شيرەك فينالدىڭ العاشقى كۇنى ۋرۋگۆاي مەن برازيليا جارىستان شىعىپ قالدى. وسىدان سوڭ جارىستا قالعان 6 كوماندانىڭ 6-ى دا ەۋروپانىڭ كوماندالارى ەدى. مۇنى بىلگەن بۇقارالىق اقپارات قۇرالدارى «ەۋرو-2018 جارىسى باستالدى» دەپ جار سالدى. راسىمەن دە كارى قۇرلىق فۋتبولى قازىر كۇللى الەمگە ۇستەمدىك قۇرىپ تۇر. لاتىن امەريكاسىنان كەلگەن ءۇش كوماندا دا جارىستان شىعىپ قالعان سوڭ, كۋبوك ەۋروپادا قالارى انىق. وسى كەزگە دەيىن 11 رەت كۋبوكتى ەۋروپالىقتار يەلەنسە, 9 مارتە وڭتۇستىك امەريكا قۇرلىعىنىڭ وكىلدەرى ۇتقان. ال بيىل 21 چەمپيوناتتىڭ ناتيجەسىندە ەۋروپا 12-كۋبوكتى يەلەنگەلى تۇر. سونىمەن جارىستا قالعاندار: فرانتسيا, بەلگيا, حورۆاتيا, انگليا.
فرانتسيا چەمپيونات بارىسىندا اسا قاتتى قيىندىق كورە قويعان جوق. تەك پلەي-وفف باستالا بەرگەن تۇستا ارگەنتينا قارسىلىق كورسەتتى دەمەسەڭىز. بىراق مەسسي باستاعان سايىپقىرانداردىڭ قاقپاسىنا فرانتسيالىقتار 4 گول سوقتى. 19 جاستاعى شابۋىلشى كيليان مباپپەنىڭ ەسىمى قازىر ەل اۋزىندا. بۇل ويىنشىعا «رەال» مادريد كومانداسى قىزىعىپ وتىر. ەگەر كريشتيانۋ رونالدۋدىڭ «يۋۆەنتۋسقا» اۋىساتىنى راستالسا, وندا «رەال» مباپپە ءۇشىن قارجىنى ايامايتىنى انىق. ال تۋريندىك كلۋب رونالدۋدى ساتىپ الۋ ءۇشىن شابۋىلشى گونسالو يگۋايندى «چەلسيگە» 60 ميلليونعا ساتىپ تا ۇلگەردى. ەندى جاقىن كۇندەرى بۇل ساۋالدىڭ دا جاۋابىن ەستيتىن بولامىز.
سونىمەن فرانتسيا – بەلگيا اراسىنداعى ويىننىڭ ءفاۆوريتى – ديدە دەشام شاكىرتتەرى. الايدا بەلگيا دا قاراپ قالماسى انىق. بەلگيا 5 ويىندا 14 گول سوقتى. ال فرانتسۋزدار تەك 9 گول سالعان. ەسەسىنە, فرانتسيا قاقپاسىنا 5-اق گول جىبەرسە, «قىزىل سويقاندار» 4 دوپ وتكىزىپ الدى. ەۋروپا چەمپيوناتىنىڭ ءفيناليسى قورعانىسىمەن ماقتانسا, بەلگيا توپىرلاتىپ گول سوعاتىن شابۋىلىمەن دارالانادى. العاشقى جارتىلاي فينالدىق كەزدەسۋ 10 شىلدە كۇنى سانكت-پەتەربۋرگ قالاسىندا وتەدى. ويىن استانا ۋاقىتىمەن تۇنگى 00.00-دە باستالماق.
ەكىنشى جارتىلاي فينالدا حورۆاتيا مەن انگليا كەزدەسەدى. بۇل كوماندالاردىڭ اراسىنداعى ويىندا دا قىزىقتى وقيعا ورىن الۋى مۇمكىن. وعان سەبەپ كوپ. ەكەۋى دە پەنالتي سەريالارىن جاقسى پايدالانا الادى. ەكەۋى دە, قورعانىستى قىمتاپ ۇستايدى. الايدا بۇل كوماندالاردىڭ تاريحتاعى ەكى كەزدەسۋى قيان-كەسكى كەزدەسۋ بولاتىنىنا سەندىرەدى. بۇرىندارى بولعان جىلى قارىم-قاتىناستى حورۆاتتار وزدەرى قۇرتقان. 2008 جىلعى ەۋرو جارىسىنىڭ ىرىكتەۋىندە توپتان شىعىپ قويعان حورۆاتيا لوندوندا انگليانى جەڭىپ, بريتانيالىقتاردى ىرىكتەۋدەن وتكىزبەي تاستاعان. وسى ويىندا تەڭ ناتيجە ەكى كومانداعا دا جەتكىلىكتى ەدى. شاقپاق جەيدەلىلەردىڭ بۇل ىسىنە شامدانباعان اعىلشىن قالماعان-دى.
كەك ساقتاعان اعىلشىن ويىنشىلارى وسى ءبىر جاعىمسىز وقيعانى ەسكە سالىپ, حورۆاتتاردى جەر قىلىپ ۇتۋدىڭ ءساتىن كۇتتى. 2010 جىلعى الەم چەمپيوناتىنىڭ ىرىكتەۋىندە جەرەبە ەكى كوماندانى تاعى دا ءبىر توپقا ءتۇسىردى. 2008 جىلى 10 قىركۇيەكتە زاگرەبتەگى «ماكسيمير» ستاديونىندا انگليا حورۆاتيانى 4:1 ەسەبىمەن اياماي ۇتتى. تەو ۋولكوت حەت-تريك جاساپ, ۋەين رۋني ونى قوستاي كەتتى. ودان كەيىن جاۋاپتى ويىندا اعىلشىن اياقدوپشىلارى تاعى دا ەكىلەنە وينادى. قوناققا كەلگەن حورۆاتيانى 5:1 قىلىپ, ماسقاراسىن شىعاردى. اعىلشىنداردىڭ شاقپاق جەيدەلىلەرگە دەگەن وكپەسى قارا قازانداي بولعانى سونشالىق, كەك الۋ پروتسەسى بۇل ويىندارمەن دە شەكتەلگەن جوق. ۇلىبريتانيالىق فۋتبولشىلار توپتاعى ءبىرىنشى ورىندى 100 پايىز الاتىنى بەلگىلى بولعان سوڭ, حورۆاتياعا تىكەلەي باسەكەلەس بولىپ تۇرعان ۋكراينادان ادەيى جەڭىلىپ, انگلياعا گول سوققان ماندجۋكيچتىڭ وتانداستارىن مۋنديالعا وتكىزبەي تاستادى. ەكى ورتادا پايداسىن ۋكراينا كوردى. بۇل وقيعا ءالى دە جانكۇيەر جادىندا.
حورۆاتيا قۇراماسىندا قازىر دەيان لوۆرەننەن باسقا اعىلشىن چەمپيوناتىندا ونەر كورسەتەتىن فۋتبولشى جوق. ەسكى كەك ۇمىتىلدى ما, جوق, بۇل جولى بارلىعى باسقاشا بولا ما, ونى تەك جاسىل الاڭ عانا كورسەتەدى. 11 شىلدە كۇنگى ەكىنشى جارتىلاي فينالدىڭ سوڭى توبەلەسكە ۇلاسىپ, جاعا جىرتىسۋعا دەيىن بارۋى مۇمكىن. حورۆاتتاردىڭ دا ەسە قايتارعىسى كەلەرى انىق.
ەرمۇحامەد ماۋلەن,
«ەگەمەن قازاقستان»
