شارانىڭ اشىلۋ سالتاناتىندا ءسوز سويلەپ, ەتنوفەستيۆالدىڭ رۋحاني-مادەني ماڭىزى جايلى تولعاعان استانا قالاسى əكىمىنىڭ ورىنباسارى ەرمەك امانشاەۆ بۇل توي اۋەلى ەلباسىنىڭ «رۋحاني جاڭعىرۋ» باعدارلاماسىن ىسكە اسىرۋ اياسىندا جانە الدا كەلە جاتقان قالانىڭ 20 جىلدىق مەرەيتويى قارساڭىندا ۇيىمداستىرىلىپ وتىرعانىن جەتكىزدى.
كوشپەندىلەردىڭ كونە ءداستۇرى مەن سالتتىق عۇرپىن جاڭعىرتۋعا ارنالعان بۇل فەستيۆال 10 جىل بۇرىن ۆەنگريادان باستاۋ العان. جىل وتكەن سايىن ونىڭ بەدەلى ارتىپ, دامۋ ۇستىندە. بۇل جولى ەلوردا تورىندە تۇڭعىش رەت جالاۋىن تىككەن كوشپەندىلەر تويىنا ۆەنگريا, بولگاريا, تۇركيا, ۋكراينا, باشقۇرتستان, ياكۋتيا, قىرعىزستان جانە قازاقستان كوماندالارى قاتىسىپ, ولار ورتاعاسىرلىق جەكپە-جەك سايىس تۇرلەرى مەن كوشپەندىلەردىڭ ءاتۇستى ويىندارى قاتارلى ەلەمەنتتەردى حالىق نازارىنا ۇسىندى.
ۇيىمداستىرۋشىلار مادەني-سايىس شارالارىن ويداعىداي وتكىزۋ ءۇشىن «اق مەرگەن», «شابىت», «تايبۋرىل», «كەرۋەن سارايى», «اق ساقا», «باتىر», «شەبەر» اتتى جەتى اۋىلدىق كەشەن تۇرعىزىپتى. وندا قازاقتىڭ ۇلتتىق سپورت ويىندارى مەن قولونەر شەبەرلەرى جاساعان بۇيىمدار تويعا كەلگەن قاۋىمعا ۇسىنىلسا, كوشپەندىلەردىڭ جاۋىنگەرلىك ونەرىن جاقسى مەڭگەرگەن جاۋجۇرەك ساربازدار مەن مەرگەندەر ساداق اتىپ سايىسسا, ات قۇلاعىندا وينايتىن شاباندوزدار ءوز ونەرلەرىن كورسەتتى.
تويعا كەلگەن كوپشىلىك شاراعا قاتىسۋشى ەلدەر وزدەرى اكەلگەن ەتنوگرافيالىق مۇراجاي ەكسپوناتتارىن تاماشالاۋمەن قاتار, ەتنومۋزىكا مايتالماندارى «ارقايىم» جانە «تۇران» توپتارى, ساحا ەلىنىڭ جۇلدىزى يۋليانا كريۆوشاپكينا مەن تانىمال كومەي-جىرشى تيۋرگەن كامنىڭ ونەرىنە سۋسىندادى.
ءدۇبىرلى تويدىڭ وتۋىنە اتسالىسقان «Kazakh Tourism» ۇك» اق باسقارما توراعاسىنىڭ ورىنباسارى تيمۋر دۇيسەنعاليەۆتىڭ پايىمىنشا, اتالمىش فەستيۆال ەجەلگى كوشپەندىلەر ءداستۇرىن جاڭعىرتىپ وتىر, بولاشاقتا وسىنى حالىقارالىق برەندكە اينالدىرۋ كوزدەلۋدە. شارانى ۇيىمداستىرعان تاعى ءبىر تاراپ وكىلى «Qazaq Geography» دقب حالىقارالىق جانە عىلىمي جوبالار ءبولىمىنىڭ مەنەدجەرى نۇرجان العاشوۆتىڭ ايتۋىنشا, بۇل ءىستىڭ ەكىنشى ءبىر ماڭىزى وتاندىق ءتۋريزمدى دامىتۋعا سەپتىگىن تيگىزەدى.
بەكەن قايرات ۇلى,
«ەگەمەن قازاقستان»
