«ەلباسىنىڭ شىلدەنىڭ 1-ءشى جۇلدىزىن ۇلتتىق دومبىرا كۇنى مەرەكەسىن ەتىپ بەلگىلەگەنىنە ريزامىن. قانشا ورىس مەكتەبىن بىتىرسەك تە, دومبىرانىڭ ءۇنىن ەستىگەندە ەلەڭدەپ قالامىز, قان تارتادى عوي. مەنىڭ نەمەرەم «جۇلدىز» بالالار ستۋدياسىنا دومبىرا ۇيرەنۋگە بارادى. قازىر ول وسى ستۋديانىڭ بالالارىمەن بىرگە پاريجدە بايقاۋعا قاتىسىپ ءجۇر. ۇلتىمىزبەن بىرگە جاساپ كەلە جاتقان دومبىرانىڭ قازاققا بەرگەنى كوپ» دەيدى كورەرمەن گۇلنار مۇرزينا.
كونتسەرتتە كورەرمەندەر تەك ءان-كۇي تىڭداپ عانا قويعان جوق, دومبىرا تۋرالى ۆيكتورينالىق سۇراقتارعا جاۋاپ بەرىپ, كادەسىيلار الدى. سونىمەن قاتار مەرەكەگە جينالعاندار ساياباققا تىگىلگەن اقبوز ءۇيدىڭ ىشىندە وبلىستىق تاريحي-ولكەتانۋ مۋزەيى قىزمەتكەرلەرى ۇيىمداستىرعان دومبىرا كورمەسىن دە تاماشالادى. وندا مۇحتار اۋەزوۆتىڭ, امانگەلدى يمانوۆتىڭ, تاعى باسقا قوستاناي وڭىرىنەن شىققان تۇلعالاردىڭ دومبىرالارى جۇرتشىلىق نازارىنا ۇسىنىلدى.
ءبىر قىزىعى, ۇيىمداستىرۋشىلار كونتسەرت اياقتالعان سوڭ, جينالعاندار اراسىنان دومبىرا تارتىپ ونەر كورسەتۋگە تىلەك بىلدىرگەندەرگە مۇمكىندىك بەردى. «ەل ءىشى – ونەر كەنىشى» دەگەن, ساحناعا دومبىرانىڭ قۇلاعىندا وينايتىن ونەرپازدار شىعىپ, كۇي تارتىپ, ءان شىرقادى.
نەگىزى قوستاناي قالاسىندا ۇلتتىق دومبىرا كۇنى مەرەكەسى كۇندىزگى ساعات 11.00-دە ورتالىق امبەباپ كىتاپحاناسى الدىندا «نۇر وتان »پارتياسى وبلىستىق فيليالىنىڭ «جاسا وتان» جاستار قاناتى ۇيىمداستىرعان «دومبرا-party» جاستار اكتسياسىمەن باستالعان بولاتىن. تۇستەن كەيىن قازاقستان حالقى وبلىستىق اسسامبلەياسى مەن وبلىستىق دەنساۋلىق ساقتاۋ باسقارماسى بىرلەسىپ ۇيىمداستىرعان «بالالاردىڭ كوزىندەي قاسيەتتى دومبىرا» اتتى اكتسيا ءوتتى. ۇلتتىق دومبىرا كۇنى قوستانايلىقتاردىڭ رۋحىن اسپانداتتى.
ءنازيرا جارىمبەت
قوستاناي
