ۇلتتىق دومبىرا كۇنىنە بايلانىستى ورال قالاسىنداعى سالتانات قۇرمانعازى مەن دينا ەسكەرتكىشىنە گۇل شوعىن قويۋدان باستالدى. ودان كەيىنگى نەگىزگى كوپشىلىك شارا قازاقستان رەسپۋبليكاسى تۇڭعىش پرەزيدەنتى الاڭىندا جالعاستى.
ورالدىڭ ورتالىق الاڭىنداعى قادىر اقىننىڭ ەسكەرتكىشىنە گۇل شوعىن بەلگىلى دومبىراشى ەدىگە نابيەۆ پەن باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ باستاپ قويدى. ودان كەيىن مەرەكەلىك كونتسەرت باستالدى. قازاقى داستۇرمەن بەزەندىرىلگەن ساحنادا وبلىستىڭ بەلگىلى ونەر ۇجىمدارى, جىرشى-تەرمەشىلەر, دومبىرا شەبەرلەرى əن-كۇي توكتى. عابيدوللا وسپانقۇلوۆ ءوز سوزىندە «رۋحاني جاڭعىرۋدىڭ ناعىز ۇلگىسى – دومبىرانى ۇلىقتاۋ ەكەنىن» ايتتى. دومبىراعا قۇرمەت اق جايىق وڭىرىندە بۇرىننان ەرەكشە. ماسەلەن, سوڭعى جىلدارى وبلىس اۋماعىنداعى ورتا مەكتەپتەر ءۇزىلىس كەزىندە ءداستۇرلى قوڭىراۋدىڭ ورنىنا كۇي اۋەندەرىن جاپپاي پايدالانا باستاعان.
* * *
ۇلتتىق دومبىرا كۇنىنە بايلانىستى ورال قالاسىندا وتكەن ەرەكشە شارانىڭ ءبىرى – قالالىق پەرزەنتقانادا جاس بوسانىپ جاتقان انالارعا جاسالعان قۇرمەت بولدى. باتىس قازاقستان وبلىسى قازاقستان حالقى اسسامبلەياسىنىڭ مۇشەلەرى وبلىس əكىمىنىڭ ورىنباسارى عابيدوللا وسپانقۇلوۆپەن بىرگە كوپبەيىندى قالالىق اۋرۋحانانىڭ پەرزەنتحاناسىنا بارىپ, دومبىرامەن əۋەلەتىپ ءان سالىپ, شاعىن كونتسەرت قويىپ بەردى. «دۋدار-اي» ءانىن شىرقاعان عابيدوللا ابدوللا ۇلى بۇگىنگى مەرەكەنىڭ ماڭىزىن ءتۇسىندىرىپ, كيەلى ونەر ۇرپاققا ميراس بولىپ قالاتىنىن ايتتى. بۇل كۇنى دۇنيەگە ءسابي اكەلگەن 15 انا گۇل شوعىمەن بىرگە ءبىر-ءبىر كيەلى دومبىرانى سىيعا الىپ, ءماز بولىپ قالدى.
* * *
ۇلتتىق دومبىرا كۇنىنە وراي ۇيىمداستىرىلعان شارالار باتىس قازاقستان وبلىسىنىڭ ءار تۇكپىرىندە دە ءوتتى. سىرىم اۋدانىنىڭ ورتالىعى جىمپيتىداعى شارا «ناعىز قازاق قازاق ەمەس, ناعىز قازاق – دومبىرا!» دەپ اتالدى. اۋداندىق بالالار مەن جاسوسپىرىمدەر شىعارماشىلىعى ورتالىعى دومبىرا مەرەكەسىن اقىن قادىر مىرزا ءاليدىڭ ەسكەرتكىشى تۇرعان الاڭدا وتكىزۋدى ۇيعارىپتى. مۇنىڭ سەبەبى دە بار: قازاق ادەبيەتىندە دومبىراعا قادىر اقىنداي ءدال, قادىر اقىنداي تۋرا, ءارى قادىرداي تابيعي تەڭەۋ ايتقان ادام جوق. ونىڭ «ناعىز – قازاق دومبىرا!» اتتى ءسوزى بۇگىنگى كۇنى حالىقتىق سوزگە اينالدى.
سىرىم اۋداندىق بالالار مەن جاسوسپىرىمدەر شىعارماشىلىعى ورتالىعىنىڭ جاس ءانشىسى ءابىلمانسۇر قانات, اۋداندىق ساز مەكتەبىنىڭ جاس دومبىراشىلارى بەرنار جولدىعالي, دىنمۇحامەد قۇمارعالي جانە جاس اقىندار ءاليجان كەڭەس پەن ديلناز سۇلەيمەنوۆا ونەر كورسەتكەن شارا كوپشىلىك كوڭىلىنەن شىقتى. قوسىمشا ءبىلىم بەرۋ پەداگوگى, سۋرەتشى مۇسا سۇلتانعاليەۆ دومبىرانىڭ قۇرىلىسى, ونىڭ اتاۋلارى تۋرالى بايانداپبەردى. شارا كورەرمەندىڭ فلەش- موبىمەن اياقتالدى.
* * *
كەشە عانا اقجايىق اۋدانىنىڭ شابدارجاپ ەلدىمەكەنىندە پايدالانۋعا بەرىلگەن سۋ جاڭا مەكتەپ ۇجىمىنا وسى مەكتەپتى ءار جىلدارى بىتىرگەن تۇلەكتەر 10 دومبىرا تارتۋ ەتتى.
- اۋىلىمىزدا سۋ جاڭا مەكتەپ عيماراتى سالىنىپ, پايدالانۋعا بەرىلگەنىنە بارشا شابدارجاپتىقتار جۇرەگى جارىلا قۋانىپ جاتىر. وسى قۋانىشتى وقيعا استانا قالاسىنىڭ 20 جىلدىعىمەن جانە تۇڭعىش رەت اتاپ وتىلگەلى وتىرعان ۇلتتىق دومبىرا كۇنىمەن ورايلاس كەلىپ وتىر. اۋىلىمىزدىڭ بالالارى جان-جاقتى ونەرلى بولسىن, ۇلتتىق قۇندىلىقتاردى بويىنا ءسىڭىرىپ ءوسسىن دەپ ءبىز مەكتەپ ۇجىمىنا سۋ جاڭا ون دومبىرا تارتۋ ەتكەندى ءجون كوردىك, - دەيدى اۋىل مەكتەبىن 28 جىل بۇرىن تامامداعان اقمارال مۇراتقىزى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
سۋرەتتەردى تۇسىرگەن دينارا امانعالي
