ەلوردا تويى – نيۋ-يوركتە
قازاقستاننىڭ نيۋ-يوركتەگى بىرىككەن ۇلتتار ۇيىمى جانىنداعى تۇراقتى وكىلدىگىندە استانانىڭ 20 جىلدىعى اتاپ ءوتىلدى. سالتاناتتى قابىلداۋعا بىرىككەن ۇلتتار ۇيىمىنىڭ ءتۇرلى قۇرىلىمدارىنىڭ باسشىلارى, بۇۇ-عا مۇشە مەملەكەتتەردىڭ وكىلدەرى, حالىقارالىق ۇيىمداردىڭ بولىمشە باسشىلارى مەن نيۋ-يوركتەگى بۇۇ جانىنداعى ۇكىمەتتىك ەمەس ۇيىمداردىڭ باسشىلارى, ساراپشىلار مەن جۋرناليستەر قاتىستى.
كەشتى اشقان قازاقستاننىڭ بۇۇ جانىنداعى تۇراقتى وكىلى قايرات وماروۆ استانانىڭ قالىپتاسۋ تاريحى, قالانىڭ زاماناۋي دامۋى مەن الەمدىك ارەناداعى ءرولى تۋرالى مالىمدەدى. ول استانانىڭ جەتىستىكتەرى قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ ەسىمىمەن تىعىز بايلانىستى ەكەنىن ايتتى.
بۇۇ باس حاتشىسىنىڭ ورىنباسارى, ەڭ ناشار دامىعان ەلدەر, تەڭىزگە شىعار جولدارى جوق دامۋشى ەلدەر, جانە شاعىن ارالدارداعى دامۋشى ەلدەر بويىنشا بۇۇ جوعارعى وكىلى فەكيتاموەلوا ۋتويكامانۋ قازاقستان استاناسىنىڭ مەرەيتويىمەن قۇتتىقتادى. ءوز سوزىندە ول استانا ءۇمىت پەن تابىستى ترانسفورماتسيانىڭ سيمۆولىنا اينالعانىن اتاپ ءوتتى. سونىمەن قاتار بۇۇ باس حاتشىسىنىڭ ساياسي ماسەلەلەر جونىندەگى ورىنباسارى روزماري ديكارلو دا استانانىڭ سەرپىندى جانە قىزىقتى قالا ەكەندىگىن ايتتى.
ءىس-شارا بارىسىندا «استانا – بەيبىتشىلىك قالاسى» ءفيلمى كورسەتىلدى, سونداي-اق قازاقستان رەسپۋبليكاسى تۇڭعىش پرەزيدەنتى قورى ازىرلەگەن استانانىڭ 20 جىلدىق مەرەيتويىنا ارنالعان «A Day in Astana» مەرەيتويلىق فوتوالبومى ۇسىنىلدى.
تۇركياداعى تورقالى توي
قازاقستاننىڭ تۇركياداعى ەلشىلىگى استانانىڭ 20 جىلدىعىنا وراي « ۇلى دالا استاناسى» اتتى حالىقارالىق كونفەرەنتسيا ۇيىمداستىردى. ءىس-شاراعا تۇركيا رەسپۋبليكاسى پرەزيدەنتىنىڭ باس كەڭەسشىسى يالچىن توپچۋ, ۇلى ۇلتتىق ءماجىلىسىنىڭ ەكس-سپيكەرى حيكمەت چەتين, بۇرىنعى مادەنيەت ءمينيسترى نامىك كەمال زەيبەك, بۇرىنعى دەنساۋلىق ساقتاۋ ءمينيسترى حاليل شىۆگىن, قوجا احمەت ياساۋي ۋنيۆەرسيتەتى وكىلەتتى كەڭەسىنىڭ توراعاسى مۇسا يىلدىز جانە تۇرىك زيالى قاۋىمى, كاسىپكەرلەر مەن ىسكەرلەرى, ەلشىلەر مەن شەتەلدىك ديپلوماتيالىق مەكەمەلەردىڭ وكىلدەرى قاتىستى.
جيىندى قازاقستاننىڭ تۇركياداعى ەلشىسى ابزال ساپاربەك ۇلى قۇتتىقتاۋ سوزبەن اشىپ, «تۇركيانىڭ قازاقستان تاۋەلسىزدىگىن العاشقىلاردىڭ ءبىرى بولىپ مويىنداعانىن, باۋىرلاس ەكى ەل اراسىندا تىعىز قارىم-قاتىناس ورناپ, ەلباسى باستاماسىمەن ىرگەسى قالانعان استانانىڭ قۇرىلىسىنا تۇرىك ينۆەستورلارى مەن كاسىپكەرلەرى بەلسەنە اتسالىسقانىن اتاپ ءوتتى.
تۇركيا پرەزيدەنتىنىڭ باس كەڭەسشىسى يالچىن توپچۋ: «بولاشاقتا قازىرگى الەم تاريحى جازىلار ۋاقىتتا قازاقستان مەن قازاق تۇركىلەرى بولىمىندە «تۇڭعىش پرەزيدەنت», «تۇركى دۇنيەسىنىڭ اقساقالى نۇرسۇلتان نازارباەۆ», «استانا قالاسى» دەگەن سوزدەر ءبىر ۇعىمعا اينالىپ, قاتار اتالاتىن بولادى. نۇرسۇلتان نازارباەۆ تاۋەلسىز ەلدىڭ سيمۆولى رەتىندە استانانى ىرگەتاسىنان باستاپ تۇبەگەيلى جوسپارلاپ, ءاربىر عيماراتتىڭ قۇرىلىسىن قالتقىسىز قاداعالاپ, ءار كىرپىشىن قامقور قولمەن قالادى», دەدى.
جيىننىڭ اياسىندا استانانىڭ 20 جىلدىعىنا ەلشىلىكتىڭ تارتۋى رەتىندە قازاق جانە تۇرىك تىلدەرىندە جارىق كورگەن « ۇلى دالا استاناسى» اتتى كىتاپتىڭ ارنايى تانىستىرىلىمى ءوتتى.
ازەربايجان استاناسىنداعى ايرىقشا كورمە
ازەربايجان استاناسىنداعى گەيدار اليەۆ ورتالىعىندا قازاقستان ەلورداسىنىڭ 20 جىلدىعىنا ارنالعان «استانا – ۇلى دالا جاۋھارى» اتتى فوتوكورمە ءوتتى. ءىس-شارا قازاقستاننىڭ تۇڭعىش پرەزيدەنتى – ەلباسى قورىنىڭ, قازاقستاننىڭ ازەربايجانداعى ەلشىلىگىنىڭ جانە گەيدار اليەۆ قورىنىڭ ۇيىمداستىرۋىمەن ءوتتى.
مادەني شارانى تۇڭعىش پرەزيدەنت-ەلباسى قورى اتقارۋشى ديرەكتورىنىڭ ورىنباسارى يگور روگوۆ پەن گەيدار اليەۆ ورتالىعى ديرەكتورىنىڭ ءبىرىنشى ورىنباسارى اديل كەريملي اشتى.
فوتوكورمەنى ازەربايجاننىڭ بەلگىلى مەملەكەت قايراتكەرلەرى, ديپلوماتيالىق كورپۋس, مادەنيەت قايراتكەرلەرى جانە جۋرناليستەر تاماشالادى. قۇرمەتتى قوناقتاردىڭ ىشىندە ازەربايجان پارلامەنتىنىڭ دەپۋتاتتارى, ۆەنەتسيالىق كوميسسيانىڭ پرەزيدەنتى دجانني بۋكيككيو جانە ازەربايجاننىڭ كونستيتۋتسيالىق سوتىنىڭ توراعاسى فارحاد ابدۋللاەۆ باستاعان ەۋروپا جانە تمد ەلدەرىنىڭ كونستيتۋتسيالىق سوتتارىنىڭ باسشىلارى بولدى.
مادەني ءىس-شارا بارىسىندا كەلگەن قوناقتارعا استانانىڭ 20 جىلدىعىنا ارنالعان «A Day in Astana» فوتوالبومى جانە «بۋراباي» ۇلتتىق مەملەكەتتىك تابيعي باعىنا ارنالعان «A Day in Burabay» اتتى فوتوالبومدارى تارتۋ ەتىلدى.
حورۆاتياداعى جيىن استانانىڭ دامۋ تاريحىنا ارنالدى
حورۆاتيا استاناسى زاگرەب قالاسىندا قازاقستان ەلورداسىنىڭ 20 جىلدىعىنا وراي «استانا – قازاقستاننىڭ تاۋەلسىزدىگى مەن پروگرەستىڭ ءرامىزى» اتتى دوڭگەلەك ۇستەل وتىرىسى ءوتتى. ءىس-شارانى قازاقستاننىڭ حورۆاتياداعى ەلشىلىگى «حورۆاتيا-قازاقستان» دوستىق قوعامىمەن بىرلەسىپ ۇيىمداستىردى.
جيىن بارىسىندا قازاقستاننىڭ جاڭا ەلورداسىن قۇرۋ تاريحى جانە ونىڭ ەلدىڭ ساياسي, الەۋمەتتىك-ەكونوميكالىق جانە مادەني دامۋىنداعى ءرولى تۋرالى مۋلتيمەديالىق تانىستىرىلىم جانە فيلم كورسەتىلدى.
وتىرىسقا قاتىسۋشىلار قازاقستان پرەزيدەنتى نۇرسۇلتان نازارباەۆتىڭ جاڭا ەلوردا قۇرۋداعى كورنەكتى رولىنە كەڭىنەن توقتالدى. سونىمەن قاتار استانانىڭ الەمدىك ۇنقاتىسۋ, سەنىم جانە ءوزارا تۇسىنۋشىلىك ورتالىعى رەتىندەگى ورنى دا ايرىقشا اتالىپ ءوتتى.
اۋسترياداعى سالتاناتتى كەش
قازاقستاننىڭ اۋسترياداعى ەلشىلىگىندە استانانىڭ 20 جىلدىعىنا جانە قازاقستان ديپلوماتيالىق قىزمەت كۇنىنە وراي سالتاناتتى كەش ءوتتى.
كەزدەسۋدە ەلشى قايرات سارىباي قوناقتارعا بۇۇ قاۋىپسىزدىك كەڭەسىندەگى قازاق ديپلوماتتارى جۇمىسىنىڭ ناتيجەلەرى تۋرالى مالىمدەپ, استانادا وتكەن ماڭىزدى باستامالارىمەن, ونىڭ ىشىندە ەقىۇ, اوسشك, يىۇ, شىۇ, تمد, ەەو سامميتتەرىنىڭ, الەمدىك جانە ءداستۇرلى دىندەر كوشباسشىلارىنىڭ سەزدەرى مەن ەكسپو-2017 كورمەسىنىڭ قورىتىندىلارىمەن تانىستىردى.
قازاقستان ديپلوماتتارىن استانانىڭ 20 جىلدىعىمەن جانە كاسىبي مەرەكەسىمەن قۇتتىقتاۋعا اۋستريا جانە سلوۆەنيا قوعامدىق-ساياسي توپتارىنىڭ, اۋستريا ءسىم-ءنىڭ, ديپلوماتيالىق كورپۋستىڭ وكىلدەرى, اۋستريا جانە سلوۆەنياداعى قازاقستاننىڭ قۇرمەتتى كونسۋلدارى, حالىقارالىق ۇيىمداردا جۇمىس ىستەيتىن قازاقستاندىق ازاماتتار, اۋستريا-قازاقستان قوعامىنىڭ وكىلدەرى, قازاق دياسپوراسى مەن ستۋدەنتتەر قاتىستى.
ساۋد ارابياسىندا باس قالانىڭ ساۋلەتى تانىستىرىلدى
قازاقستان رەسپۋبليكاسىنىڭ ساۋد ارابياسى كورولدىگىندەگى ەلشىلىگى عيماراتىندا استانا قالاسىنىڭ 20 جىلدىق مەرەيتويىنا وراي فوتوكورمە ۇيىمداستىرىلدى.
فوتوكورمەگە ساۋد ارابياسىنىڭ لاۋازىمدى تۇلعالارى, ىسكەر توپتارى, مادەني تۇلعالار, ديپلوماتيا جانە باق وكىلدەرى قاتىسىپ, استانا قالاسىنىڭ اسەم بەينەسى مەن نەگىزگى ارحيتەكتورلىق ەرەكشە ورىندارى, سونداي-اق قازاقستاننىڭ الۋان ءتۇرلى تابيعاتى بەينەلەنگەن سيرەك ەكسپوزيتسيالاردى تاماشالادى.
دايىنداعان قامبار احمەت,
«ەگەمەن قازاقستان»
