مارتينە ريۆاسي-وففانت,
سۋرەتشى (فرانتسيا):
– استانا – جاڭا قالا. بۇل مەملەكەت ءۇشىن جاقسى, ال سۋرەتشىگە پەيزاج كەرەك. سوندىقتان دا بولار, باسىندا استاناعا ساپارىم قالاي بولادى ەكەن دەپ ۋايىمدادىم. بىراق قالا ماڭىنداعى ادەمى كورىنىستەردى كورگەننەن كەيىن جاقسى كورىپ كەتتىم. استانادا مەن گارمونيانى سەزىندىم. جازىق دالادا بوي كوتەرگەن ەرەكشە قالا. اسىرەسە قىس مەزگىلىندە وتە سۇلۋ. ال سول جاعالاۋدا زاماناۋي ءستيلدىڭ كۋاسى بولساڭ, وڭ جاعالاۋدا ەسكى قالانىڭ كورىنىسى اشىلادى. بۇل ساباقتاستىقتى سۋرەتشى رەتىندە ەرەكشە جىلى قابىلدادىم.
نيكوليا رۋچتي, قوعاممەن بايلانىس مامانى (شۆەيتساريا):
– مەن بۇرىننان ازيا مەملەكەتتەرىن جاقسى كورەمىن. بىرنەشە جىل قىتايدا تۇردىم. كەيىن قازاقستانعا بارۋعا مۇمكىندىك تۋدى. شىنىمدى ايتسام, پوستكەڭەستىك ەلدەردىڭ ءبىرى بولعاندىقتان, سول زاماننىڭ ارحيتەكتۋراسىن كورەتىن شىعارمىن دەگەن كۇدىك باسىم بولدى. بىراق استاناعا كەلگەندە, قالانىڭ سۇلۋلىعىنا ەرەكشە تامساندىم.
«Tour de France»-قا ءجيى قاتىساتىن «استانا» ۆەلوكومانداسىن ءبىزدىڭ ەلىمىزدە كوپ ادام بىلەدى. «استانا» ۆەلوكوماندانىڭ اتاۋى رەتىندە عانا قابىلدانادى. بىراق ءوز كوزىممەن كورگەن سوڭ, مەن ەندى قالا تۋرالى كوپ ايتاتىن بولامىن.
سينان ۋديل,
مەنەدجەر (انكارا):
– استانامەن تانىستىعىم بىرنەشە جىل بۇرىن عانا بولدى. تمد ەلدەرىنىڭ ىشىندە ەڭ ۇناعانى, جۇرەگىمە جاقىنى وسى شاھار ەكەنىن ءتۇسىندىم. استاناعا كەلگەن بەتتە ادامداردىڭ بىلىمدىلىگىن كورىپ, تاڭعالدىم. ودان كەيىن قالانىڭ ءبىر-بىرىنە ۇقسامايتىن, ارحيتەكتۋراسى ەرەكشە عيماراتتارى تامساندىردى. «حان شاتىر» كەشەنىنىڭ ءوزى قايتالانباس ارحيتەكتۋرا ەكەنى, الەمدە وعان ۇقساس عيماراتتاردىڭ جوق ەكەنى ەلوردانىڭ ەرەكشەلىگىن كورسەتسە كەرەك.
گابريەل ماكگۋاير (اقش):
– مەن ورتالىق ازيانىڭ مادەنيەتى مەن ادەبيەتىنە قىزىعىپ, قازاقستانعا قازاق ءتىلىن ۇيرەنۋ ءۇشىن باردىم. الدىمەن وڭتۇستىك قازاقستاندا تۇردىم. اقش-قا كەتپەس بۇرىن استانادا جۇمىس ىستەۋ تۋرالى ويلانا باستادىم. 2007 جىلى استاناعا قىدىرىپ كەلدىم. قالادا بيىك عيماراتتار كوپ, كوشەدە ادام از بولعانى ماعان تاڭسىق كورىندى, ءتىپتى عىلىمي فانتاستيكا سەكىلدى بولدى. قازىر قالا وزگەرگەن. مەنى ەڭ ءبىرىنشى تاڭعالدىرعانى – 20-دان اسقان, جۇمىسى, تۇراقتى تابىسى بار ادامداردىڭ اتا-اناسىمەن تۇرۋى بولدى. بىزدە اتا-اناڭدى تەك دەمالىس كۇندەرى كورۋگە بارىپ قايتاتىندىقتان, بۇل ءداستۇر ەرەكشە اسەر ەتتى, ءارى بىردەن قۇرمەتتەۋگە لايىق ءۇردىس ەكەن دەپ ويلادىم. سەبەبى بۇل تۋىستىق قارىم-قاتىناستىڭ بەرىكتىگىن كورسەتەدى.
