قازاقستان رەسپۋبليكاسى پرەزيدەنتى ءارحيۆىنىڭ ديرەكتورى, تەحنيكا عىلىمدارىنىڭ دوكتورى, پروفەسسور بوريس جاپاروۆتىڭ العى سوزىمەن اشىلعان شارا بارىسىندا كوپشىلىك نازارىنا تاريحي-قۇجاتتىق كورمە مەن دەرەكتى فيلم ۇسىنىلدى. سول كورىنىستەر ارقىلى تاريحي شەشىمنىڭ قالاي قابىلدانعانى, ۇلى كوشتىڭ باستالۋى, ەل استاناسىنىڭ العاشقى كەزەڭدەگى تىنىس-تىرشىلىگى, اقمولانىڭ استاناعا اينالۋى جانە باسقا دا قۇندى دەرەكتەرگە قانىق بولدىق.
– 1997 جىلدىڭ 20 قازانىندا ەلباسى نۇرسۇلتان نازارباەۆ اقمولانى قازاقستان رەسپۋبليكاسىنىڭ استاناسى دەپ جاريالادى. سول جىلدىڭ 25 قازانىندا ەلىمىزدىڭ مەملەكەتتىك رامىزدەرى الماتىدان اقمولاعا كوشىرىلدى. ال 1998 جىلدىڭ 6 مامىرىندا پرەزيدەنتتىڭ جارلىعىمەن اقمولا قالاسىنىڭ اتاۋى استانا دەپ وزگەرتىلدى. بىرتە-بىرتە ۇكىمەتتىك ۇيىمدار مەن باسقا دا مەكەمەلەر ارقا توسىنە قونىس اۋدارىپ, قۇرىلىس جۇمىستارى قارقىندى تۇردە جۇرگىزىلە باستادى. ناتيجەسىندە, قىسقا عانا مەرزىم ارالىعىندا ءزاۋلىم عيماراتتار بىرىنەن كەيىن ءبىرى بوي كوتەرىپ, جاڭا استانامىز كەرەمەت كەيىپكە ەندى. تۇرعىندار سانى كۇرت ءوستى. وراسان زور ماڭىزى بار ساياسي, ەكونوميكالىق, الەۋمەتتىك-مادەني ءىس شارالار مەن فورۋمداردىڭ ءجيى ۇيىمداستىرىلۋىنىڭ ارقاسىندا الەمدىك قوعامداستىق الدىندا استانانىڭ بەدەلى مەن تانىمالدىعى ارتتى. بۇل كۇندەرى رەسپۋبليكامىزدىڭ باس قالاسى ادام تانىماستاي بولىپ وزگەردى. وعان بارشا جۇرت كۋا. 1999 جىلى يۋنەسكو ۇيىمى استاناعا «الەم قالاسى» مارتەبەسىن بەردى. وسىنىڭ بارلىعى دا قازاقستان رەسپۋبليكاسىنىڭ پرەزيدەنتى – ۇلت كوشباسشىسى نۇرسۇلتان نازارباەۆتىڭ باتىل يدەياسى مەن كورەگەندىگى جانە سىندارلى ساياساتىنىڭ ارقاسىندا جۇزەگە استى, – دەيدى قازاقستان رەسپۋبليكاسى پرەزيدەنتى ءارحيۆىنىڭ ديرەكتورى.
الماتىدا ۇيىمداستىرىلعان وسى ءىس-شاراعا مەملەكەت جانە قوعام قايراتكەرلەرى, ارحيۆ جانىنداعى قوعامدىق كەڭەس مۇشەلەرى جانە ارحيۆ ءىسىنىڭ ارداگەرلەرى مەن قىزمەتكەرلەرى قاتىستى.
عالىم سۇلەيمەن,
«ەگەمەن قازاقستان»
الماتى
