ەرتەمەن جايىق وزەنىنىڭ جاعاسىندا سپورتتىق بالىق اۋلاۋ بويىنشا تۋرنير ءوتتى, جەڭىمپازدار ءتۇرلى نوميناتسيالار بويىنشا جۇلدەلەر مەن سىيلىقتار الدى. شيپاجاي جاعالاۋىندا ەكى بەكىرە زاۋىتى وزەنگە بەكىرە بالىقتارىنىڭ 20 مىڭ شاباعىن جىبەردى. جاس شاباقتاردىڭ سالماعى 3-تەن 10 گراممعا دەيىن.
«بۇگىندە 20 مىڭ شاباقتى جىبەرۋىمىز كەزدەيسوق ەمەس. بيىل اتىراۋ وبلىسىنىڭ اۋماعىندا جۇمىس ىستەيتىن ەكى بەكىرە زاۋىتى وزدەرىنىڭ 20 جىلدىق مەرەيتويىن اتاپ وتۋدە. سونداي-اق, بۇل ماڭىزدى كۇن قازاقستان استاناسىنىڭ 20 جىلدىعىنا تۇسپا-تۇس كەلدى. بۇل جىل سايىنعى ءداستۇر جاس بالىقتاردىڭ شىعارىلۋى ايماقتاعى قۇندى بالىقتار سانىنىڭ ارتۋىنا اسەر ەتەتىنىنە سەنىمدىمىز », - دەيدى جايىق-اتىراۋ بەكىرە زاۋىتىنىڭ ديرەكتورى عيلمان سارسەماليەۆ.
شارا بارىسىندا فەستيۆال قوناقتارى ءۇشىن بەكىرە بالىقتاردىڭ كورمەسى ۇيىمداستىرىلدى.
وبلىستىق اكىمدىكتىڭ الدىنداعى سۇلتان بەيبارىس الاڭىندا اتىراۋ وندىرۋشىلەرىنىڭ بالىق ونىمدەرىنىڭ جارمەڭكەسى باستالدى. مۇندا اتىراۋ قالاسىنىڭ تۇرعىندارى مەن قوناقتار جاڭا پىسكەن, قۇرعاق جانە ىستالعان بالىقتى, سونداي-اق ءار ءتۇرلى جارتىلاي فابريكاتتاردى ساتىپ الدى.
سۇلتان بەيبارىس الاڭىندا بالىقتان ءدامدى تاعام دايىنداۋ, بالىقتى تەز تازالاۋ, بالىق اۋلاۋ جانە كىر تاسىن كوتەرۋ مەن ارقان تارتۋدان جارىستار بولدى. وسىدان كەيىن مەرەكەنىڭ قاتىسۋشىلارى مەن قوناقتارىن بالىقشىلار كۇنىمەن اتىراۋ وبلىسى اكىمىنىڭ ءبىرىنشى ورىنباسارى سەرىك شاپكەنوۆ قۇتتىقتادى.
«جىل سايىن ءبىزدىڭ ەكى بەكىرە زاۋىتى وزەنگە شامامەن 7 ميلليونعا جۋىق جاس شاباقتاردى جىبەرەدى. ءبىزدىڭ وندىرىستىك كووپەراتيۆتەر جىلىنا 12 تونناعا دەيىن بالىق الادى, ولاردىڭ 85-90 پايىزى ەكسپورتتالادى. بۇل اتىراۋ وبلىسىنداعى بالىق ونەركاسىبى جاقسى قارقىنمەن دامىپ كەلە جاتقانىنىڭ تاعى ءبىر كورىنىسى », - دەدى سەرىك شاپكەنوۆ.
شارا بارىسىندا بالىق ونەركاسىبىنىڭ ارداگەرلەرى مەن وسى سالا قىزمەتكەرلەرى سالتاناتتى تۇردە ماراپاتتالدى. اتىراۋ وبلىسىنىڭ اكىمى اتىنان ەڭ باستى ءتورت قىزمەتكەر العىس حات الدى. وبلىستىڭ 15 تۇرعىنى اۋىل شارۋاشىلىعى مينيسترلىگى مەن ورمان جانە جانۋارلار دۇنيەسى ايماقتىق كوميتەتى ديپلومدارىمەن ماراپاتتالدى, سودان كەيىن تۇرعىندار نازارىنا مەرەكەلىك كونتسەرتتىك باعدارلاما ۇسىنىلدى.
ايتا كەتەيىك, بالىقشىلار كۇنى مەرەكەسى ساعات 19.00-دە س.بەيبارىس الاڭىندا مەرەكەلىك كونتسەرت پەن وتشاشۋمەن اياقتالادى.
باقىتگۇل باباش,
«ەگەمەن قازاقستان»
اتىراۋ
