بايزاق اۋدانىنىڭ ورتالىعى سارىكەمەر اۋىلىندا ورنالاسقان «ەرىك اتا» بالاباقشاسىنىڭ قۇرىلىسىنا 11 ميلليون تەڭگە جۇمسالىپتى. مەرەكە قارساڭىندا پايدالانۋعا بەرىلگەن بوبەكجايدىڭ اشىلۋ سالتاناتىنا بايزاقتىق تۇرعىندار كوپتەپ قاتىسىپ, ەلىمىزدىڭ بۇگىنگى دامۋ دەڭگەيىنە, جامبىل ءوڭىرىنىڭ كۇن ساناپ گۇلدەنىپ كەلە جاتقانىنا ريزاشىلىق ءبىلدىردى. جوسپار بويىنشا مۇنداعى 3 توپتا 75 بالا مەكتەپكە دەيىنگى تاربيەمەن قامتىلادى. ال بالالاردى 6 پەداگوگ قازاق تىلىندە وقىتادى.
سونىمەن قاتار جامبىل اۋدانىنىڭ اقب ۇلىم اۋىلىندا بوي كوتەرىپ, حالىق يگىلىگىنە بەرىلگەن «زەردە» بالاباقشاسىنداعى 2 توپتا 50 بالا وقيدى. اتالعان بالدىرعاندارعا ارنالعان نىساندا جۇمىسپەن قامتىلعان 6 مۇعالىم بالالارعا قازاق تىلىندە ءبىلىم بەرەدى. تاراز قالاسىنىڭ ىرگەسىندە ورنالاسقان اۋىلداعى بالاباقشا زامان تالابىنا ساي جابدىقتالعان.
وبلىس ورتالىعىنان الپىس شاقىرىمداي جەردە ورنالاسقان جۋالى اۋدانىندا بۇل كۇندە «Burnoe Solar-1» كۇن ەلەكتر ستانساسى جۇمىس ىستەيدى. استانا قالاسىنىڭ مەرەيتويىنا وراي «Burnoe Solar-2» جاۋاپكەرشىلىگى شەكتەۋلى سەرىكتەستىگى اشىلدى. اتالعان نىساننىڭ ەكىنشى كەزەڭگى كەشەنىنىڭ قۇرىلىسىنا 22 ميلليارد 667 ميلليون تەڭگە جۇمسالعان. ونىڭ 7 ميل-
ليارد 804 ميلليون تەڭگەسى United Green-Samruk Kazyna جاۋاپكەرشىلىگى شەكتەۋلى سەرىكتەستىگىنىڭ مەنشىكتى قارجىسى بولسا, قالعان 17 ميلليارد 580 ميلليون تەڭگە ەۋروپا قايتا قۇرۋ جانە دامۋ بانكى مەن تازا تەحنولوگيالار قورىنان الىنعان. قۋاتتىلىعى 50 مۆت-نى قۇرايتىن بالامالى قۋات كوزىن ءوندىرۋ نىسانىن سالۋ جۇمىستارىنا 300 ادام تارتىلسا, نىسان ىسكە قوسىلعان سوڭ مۇندا 45 ادام جۇمىسپەن قامتىلادى.
جالپى, ەلوردا تويى – ەلدىكتىڭ تويى بولعان سوڭ, جامبىل وڭىرىندە تۇراتىن ءاربىر ازامات بايتاق شاھاردىڭ قۋانىشتى كۇنىنە ارنالعان اكتسيادان قالىس قالعان جوق. ولاي دەيتىنىمىز, ءوڭىردىڭ بارلىق اۋداندارىندا جاڭا نىساندار ەل يگىلىگىنە بەرىلىپ, حالىق قۋانىشىن ەسەلەدى. مەركى اۋدانىندا 125 وسكىندى مەكتەپكە دەيىنگى تاربيەمەن قامتيتىن «ەرسۇلتان» بالاباقشاسى اشىلدى. بۇل كۇنى مەركىلىكتەر كوپتەن كۇتكەن قۋانىشتى ساتتەرگە كۋا بولدى. اتالعان مەكەمەدە 4 توپ جۇمىس ىستەپ, بالاقايلار 3 تىلدە ءبىلىم الاتىن بولادى. قازىرگى تاڭدا بالاباقشاعا 104 بالا جينالعان.
ەلوردا مەرەيتويى قارساڭىندا قورداي اۋدانىنىڭ تۇرعىندارى دا كوپتەگەن يگىلىككە كەنەلدى. قاسىق اۋىلدىق وكرۋگىنىڭ وزىندە 7 بىردەي نىسان ىسكە قوسىلدى. اتاپ ايتساق, ءالجان انا اۋىلىنىڭ تاريحي مۋزەيى پايدالانۋعا بەرىلدى. مۇندا اۋىل تاريحىنا قاتىستى بارلىق دەرەكتەر جيناستىرىلعان. سونداي-اق اتالعان اۋىلداعى مۋزەي جادىگەرلەرىنىڭ ءبىر پاراسى ءالجان انا مەن ونىڭ تۋىستارىنا ارنالعان. ال ەلباسى نۇرسۇلتان نازارباەۆتىڭ قورداي اۋدانىنا جۇمىس ساپارى بارىسىندا تۇسىرىلگەن ەستەلىك سۋرەتتەر مادەني نىساننىڭ تاريحي مازمۇنىن ارتتىرىپ تۇر. ايتا كەتەيىك, وبلىس اكىمى اسقار مىرزاحمەتوۆتىڭ تاپسىرماسىنا سايكەس, بار بولعانى 1,5 ايدا بوي كوتەرگەن مۋزەي زاماناۋي تسيفرلى تەحنولوگيامەن جابدىقتالعان.
سونىمەن قاتار ءالجان انا اۋىلىندا دارىگەرلىك امبۋلاتوريا اۋىل تۇرعىندارىنا ەسىگىن ايقارا اشىپ, ەل ازاماتتارىنىڭ قۋانىشىن كوبەيتتى. اتالعان نىسان 15 كەلۋشىگە ارنالعان. قۇرىلىسىنا 35 ميلليون تەڭگە جۇمسالعان دارىگەرلىك امبۋلاتوريادا 9 مەديتسينا قىزمەتكەرى جۇمىس ىستەيدى. اۋىل تۇرعىندارىنىڭ دەنساۋلىعىن ساقتاۋ باعىتىمەن قاتار, بۇل جەردە بۇقارالىق سپورتتى دامىتۋعا دا باسا نازار اۋدارىلىپ وتىر. وسى ورايدا ءالجان انا اۋىلىندا سپورت الاڭشاسىنىڭ پايدالانۋعا بەرىلگەنىن اتاپ وتكەن ءجون. بۇل ماقساتقا وبلىستىق بيۋدجەتتەن 8 ميلليون 756 مىڭ تەڭگە ءبولىنىپ, نىساننىڭ قۇرىلىسىن «ال-اركارجان ي ك» جاۋاپكەرشىلىگى شەكتەۋلى سەرىكتەستىگى جۇرگىزگەن.
كەزىندە وندىرىسىمەن ايگىلى بولعان سارىسۋ اۋدانىنىڭ جاڭاتاس قالاسىندا «سوليانايا كومپانيا «اسىل تۇز» جاۋاپكەرشىلىگى شەكتەۋلى سەرىكتەستىگىنىڭ اس تۇزىن وندىرەتىن زاۋىتى ىسكە قوسىلدى. استانانىڭ 20 جىلدىعىنا وراي اشىلعان جاڭا ءوندىرىس وشاعىنىڭ قۇرىلىسىنا 710 ميلليون تەڭگە قاراستىرىلعان. جىلىنا 50 مىڭ توننا اس تۇزىن شىعارۋعا قاۋقارلى كاسىپورىندا جوسپار بويىنشا 75 ادام جۇمىسپەن قامتىلماق. جۇمىسكەرلەردىڭ ورتاشا جالاقىسى 60-80 مىڭ تەڭگە بولادى. جالپى, اتالعان جوبا جامبىل وبلىسى اكىمدىگىنىڭ 2016 جىلى 30 جەلتوقسانداعى №369 قاۋلىسى نەگىزىندە وڭىرلىك كاسىپكەرلىكتى قولداۋ كارتاسىنا ەنگىزىلگەن.
ەلوردا تويىنا تارتۋ نەگىزىندە جامبىل وبلىسىندا جۇزەگە اسقان جۇيەلى جۇمىستار ت.رىسقۇلوۆ اۋدانىندا دا جالعاسىن تاپتى. مەرەيتوي قارساڭىندا اۋدان ورتالىعى قۇلان اۋىلىندا 160 ادامعا ارنالعان دەنەشىنىقتىرۋ-ساۋىقتىرۋ كەشەنى اشىلدى. نىسان قۇرىلىسىنا 362,8 ميلليون تەڭگە بولىنگەن. مەردىگەر «نۇر تۇرسىن» جاۋاپكەرشىلىگى شەكتەۋلى سەرىكتەستىگى كەشەن قۇرىلىسىن وتكەن جىلدىڭ ناۋرىز ايىندا باستاپ, ەلدىكتىڭ مەرەكەسىنە وراي ەل تۇرعىندارىنا تارتۋ ەتتى.
ال تالاس اۋدانى, قاراتاۋ قالاسىندا بيىل قونىستوي كوبەيدى. قاراتاۋلىقتار استانا كۇنىن جاڭا پاتەردە تويلايتىن بولدى. اۋدان ورتالىعىندا 70 پاتەرلى كوپ قاباتتى تۇرعىن ءۇي پايدالانۋعا بەرىلدى. شاعىن شاھاردىڭ 5-شاعىن اۋدانىندا ورنالاسقان №51 ءۇيدىڭ جوندەۋ جۇمىستارىنا 226 ميلليون 886 مىڭ تەڭگە بولىنگەن. سونىمەن قاتار قاراتاۋ قالاسىندا «ەلدانا» بالاباقشاسى پايدالانۋعا بەرىلدى. اتالعان نىسان 50 بالاعا ارنالعان. جوبالىق قۇنى 20 ميلليون تەڭگەنى قۇرايتىن مەكتەپكە دەيىنگى ءبىلىم بەرۋ مەكەمەسىندە بالالاردىڭ زامانعا ساي ءبىلىم الۋىنا بارلىق مۇمكىندىك جاسالعان.
شۋ اۋدانىنىڭ ورتالىعى تولە بي اۋىلىندا «نۇر-اش» جانە «لاشىن» بالاباقشالارى ءوز جۇمىسىن باستادى. جالپى قۇنى 41,5 ميلليون
تەڭگەگە سالىنعان «نۇر-اش» بالاباقشاسى 75 بالدىرعاندى قابىلداۋعا ارنالعان. مۇندا وسكىندەر قازاق جانە ورىس تىلدەرىندە ءبىلىم الادى. ال «لاشىن» بالاباقشاسىنىڭ قۇرىلىسىنا 7 ميلليون تەڭگە بولىنگەن. بۇل جەردە دە 75 بالدىرعان ءۇش توپقا ءبولىنىپ, وقىتىلادى.
تاراز قالاسىندا وبلىستىق وليمپيادالىق رەزەرۆ ارنايى مەكتەبىنىڭ 3 انگارلىق سپورت زالى پايدالانۋعا بەرىلدى. ونىڭ قۇرىلىسىنا 494,7 ميلليون تەڭگە بولىنگەن. وتكەن جىلدىڭ ناۋرىز ايىندا باستالعان نىساننىڭ قۇرىلىس جۇمىستارىن «قاراتاۋ قۇرىلىس-2030» جاۋاپكەرشىلىگى شەكتەۋلى سەرىكتەستىگى جۇرگىزگەن. نىسان جوباسىن «تاراز-تەحنوپروەكت» كومپانياسى جاساعان. ال قۇرىلىسى وتكەن جىلى باستالعان وبلىستىق ارنايى بالالار-جاسوسپىرىمدەر №4 سپورت مەكتەبىندەگى ۆەلوسيپەد بازاسىنىڭ قۇرىلىسىن «اەم» جاۋاپكەرشىلىگى شەكتەۋلى سەرىكتەستىگى جۇرگىزگەن. مەرەكە قارساڭىندا مارەسىنە جەتكەن جۇمىستارعا 166,5 ميلليون تەڭگە جۇمسالعان.
تاراز قالاسىنداعى «بالاساعۇن» ورتالىق كونتسەرت زالىندا «استانا – ايماقتاردىڭ ارقاۋى» اتتى وبلىستىق فورۋم ءوتتى. اتالعان فورۋمدا جامبىل وبلىسىنىڭ اكىمى اسقار مىرزاحمەتوۆ ءسوز سويلەپ, بارشا جامبىلدىقتاردى استانا كۇنىمەن قۇتتىقتادى.
ەڭ باستىسى – قىسقا عانا 20 جىل ىشىندە استانا مەملەكەتتىك برەندكە, ماڭگىلىك مەملەكەتتىگىمىزدىڭ, اسقاق رۋحىمىزدىڭ نىشانىنا اينالدى! استانا ەل دامۋىنداعى باعىت-باعدارعا, قوزعاۋشى كۇشكە سەرپىن بەرىپ وتىر. سونىڭ ىشىندە وڭىرلەردىڭ دامۋىنا دا وڭ ىقپال ەتىپ وتىرعاندىعى بەلگىلى. سوندىقتان دا بۇگىنگى «استانا – ايماقتار ارقاۋى» اتتى فورۋمنىڭ ءوتۋى ورىندى. ويتكەنى وڭىرلەردىڭ وركەندەۋى – استانانىڭ دامۋىمەن تامىرلاس! مەملەكەت باسشىسى «استانا 20 جىلدىڭ ىشىندە بۇكىل الەم قىزىعا كوز تىككەن مەگاپوليسكە, الەمنىڭ ماڭىزدى كەزدەسۋلەر وتەتىن ۇنقاتىسۋ الاڭىنا اينالدى. قالامىز قارقىندى دامىپ, وركەندەۋدىڭ كەلەسى بەلەسىنە قادام باستى» دەگەن بولاتىن. بۇل – الەمدىك كەزدەسۋلەر الاڭىنا اينالعان استانا تۋرالى قىسقاشا قايىرىلعان باعا.
سونىمەن قاتار «استانا – ايماقتاردىڭ ارقاۋى» اتتى وبلىستىق فورۋمدا قازاقستاننىڭ ەڭبەك سىڭىرگەن قايراتكەرى, اقىن قايىربەك اسانوۆ, تاراز مەملەكەتتىك پەداگوگيكالىق ۋنيۆەرسيتەتىنىڭ كافەدرا مەڭگەرۋشىسى, پەداگوگيكا عىلىمدارىنىڭ دوكتورى تۇرسىناي ابدىقادىروۆا, تاراز قالاسىنداعى №40 مەكتەپ-گيمنازيا ديرەكتورىنىڭ ورىنباسارى يرينا ششەدرينا جانە ەلوردانىڭ قۇرداسى, سۇلەيمەن دەميرەل اتىنداعى ۋنيۆەرسيتەتتىڭ 4-كۋرس ستۋدەنتى ەركەجان ىبىراەۆا سىندى ازاماتتار ءسوز سويلەپ, بۇگىنگى تاڭداعى استانا قالاسىنىڭ دامۋ قارقىنىنا, ەلىمىزدىڭ الەم الدىنداعى بەدەلىنە توقتالدى. ءوز سوزدەرىندە سپيكەرلەر استانا ءار قازاقتىڭ ماقتانىشى ەكەنىن, سونىمەن قاتار بۇگىنگى جەتىستىگىمىز تاتۋلىق پەن بەيبىتشىلىكتىڭ ناتيجەسىندە كەلىپ وتىرعانىن جەتكىزدى.
اتالعان فورۋمنىڭ سوڭىندا وبلىستىق فيلارمونيا انشىلەرى «ەلىمنىڭ جۇرەگى – استانا», «گورود موي», «ارمان قالا – استانا», «ەلىن سۇيگەن ەلباسى», «نۇرلى استانا», «اياۋلى استانا» اندەرىن ناقىشىنا كەلتىرە ورىنداپ, كورەرمەن كوڭىلىن سەرپىلتتى.
حاميت ەسامان,
«ەگەمەن قازاقستان»
جامبىل وبلىسى
