بايقاۋدىڭ ماقساتى: قازاقستاندا بالالار مەن جاسوسپىرىمدەر اراسىندا ءبىلىم بەرۋ جانە سپورت روبوتوتەحنيكاسىن دامىتۋ جانە دارىپتەۋ. ءىس-شارانىڭ ۇيىمداستىرۋشىلارى الدىنا قويعان مىندەتتەرى - وڭىرلەردەگى ۇزدىك جوبالاردى انىقتاۋ جانە رەسپۋبليكالىق كونكۋرسقا قاتىسۋ ءۇشىن ۇزدىك كوماندالاردى قالىپتاستىرۋ, سونداي-اق دارىندى مەكتەپ وقۋشىلارىنا پروفيلدىك ۋنيۆەرسيتەتتەر مەن كومپانيالاردىڭ نازارىن اۋدارۋ بولىپ تابىلادى.
قر تۇڭعىش پرەزيدەنتى – ەلباسى قورىنىڭ اتقارۋشى ديرەكتورىنىڭ ورىنباسارى سۇلتان ايتجانوۆ: «بۇگىنگى كەزدەسۋىمىز ۇزدىك تەحنولوگيالار مەكەنى بولىپ تابىلاتىن نازارباەۆ ورتالىعىندا وتكىزىلىپ وتىرعانىنا قۋانىشتىمىن. قر تۇڭعىش پرەزيدەنتى قورى قىزمەتىنىڭ نەگىزگى باعىتتارىنىڭ ءبىرى دارىندى بالالاردى قولداۋ بولىپ تابىلادى. قور سەرىكتەستەرىمەن بىرگە كوپتەگەن جىلدار بويى جاستارعا ارنالعان ءار ءتۇرلى جوبالاردى جۇزەگە اسىرىپ, بالالار مەن جاسوسپىرىمدەردىڭ ينتەللەكتۋالدى جانە شىعارماشىلىق الەۋەتىن اشۋعا ۇلەس قوسىپ كەلەدى. جاس دارىنداردى قولداۋ - بۇل جالپىۇلتتىق ماڭىزى بار ءىس-شارا.بۇگىن ءبىزدىڭ جاس ونەرتاپقىشتارىمىز قازىلار القاسىنا ءوزىنىڭ ۇزدىك روبوتتارىن ۇسىنادى. بالالارعا ساتتىلىك تىلەيمىن!»
ايتا كەتەيىك, 29 مامىر - 9 ماۋسىم ارالىعىندا ەلىمىزدىڭ بارلىق وبلىستارىندا بايقاۋدىڭ ىرىكتەۋ كەزەڭدەرى ءوتتى, وندا 200-گە جۋىق جوبا ۇسىنىلدى. چەمپيونات ەكى جاس كاتەگورياسىندا ءوتتى: ءبىرىنشى توپ: 10-15 جاسار بالالار, ەكىنشى توپ - 16-21 جاس اراسىنداعى جاستار. بايقاۋعا قاتىسۋشىلار - 2 ادامنان تۇراتىن توپتار. جوبالار ەركىن تاقىرىپتا بولدى, بىراق باستى شارت - جوبانىڭ قوعام ءۇشىن پايدالى بولۋى ءتيىس.
بارلىق جوبالاردىڭ تۇساۋ كەسەرى وتكەننەن كەيىن ءادىل قازىلار القاسى جەڭىمپازداردى انىقتادى.
10 – 15 جاس ارالىعىنداعى توپتا:
- 1 ورىن - مالىح ارتەم مەن سىزدىقوۆا ايپارا «Pancakebot» قۇيماقتاردى جاسايتىن روبوتى ءۇشىن (پاۆلودار وبلىسى);
- 2 ورىن – قۇنانباەۆ بەكبولات پەن توقبەرگەن نۇرالي «روبوت اربا» جوباسى ءۇشىن (الماتى ق.)
- 3 ورىن – سەرگەەۆ مارك پەن پانفيلوۆ ۆالەري نەيرو-ينتەرفەيسى بار ۋنيۆەرسالدى پروتەزى ءۇشىن («جاساندى قول») (ماڭعىستاۋ وبلىسى).
16 - 21 جاس ارالىعىنداعى توپتا:
- 1 ورىن - دۋدچەنكو ليۋبوۆ «Oqyp ko’r» جوباسى ءۇشىن (كورۋ قابىلەتى تومەن ادامدارعا ارنالعان كەز-كەلگەن ءماتىندى جەدەل تۇردە برايل شريفتىنە اۋداراتىن قۇرىلعى) (الماتى ق.);
- 2 ورىن - ديكين الەكساندر مەن ماكسۋتوۆ ميحايل ەلەكتروەنەرگيانى ەسەپتەۋ قۇرالدارىن اۆتوماتيزاتسيالاۋ جوباسى ءۇشىن (استانا ق.);
- 3 ورىن - ءسابيتوۆ ولجاس پەن حافيزوۆا الينا «Aeroponic» وسىمدىكتەردى توپىراقسىز ءوسىرۋ تەحنولوگياسى ءۇشىن (سولتۇستىك - قازاقستان وبلىسى).
بايقاۋدى قازاقستاندىق ءبىلىم بەرۋ جانە سپورتتىق روبوتوتەحنيكا «كازروبوتيكس» فەدەراتسياسى ۇيىمداستىردى. ءىس-شارانىڭ باس سەرىكتەسى – قر تۇڭعىش پرەزيدەنتى – ەلباسىنىڭ قورى.
بايقاۋدىڭ فينالدىق كەزەڭىنىڭ رەسمي سەرىكتەسى – «ينفوكوممۋنيكاتسيالىق تەحنولوگيالاردى دامىتۋ قورى» كق.
وڭىرلەر بويىنشا ىرىكتەۋ كەزەڭدەرى بارىسىندا «نۇر وتان» پارتياسىنىڭ «جاس وتان» جاستار قاناتى, «قازپوشتا» اق, ««زەردە» ۇلتتىق ينفوكوممۋنيكاتسيا حولدينگى» اق, ««استانا EXPO-2017» ۇلتتىق كومپانياسى» اق قولداۋ ءبىلدىردى
