«وزدەرىڭىزگە ءمالىم, بيىل ۇلتتىق بىرىڭعاي تەستىلەۋ 167 بەكەتتە ءوتتى. ونىڭ ىشىندە 3 بەكەت – كوللەدج بازاسىندا, 116 بەكەت – مەكتەپ بازاسىندا جانە 48 بەكەت جوعارى وقۋ ورىندارىنىڭ بازاسىندا ورنالاستى. جالپى, وتىنىشتەردىڭ سانى – 102 447, ونىڭ ىشىندە 77 224 (75 پايىز) قازاق تىلىندە, 25 177 ورىس تىلىندە (25 پايىز) جانە 46 ءوتىنىش اعىلشىن تىلىندە بولدى», دەدى ر.الىمقۇلوۆ.
بيىل ءبىرىنشى رەت ۇلتتىق بىرىڭعاي تەستىلەۋدى اعىلشىن تىلىندە تاپسىرۋعا مۇمكىندىك تۋدى. نەگىزى, اعىلشىن تىلىنەن تۇسكەن 46 ءوتىنىشتىڭ ىشىندە 28 مەكتەپ ءبىتىرۋشى عانا تەستىلەۋگە كىردى. ولاردىڭ ىشىندە استانادان – 5, اتىراۋدان – 7, شىمكەنتتەن 6 تۇلەك جانە باسقا دا قالالاردان قاتىسقان. ورتاشا بالل – 84,5, ال اعىلشىن تىلىندە تاپسىرعانداردا 85 بالل بولدى. بۇل تەست نۇسقاۋلارى جانە ساپاسىنىڭ دۇرىستىعىن كورسەتەدى.
«ناقتى ستاتيستيكاعا كەلسەك, ءوتىنىش بەرگەن 102 447 مەكتەپ ءبىتىرۋشىنىڭ ىشىنەن 98 698 ادام ۇلتتىق بىرىڭعاي تەستىلەۋگە قاتىستى. بۇل 96 پايىزدى قۇرايدى. اتالعان كورسەتكىش بىلتىر 95 پايىز بولعان. ياعني قاتىسۋشىلاردىڭ سانى 1 پايىزعا وسكەنىن بايقايمىز. شەكتى بالدى العان تۇلەكتەردىڭ سانى – 84 065. بۇل 85 پايىزدى قۇرايدى. وكىنىشكە قاراي, شەكتى بالدى الماعانداردىڭ سانى – 14 633. ياعني 14 پايىز. بىلتىرعى ستاتيستيكامەن سالىستىرعان كەزدە شەكتى بالدان وتكەندەردىڭ سانى 1 پايىزعا وسكەن. سونداي-اق 9 تۇلەكتىڭ ۇبت ناتيجەسى جوققا شىعارىلدى. قازاقستان بويىنشا ورتاشا بالل – 83,1. بىلتىر بۇل كورسەتكىش 80,5 بالل بولعان», دەدى ول.
بيىل ەڭ جوعارى 140 بالدى الماتى قالاسىنىڭ تۇلەگى الدى. ول – شيارا قۇدايبەرگەنوۆا. بويجەتكەن تەستىلەۋ سىناعىن 25 ماۋسىم كۇنى قازاق ۇلتتىق اگرارلىق ۋنيۆەرسيتەتىندە تاپسىردى.
سونىمەن بىرگە ورتالىق باسشىسى ۇبت-نى تاپسىرا الماعان تۇلەكتەرگە ەكىنشى مۇمكىندىك بەرىلەتىندىگىن جەتكىزدى.
«ولار 25 شىلدە مەن 3 تامىز ارالىعىندا ۇبت-نى ەكىنشى رەت تاپسىرۋعا ءوتىنىش بەرە الادى. ەمتيحاندى تاپسىرا الماعاندار 15 تامىز بەن 19 تامىز ارالىعىندا ۇبت-نى قايتا تاپسىرادى. ەگەر ودان وتپەي قالسا, وندا قىستا قايتادان ءوتىنىش بەرىپ تاپسىرا الادى», دەدى ر.الىمقۇلوۆ.
راۋان قايدار,
«ەگەمەن قازاقستان»
