ءمۇمكىندىك بەرەتىندىگى انىق.
الداعى ۋاقىتتا تۇركىتىلدەس ەلدەر ىنتىماقتاستىعى كەڭەسىنە باسقا دا باۋىرلاس ەلدەر قوسىلادى دەگەن سەنىمدەمىن.
– وسى 20 جىلدىڭ ءون بويىندا قازاقستان مەن تۇركيا قارىم-قاتىناسى ءارىپتەستىك جانە ءوزارا قۇرمەتتەۋ, ءوزارا ءتيىمدى ەكونوميكالىق ءتيىمدى ىنتىماقتاستىق نەگىزىندە ءورىس الىپ كەلەدى. ءتۇركيا – قازاقستان ەكونوميكاسىنداعى ءىرى ينۆەستور. سىزدەردىڭ ينۆەستيتسيالارىڭىز قازاقستاندىق ەكونوميكانىڭ يندۋستريالىق سەكتورىنا باعىتتالۋدا. سونداي-اق ەكونوميكا سالاسىنداعى كوپتەگەن مەملەكەتارالىق ماسەلەلەردى شەشۋگە ىقپال ەتەتىن ەكونوميكالىق كەڭەس قۇرۋ تۋرالى دا كەلىسىم بار. ءسىز ەكى جاقتى ەكونوميكالىق ىنتىماقتاستىقتىڭ الەۋەتىن قالاي باعالايسىز؟ بولاشاقتا قانداي باعىتتار پايدا بولۋى مۇمكىن؟
– قازاقستان ءبىزدىڭ وڭىردەگى ەڭ ماڭىزدى ساۋدا جانە ەكونوميكالىق ءارىپتەسىمىز بولىپ تابىلادى. ءبىز الداعى ۋاقىتتاردا ءوزىمىزدىڭ ساۋدا-ەكونوميكالىق قارىم-قاتىناستارىمىزدى ءارتاراپتاندىرۋعا جانە دامىتۋعا كۇش سالاتىن بولامىز. بۇعان بىزگە ەكى ەلدىڭ اراسىندا جۇمىس ىستەپ كەلە جاتقان بىرلەسكەن ەكونوميكالىق كوميسسيانىڭ جۇمىسى كومەكتەسەتىن بولادى. ونىڭ قىزمەتى اتالعان قارىم-قاتىناستى ودان ءارى كەڭەيتۋگە, ەكى جاقتى ساۋدانىڭ جولىنداعى كەدەرگىلەردى جويىپ, جاڭا مۇمكىندىكتەردى ايقىنداۋعا باعىتتالىپ وتىر.
ءوزارا ساۋدا كولەمى 2008 جىلى 3 ميلليارد دوللاردان اسىپ تۇسكەن ەدى. 2009 جىلى جاھاندىق ەكونوميكالىق داعدارىس سالدارىنان بۇل تسيفر 1,7 ميلليارد دوللارعا دەيىن تومەندەدى. 2010 جىلى ەكى ەل اراسىنداعى ساۋدا قارىم-قاتىناسىندا قايتا جاندانۋ ۇدەرىسى ورنىعىپ, ساۋدا كولەمى 3,2 ميلليارد دوللاردى قۇرادى. ال ۇستىمىزدەگى جىلدىڭ 8 ايىندا 2,7 ميلليارد دوللار بولدى. جىل سوڭىنا دەيىن بۇل كورسەتكىش 4 ميلليارد دوللارعا جۋىقتايدى دەپ كۇتىپ وتىرمىز. الداعى ۋاقىتتا ونىڭ دەڭگەيىن 10 ميلليارد دوللارعا دەيىن جەتكىزۋدى ورتاق ماقسات رەتىندە ايقىندادىق.
ەكونوميكالىق ىنتىماقتاستىقتى ءارتاراپتاندىرۋدىڭ مول الەۋەتى بار. وسىنى جۇزەگە اسىرۋ ءۇشىن ءبىز تۇرىك كاسىپكەرلەرىنىڭ قازاقستاندا قازىرگى كۇنى بەلسەندى تۇردە جۇزەگە اسىرىلىپ جاتقان ءىرى ينفراقۇرىلىمدىق جوبالارعا, سونىڭ ىشىندە بوگەندەر قۇرىلىسىنا, جولدار مەن كوپىرلەر سالۋعا, تازالاۋ قوندىرعىلارىن ورناتۋعا, قۋات ءوندىرۋ ستانسالارىن سالۋعا, كەمە جاساۋعا, قازاقستان مەن قىتاي شەكارالارىنداعى لوگيستيكالىق ورتالىقتار قۇرىلىسىنا قاتىسۋىنا ىنتا تانىتۋدامىز.
– تۇركيانىڭ جەتەكشى قۇرىلىس كومپانيالارى استانانى سالۋ ىسىنە بەلسەنە قاتىستى. سوندىقتان ازيانىڭ ەڭ سولتۇستىگىندە پايدا بولعان جاڭا قالا تەك قازاقستاندىقتاردىڭ عانا ەمەس, تۇرىك قۇرىلىسشىلارىنىڭ دا ورتاق ماقتانىشى. ونىڭ ءۇستىنە استانا مەن انكارا – باۋىرلاس قالالار. بۇل جاعدايلار ەكى جاقتى قارىم-قاتىناسقا قالاي اسەر ەتۋدە؟
– ءبىزدىڭ قازاقستانعا سالعان ينۆەستيتسيالارىمىزدىڭ جالپى كولەمى 2 ميلليارد دوللارعا جۋىقتاسا, ول نەگىزىنەن مۇناي, قۇرىلىس, قوناق ءۇي جانە بانك ىستەرى, ازىق-ت ۇلىك, حيميا, ءدارى-دارمەك وندىرىستەرىنە قاراي باعىتتالعان.
قۇرىلىستاعى مەردىگەرلىك ماسەلەلەر تۇرعىسىنان قاراعاندا دا تۇركيا ءۇشىن قازاقستان ماڭىزدى ارىپتەس ەل بولىپ تابىلادى. تۇركيانىڭ قۇرىلىس كومپانيالارى قازاقستاندا ساپاسى جوعارى, باعاسى قولايلى قۇرىلىستار سالۋدى ءجۇزەگە اسىرىپ كەلەدى. ولاردىڭ سالىنۋ مەرزىمى جونىندە دە كوپ شاعىمدار جوق. تۇرىك مەردىگەرلەرىنىڭ كۇشىمەن قازاقستاندا 15 ميلليارد دوللاردىڭ قۇرىلىس جوبالارى جۇزەگە اسقاندىعىن ايتۋعا بولادى.
بۇل قۇرىلىستاردىڭ ەلەۋلى بولىگى قازاقستان دامۋىنىڭ سيمۆولىنا اينالىپ وتىرعان استانا قالاسىندا سالىندى. سوندىقتان استانا ءبىز ءۇشىن دە ماقتانىش بولىپ تابىلادى. استانا مەن انكارانىڭ باۋىرلاس قالالارعا اينالۋى ەكى ەل اراسىنداعى الەۋمەتتىك جانە مادەني ىنتىماقتاستىقتى ودان ءارى دامىتا تۇسەتىندىگىنە سەنىم ۇلكەن.
– پرەزيدەنت نۇرسۇلتان نازارباەۆتىڭ باستاماشىلىعىمەن قۇرىلعان اوسشك ۇيىمىنا توراعالىقتى قازاقستان ءتۇركياعا رەسمي تۇردە تاپسىردى. وسىعان وراي ەكى ەلدىڭ ءوزارا ارەكەتتەستىگى كوپ جاقتى دەڭگەيدە, حالىقارالىق ارەنادا قالاي قالىپتاسىپ كەلە جاتقانى تۋرالى ايتا كەتسەڭىز؟
– ءيا, ءبىز 2010 جىلدىڭ ماۋسىم ايىندا نەگىزىن نۇرسۇلتان نازارباەۆ قالاعان اوسشك-گە توراعالىقتى قازاقستاننان قابىلداپ الدىق. ءبىز قازىر ازيادا قالىپتاسقان قاۋىپسىزدىك تۋرالى وسى جاڭا تۇسىنىك اياسىندا جۇمىسىمىزدى ودان ءارى ورىستەتىپ, اوسشك-ءنىڭ حالىقارالىق ارەنادا ۇلكەن ماڭىزعا يە بولۋىن قامتاماسىز ەتۋ جولىندا جۇمىس ىستەپ جاتىرمىز. ءبىز اوسشك كەڭىستىگىندە ءتيىمدى ءۇنقاتىسۋ تەتىگىنىڭ قالىپتاسۋىنا وتە ۇلكەن ءمان بەرۋدەمىز. وسىعان وراي اوسشك-ءنىڭ قىزمەتى مەن تيىمدىلىگىن نىعايتۋ ءۇشىن قازاقستانمەن ىنتىماقتاستىققا ۇلكەن كۇش-جىگەر جۇمساۋدامىز.
قازاقستان مەن تۇركيا تۇركى الەمى اياسىنداعى ىنتىماقتاستىقتا دا ماڭىزدى ءرول وينايدى. بۇل ماسەلە جونىندەگى قارىم-قاتىناسىمىز بارىنشا ىلگەرى دەڭگەيدە دەپ ەسەپتەيمىن. سونداي-اق يسلام ىنتىماقتاستىعى ۇيىمى, ەقىۇ سەكىلدى ۇيىمدار اياسىندا دا ءوز ىنتىماقتاستىعىمىزدى ودان ءارى بەكىتىپ كەلەمىز.
– قازاقستان مەن تۇركيا حالىقتارىن مادەنيەت پەن ءداستۇر ورتاقتاستىعى دا بىرىكتىرە تۇسەدى. ءسىز جالپى الەمدىك مادەني مۇرالارعا تۇركى حالىقتارىنىڭ قوسقان ۇلەسىن قالاي باعالايسىز؟ الەمدە تۇركى ءمادەنيەتىنىڭ تانىمالدىعىن ارتتىرا ءتۇسۋ ءۇشىن قانداي جۇمىستار جۇرگىزىلۋى قاجەت؟
– تۇركى الەمى مىڭجىلدىقتار بويى ەۋرازيالىق كەڭىستىكتەگى ءارتۇرلى مادەنيەتتەرمەن ءوزارا ارەكەتتەستىك ارقىلى دامىپ كەلدى. ءبىر جاعىنان العاندا, ءبىزدىڭ اتا-بابالارىمىزدىڭ قالىپتاستىرعان ءوركەنيەتى باسقا وركەنيەتتەرگە جاڭا كوكجيەكتەر اشىپ بەرسە, ەكىنشى جاعىنان العاندا, ول وركەنيەتتەردىڭ جەتىستىكتەرىن پايدالانۋ ارقىلى ءوز ءتاجىريبەسىن دامىتتى. ءححى عاسىردا تۇرىك الەمى بۇل تاريحي ۇدەرىستى ودان ءارى جالعاستىرا وتىرىپ, وڭىرلىك ىنتىماقتاستىقپەن قاتار بۇكىل ادامزات قاۋىمىنا ورتاق جاھاندىق قۇندىلىقتاردى يگەرۋ مەن وعان ۇلەس قوسۋعا جاقسى دايىندىقپەن كەلىپ وتىر.
وسىنىڭ اياسىندا ءبىز 1992 جىلى قۇرىلعان تۇركسوي قىزمەتىنە ۇلكەن ماڭىز بەرەمىز. ونىڭ ءساتتى جۇمىستارىن, سولاردىڭ قاتارىندا قازىرگى ءىس ءۇستىندەگى باس حاتشى دۇيسەن قاسەيىنوۆتىڭ جەتەكشىلىگىمەن جۇزەگە اسۋ ۇستىندەگى ىستەردى قولداپ, وسى ىستەردىڭ ءورىس الۋىن ءجىتى باقىلاپ وتىرمىز.
ەكىنشى جاقتان العاندا, تۇركى تىلدەرى, مادەنيەتتەرى مەن تاريحىن زەرتتەۋ سالاسىندا تۇركىتىلدەس مەملەكەتتەر ىنتىماقتاستىعى كەڭەسى اياسىندا, سونىڭ ىشىندە ەڭ الدىمەن تۇركى اكادەمياسىندا ءجۇزەگە اسىپ جاتقان باستاماشىلدىق ىستەر مەن جوبالارعا قولداۋ ءبىلدىرىپ وتىرامىز. ارينە, بۇل ماسەلە جونىندەگى جۇمىستار ءالى ءوزىنىڭ باستاپقى ساتىسىندا عانا. بولاشاقتا وسى ىستەر دامي كەلە تۇركى مادەنيەتىنىڭ الەمگە تانىمالدىلىعىن ارتتىرا تۇسەدى دەپ ەسەپتەيمىن.
– ءسىز تۇركىتىلدەس مەملەكەتتەردىڭ ينتەگراتسيالانۋىنا نۇرسۇلتان نازارباەۆتىڭ قوسقان ۇلەسىن ۇنەمى جوعارى باعالاپ كەلەسىز. ءتىپتى ءبىزدىڭ ەلباسىمىزدى تەك قازاقستاننىڭ عانا ەمەس, بويىندا تۇركى قانى بار بارلىق حالىقتاردىڭ كوشباسشىسى رەتىندە اتاعانىڭىزدى دا جاقسى بىلەمىز. ءسىز نازارباەۆ مىرزامەن ءجيى حابارلاسىپ تۇراسىز با؟ ونىڭ ساياسي قايراتكەرلىگىنە ءتان باستى سيپاتتامالار جايىندا قىسقاشا ايتا كەتسەڭىز.
– مەن نازارباەۆ مىرزانى تۇركى الەمىنىڭ كوشباسشىسى دەپ ەسەپتەيمىن.
پرەزيدەنت نازارباەۆ قازاقستاننىڭ وتكەن 20 جىلى ىشىندەگى كەزەڭدە ەلدىڭ دامۋىنا وتە ۇلكەن ۇلەس قوستى. ول ءوز ەلىنىڭ دامۋىنا ساي كەلەتىن ەڭ ءبىر ءتيىمدى مودەلدى جاسادى جانە سونى جۇزەگە اسىرا ءبىلدى. سونىڭ ناتيجەسىندە قازاقستان دامۋى جونىنەن بۇكىل وڭىرگە جارقىن مىسال بولا الاتىن ۇلگىلى ەلگە اينالدى. نازارباەۆتىڭ كوشباسشىلىق قاسيەتى بۇگىنگى كۇنى تەك قازاقستان ەكونوميكاسىنىڭ دامۋىمەن عانا ەمەس, سونىمەن قاتار بۇل ەلدىڭ حالىقارالىق ارەنادا قول جەتكىزگەن زور تابىستارىمەن دە ايقىندالىپ وتىر.
تۇركيا مەن قازاقستان قارىم-قاتىناسىنىڭ قازىرگى قول جەتكىزىلگەن دەڭگەيىنە, ءسوز جوق, نۇرسۇلتان نازارباەۆ وتە زور ۇلەس قوستى.
– اڭگىمەڭىزگە راحمەت.
اڭگىمەلەسكەندەر يرينا بەكتياروۆا, لەيلا اگامالوۆا, ارنايى «ەگەمەن قازاقستان» گازەتى ءۇشىن.
