جامبىل وبلىسى ەلىمىزگە مەركى شيپاجايى مەن ت.رىسقۇلوۆ ءساناتوريى ارقىلى جاقسى تانىمال. مۇندا جىل سايىن جۇزدەگەن ادامدار كەلىپ, ءتيىستى ەم قابىلداپ, دەمالىپ كەتەدى. بۇل ءوز كەزەگىندە ءوڭىر ەكونوميكاسىن ارتتىرىپ قانا قويماي, ءوڭىردىڭ باسەكەلەستىگىن جوعارىلاتا تۇسەتىنى انىق. ەندى بۇل باستاما جۋىردا جۋالى اۋدانىندا جۇزەگە اسپاقشى. قىس مەزگىلىندە قاتالدىق تانىتقانىمەن, جۋالى جەرىنىڭ ءتىپتى جاز مەزگىلىندە دە جاسىل جەلەككە مالىنىپ تۇراتىن تابيعاتى كىمدى دە بولسا تاڭداندىرماي قويمايدى. ءوڭىر ءتۋريزمىن قالىپتاستىرۋ ماقساتىندا اۋدان ىرگەسىندەگى ءتاتتىباي دۇيسەباەۆ اۋىلى اۋماعىنان جەر ءبولىنىپ, «قارالما» تاۋ شاڭعىسى بازاسىن اشۋعا ارنالعان جۇمىستار باستالىپ تا كەتتى. كەشەننىڭ قۇرىلىس جۇمىستارى اعىمداعى جىلدىڭ جەلتوقسان ايىنا دەيىن اياقتالادى.
«تاراز» الەۋمەتتىك-كاسىپكەرلىك كورپوراتسياسى» اكتسيونەرلىك قوعامىنىڭ باسقارما توراعاسى نۇركەن شاربيەۆتىڭ ايتۋىنشا, «قارالما» ساۋىقتىرۋ ورنىنا كەلۋشى تۋريستەر مەن دەمالۋشىلارعا بارلىق جاعداي جاسالادى. مۇندا 50 ادامعا ارنالعان قوناقۇي مەن كەلۋشىلەرگە جوعارى ساپالى قىزمەت كورسەتەتىن مەيرامحانا سالىنىپ, وزگە دە ساۋدا-ساتتىق نۇكتەلەرىنە ورىن بولىنەتىن بولادى. مەيلىنشە زاماناۋي ۇلگىدە سالىناتىن ساۋىقتىرۋ ورتالىعى تاراز قالاسىنان نەبارى ءجۇز شاقىرىم جەردە ورنالاسادى.
سونىمەن قاتار جامبىل وبلىسىنىڭ اكىمى اسقار مىرزاحمەتوۆتىڭ تاپسىرماسى نەگىزىندە «قارالما» دەمالىس ورنىنان كەمىندە 10 كوتتەدج سالۋ كوزدەلگەن. سونداي-اق اكىمنىڭ ايتۋىنشا سول جەردى جىلدىڭ ءتورت ماۋسىمىندا دا پايدالانۋعا بولادى. مۇندا جاز مەزگىلىندە باقتاق (فورەل) بالىعىن وسىرۋگە, ال قىس مەزگىلىندە سپورتتىق شارالار وتكىزۋگە دە مۇمكىندىكتەر بار ەكەن. ال ءوڭىر كاسىپكەرلەرى ءۇشىن بۇل وتە ۇلكەن مۇمكىندىك بولماق. اتالعان ساۋىقتىرۋ ورنىندا دەمالۋشىلار ءۇشىن قوناقۇيلەر, مەيرامحانالار, كوتتەدجدەرمەن قاتار الداعى ۋاقىتتاردا ەۋروپالىق تالاپقا ساي تاۋ شاڭعىسىنىڭ كەشەنى سالىنادى. بولاشاقتا جاسىل جەلەكتى جۋالى ايماعىن الماتىداعى «شىمبۇلاق» كەشەنى سەكىلدى اۋماققا اينالدىرۋ جوسپاردا بار.
بۇگىنگى تاڭدا بولاشاق شيپاجاي اۋماعىنا وڭىردەگى كاسىپكەر ازاماتتاردىڭ بەلسەندىلىگى قاجەت. بۇل باستاما كاسىپكەرلەردىڭ وزدەرىنىڭ الەۋمەتتىك جاعدايىن دا جوعارىلاتۋمەن قاتار, ءوڭىردىڭ ەكونوميكاسىن ارتتىرۋعا دا ۇلەس قوساتىنى انىق. ال اۋدان اكىمى باقتيار كوپبوسىنوۆ اتالعان ساۋىقتىرۋ ورتالىعىنان جۋالىلىق ەكى كاسىپكەردىڭ كوتتەدج سالۋعا نيەت تانىتىپ وتىرعانىن ايتتى. جالپى, ءوڭىر كاسىپكەرلەرى دە بۇگىندە بۇل باستاماعا قىزۋ قولداۋ بىلدىرۋدە. بۇل ورايدا تاراز يننوۆاتسيالىق-گۋمانيتارلىق ۋنيۆەرسيتەتىنىڭ رەكتورى ەربولات ساۋرىقوۆ ءبىر كوتتەدج سالۋعا دايىن ەكەنىن ايتىپ وتىر. سونىمەن قاتار بۇل باستامانى تارازدىق كاسىپكەر جۇماگۇل وماروۆا مەن شۋلىق كاسىپكەر ءالىمجان احمەتوۆ تە قولدايدى. تاراز قالاسىنداعى «رىسباەۆا جانە ك» كومپانياسىنىڭ ديرەكتورى ساۋلە رىسباەۆا اتالعان ساۋىقتىرۋ ورنىندا ۇلتتىق ناقىشتاعى ەستەلىك كادەسىيلار ساتۋعا ىنتالى ەكەنىن جەتكىزدى.
حاميت ەسامان,
«ەگەمەن قازاقستان»
جامبىل وبلىسى
