سونىمەن ءدۇبىرلى بايگەنىڭ الدىندا 29 ماۋسىمدا باستالىپ, اقتىق سايىسىن 6 شىلدەگە ورايلاستىرعان كوكپاردىڭ فينالدىق جەكپە-جەگى ۇيىمداستىرىلدى. باسەكە 15 كوماندادان فينالدىق كەزدەسۋگە جولداما العان جامبىل وبلىسىنىڭ «اۋليە اتا», تۇركىستان وبلىسىنىڭ «قۇلاگەر», ماڭعىستاۋدىڭ «اداي اتا» جانە قىزىلوردا وبلىسىنىڭ «سەيحۋن» كوماندالارى اراسىندا ءوتتى. ناتيجەسىندە, «سەيحۋندى» جەڭگەن ماڭعىستاۋ كوكپارشىلارى III ورىنعا تابان تىرەسە, نەشە جىلدان بەرى چەمپيوندىقتى بەرمەي كەلە جاتقان جامبىل وبلىسى II ورىندى قاناعات تۇتتى. ءسويتىپ جاقىندا عانا مارتەبەسى وسكەن تۇركىستان وبلىسىنىڭ كومانداسى جەڭىمپاز اتانىپ, مەرەيى ۇستەپ, مەيماناسى تاسىدى.
قازاق ءۇشىن قاشاندا بايگەنىڭ ورنى ەرەكشە ەكەنىن تاعاتسىزدانا كۇتكەن كورەرمەن تاعى دا ءبىر دالەلدەدى. بايگە 16 شاقىرىمدىق كىشى الامان, 25 شاقىرىمدىق ۇلكەن الامان بولىپ ءبولىندى. ۇيىمداستىرۋشىلار الاڭ ولشەمىن ەسكەرىپ, ءار وڭىردەن ەكەۋدەن عانا ات قاتىستىرعان بۇل بايگەگە وبلىستاعى تاڭداۋلى, الدىنا قارا سالماعان جۇيرىكتەر كەلگەن. سونىمەن العاشقى 16 شاقىرىمدىق الامانعا قاتىسقان 24 اتتان مارەگە 8 ات كەلدى. ونىڭ بەسەۋىنە جۇلدە بەرىلدى.
الماتى وبلىسىنىڭ تالعار قالاسىنان كەلگەن ءۇش جاسار «مۇراگەر» ەسىمدى كوك قۇنان قارا ءنوپىر قالىڭ ەلدى شۋلاتىپ ءبىرىنشى كەلدى. جۇيرىكتىڭ يەسى – مەرحات بۇلعىنوۆ, باپكەرى – ايدىن ۇتباەۆ. ال شاباندوزى ايگىلى جەل تاقىم اقجول جۇماتاي. ءبىرىنشى ورىنعا 3 300 000 تەڭگە كولەمىندەگى جۇلدە بەرىلدى.
ەكىنشى بولىپ قاراعاندى وبلىسىنىڭ «لايت ەندجل» اتتى اعىلشىن تۇقىمدى كۇرەڭ دونەنى كەلدى. ات يەسى – دۋلات باەشوۆ, ال بايگەگە جاراتقان باپكەرى – شاريزات قازتاەۆ, شاباندوزى – راحمەن الىشەر. ولار 1 850 000 تەڭگە كولەمىندەگى جۇلدەمەن ماراپاتتالدى.
ارنۇر كۋرۆانجان تاقىمداعان استانا قالاسىنىڭ «الماتى» ەسىمدى ءۇش جاسار اعىلشىن تۇقىمدى جيرەنى مارەگە ءۇشىنشى بولىپ جەتتى. بايگەگە جاراتقان باپكەرى – ماقسات توكەنوۆ بولسا, يەسى – قۋانىش اكىمجانوۆ. ءۇشىنشى جۇلدەگەر 1 200 000 تەڭگە كولەمىندەگى سىيلىقپەن ماراپاتتالدى.
دامير سۇلەيمەنوۆ مىنگەن شىعىس قازاقستان وبلىسىنىڭ تاسكەسكەن اۋىلىنان كەلگەن «سوزيدان» ەسىمدى جيرەن قاسقا تىزگىندى ءتورتىنشى بولىپ ۇستاتتى. ات يەسى – ەراسىل سۇلەيمەنوۆ بولسا, باپكەرى – بەكەن اباقانوۆ. ولارعا 550 000 تەڭگە تابىستالدى.
بەسىنشى ورىن باتىس قازاقستان وبلىسىنىڭ جاڭاقالا اۋدانىنان كەلگەن سەرىك بەكقايىروۆتىڭ «روزا» ەسىمدى ءۇش جاسار جۇيرىگىنە بۇيىردى. اتتى جاراتقان باپكەر – ماقسات بەكقايىروۆ, شاباندوزى – بەكزات سادۋاقاس. جۇلدە – 400 000 تەڭگە.
ەندىگى قىزىق 25 شاقىرىمدىق بايگەدە. ەلدىڭ دە دەلەبەسى ابدەن قوزعان. الدىنان شاۋىپ وتكەن جۇيرىكتەردىڭ قايسىسى ءبىرىنشى كەلەتىنىن بولجام جاساپ, باستەسىپ جاتقاندارى دا از ەمەس. كىمنىڭ قانداي اتتى بەلگىلەپ وتىرعانى دا كوپشىلىككە حابارلانىپ, تاقىم قىسقان جۇرتتىڭ قاراسى ونان سايىن مولايا بەردى. ءسويتىپ ۇلكەن الاماننىڭ جۇلدەلى جۇيرىكتەرى دە انىقتالدى.
ساعىمداي جۇيتكىپ, جۇلدىزداي اققان بەكزات سادۋاقاستىڭ تاقىمىنداعى باتىس قازاقستان وبلىسىنىڭ جاڭاقالا اۋدانىنان كەلگەن سەرىك بەكقايىروۆتىڭ «قاراكوز» ەسىمدى ءۇش جاسار اعىلشىن تۇقىمدى تورىسى باسقالارىنان وزىق كەلدى. اتتى جاراتقان باپكەر ماقسات بەكقايىروۆ 6 600 000 تەڭگە كولەمىندەگى جۇلدەنى قانجىعالادى.
ەكىنشى بولىپ «قاراكوزگە» شىلبىرتاستام عانا جەتپەي اقجول جۇماتاي مىنگەن «بۇيراجال» اتتى قاراعاندى وبلىسىنىڭ اعىلشىن تۇقىمدى جيرەن قاسقا بەستىسى كەلدى. ات يەسى – نۇرلىبەك مۇحامەدياروۆ, ال بايگەگە جاراتقان باپكەرى – باقتيار قۇرالباەۆ. ولار 3 300 000 تەڭگە كولەمىندەگى جۇلدەنى يەلەندى.
ورازالى جورابەك تىزگىندەگەن الماتى قالاسىنىڭ «ۆەرنىي» ەسىمدى اعىلشىن تۇقىمدى كۇرەڭ بەستىسى ءۇشىنشى بولىپ جەتتى. بايگەگە جاراتقان باپكەرى – ايدىن ۇتباەۆ. ءۇشىنشى ورىنعا 1 650 000 تەڭگە كولەمىندەگى سىياقى بەرىلدى.ءتورتىنشى بولىپ حاكيمبەك قوجاقوۆ مىنگەن جامبىل وبلىسىنان كەلگەن «سۇڭقارتورى» ەسىمدى اعىلشىن تۇقىمدى تورى قۇنان كەلدى. ات يەسى – دياس مىرزاحان بولسا, باپكەرى – باقىتبەك سىبانباەۆ. بۇل ورىنعا 650 000 تەڭگە كولەمىندەگى جۇلدە تاعايىندالىپتى.
ارنۇر كۋرۆانجاننىڭ تاقىمىندا ويناعان «باقتورى» ەسىمدى سايگ ۇلىك بەستىكتى تۇيىندەدى. استانا قالاسى اتىنان قاتىسقان اعىلشىن تۇقىمدى تورى بەستى. جۇيرىكتىڭ يەسى – قۋانىش اكىمجانوۆ, ال باپكەرى – ماقسات توكەنوۆ. بەسىنشى ورىن جۇلدەسى – 500 000 تەڭگە.
سونىمەن سەگىز كۇن بويى ەلورداداعى «قازانات» اتشابارىن دۇبىرگە بولەگەن قازاقستاننىڭ چەمپيوناتى وسىلايشا اياقتالدى. چەمپيوناتتىڭ جابىلۋ سالتاناتىنا استانا قالاسى اكىمىنىڭ ورىنباسارى ەرمەك امانشاەۆ, مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ, ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان, قازاقستان جازۋشىلار وداعىنىڭ توراعاسى ۇلىقبەك ەسداۋلەت قاتىسىپ, جەڭىمپازداردى ماراپاتتادى.
استانانىڭ 20 جىلدىعىنا وراي قازاقستان رەسپۋبليكاسى ۇلتتىق سپورت قاۋىمداستىعى, مادەنيەت جانە سپورت مينيسترلىگى مەن استانا قالاسى اكىمدىگىنىڭ قولداۋىمەن وتكەن بۇل بايگەنىڭ ۇلكەن الامانىندا ءبىرىنشى كەلگەن حاس جۇيرىك «قاراكوز» الامان بايگەگە تۇڭعىش رەت تىگىلگەن «استانا كۋبوگىن» ەنشىلەپ قايتتى.
ۇلاربەك نۇرعالىم ۇلى,
«ەگەمەن قازاقستان»
