ەلىمىزدىڭ ءار ايماعىنان كەلگەن جاس عالىمدار مەن ونەرتاپقىشتاردى ءبىر ارنادان توعىستىرعان ايتۋلى جوباعا قازاقستان حالقى اسسامبلەياسى توراعاسىنىڭ ورىنباسارى, قر پرەزيدەنتى اكىمشىلىگى قحا حاتشىلىعىنىڭ مەڭگەرۋشىسى لەونيد پروكوپەنكو, رەسپۋبليكالىق بىرلەستىكتەردىڭ جەتەكشىلەرى, كاسىپكەرلەر مەن مەتسەناتتار, «قازاقستاننىڭ 100 جاڭا ەسىمى» جوباسىنىڭ قاتىسۋشىلارى, قحا «جاڭعىرۋ جولى» رجق, «جاراسىم» رجۇ مۇشەلەرى مەن بەلسەندى جاستار قاتىستى.
فورۋمدا ءار وڭىردەن كەلگەن 14 ونەرتاپقىش ساراپتامالىق باعالاۋ مەن كاسىپكەر-مەتسەناتتاردىڭ جانە الەۋەتتى ينۆەستورلاردىڭ قولداۋىن قاجەت ەتەتىن وزدەرىنىڭ وزەكتى «Start-up» جوبالارىن كوپشىلىك نازارىنا ۇسىندى. تانىستىرىلىمنان وتكەن ءار جوبانىڭ وزىندىك ەرەكشەلىگى بار. ولاردىڭ كەيبىرى ساراپشىلار توبىنىڭ ايرىقشا قىزىعۋشىلىعىن تۋدىرىپ جاتتى. ماسەلەن سولتۇستىك قازاقستان وبلىسىنان كەلگەن II-توپتاعى مۇگەدەك ءسالىمحان ءسابيتوۆ ۇسىنعان جوبا وتە وزەكتى ماسەلەنىڭ ءبىرىن قامتىعان. ءسالىمحاننىڭ سوزىنشە, ەلىمىزدە مۇمكىندىگى شەكتەۋلى ازاماتتارعا كولىك جۇرگىزۋدى ۇيرەتەتىن ارناۋلى مەكەمەلەر جوق. بۇل ءوز كەزەگىندە, اسىرەسە اياعى كەمىس ازاماتتار ءۇشىن كوپ قولايسىزدىق تۋدىرىپ وتىر. وسى ولقىلىقتىڭ ورنىن تولتىرۋعا سەپتىگىم تيسە دەگەن جاس زياتكەر: ء«وزىم العاش كولىك تىزگىندەۋدى ۇيرەنبەك بولىپ جۇرگىزۋشىلىككە باۋليتىن مەكەمەگە بارعانىمدا, مۇگەدەكتەردىڭ مۇمكىندىگىنە ىڭعايلاستىرىلىپ جاسالعان كولىكتەردىڭ جوقتىعى قاتتى اسەر ەتتى. قىزىعۋشىلىعىم ويانىپ وسى ماسەلەنى زەرتتەۋگە تىرىستىم. ايتالىق قازىر پەتروپاۆل قالاسىندا 1766 مۇگەدەك ادام بار.
ولاردىڭ ىشىندە 8339 ازامات تىرەك-قيمىل اپاراتىنىڭ كومەگىنە تاۋەلدى بولعانىمەن اقىل ەسى كولىك باسقارۋعا جەتەدى. نەگە وسى ازاماتتاردىڭ ارمانىن ىسكە اسىرۋعا ىقپال ەتپەسكە دەگەن ويعا كەلدىم. ءوزىم دە مۇگەدەك بولعاندىقتان ولاردىڭ جان-دۇنيەسى ماعان جاقسى تانىس. مەنىڭ الەۋمەتتىك جوبام «وڭدى جول» دەپ اتالادى. جوبانى جۇزەگە اسىرۋ ءۇشىن ماعان 4ملن تەڭگەدەن استام قاراجات كەرەك. ول اقشاعا اۆتوكولىك ساتىپ الىپ قالامىزداعى اۋىر ماشينا جاساۋ زاۋىتىندا مۇگەدەك جاندار ءۇشىن تەك قولدىڭ كومەگىمەن باسقارۋعا بولاتىنداي ەتىپ قايتا قۇراستىرۋ ويدا بار. بيزنەس جوسپارىم دا دايىن. ويىم قولداۋ تاۋىپ جاتسا جىلىنا ەلۋدەن استام ادامدى وقۋ كۋرسىنان وتكىزەر ەدىم» دەيدى.
الماتىلىق ونەرتاپقىش ايدار بەكسۇلتانوۆ ۇسىنعان جوبا ويىن بالالارىن ۇلتتىق داستۇرمەن سۋسىنداتىپ, رۋحاني باعىتتا تاربيەلەۋدىڭ تاپتىرماس قۇرالىنداي كورىندى. ونىڭ ويلاپ تاپقانى – بالالارعا ارنالعان شاعىن فورماتتاعى قازاقى كيىز ءۇي. ياعني كيىز ءۇي ويىنشىق رەتىندە قۇراستىرىلعان. «مىنا زاماندا ەشكىمدى تاس ۇيدەن شىعىپ قازاق ۇيگە تۇر دەپ ماجبۇرلەي المايسىڭ. ال مۇنى اتا-انالار ءوز بالالارىنا ويىن-ويناۋ الاڭى رەتىندە الىپ بەرەتىن بولسا, ناعىز «رۋحاني جاڭعىرۋ» وسى بولاتىن ەدى. شاعىن كيىز ءۇيدىڭ كەرەگەسى, بوساعاسى, ۋىعى, شاڭىراعى تۇتاستاي تازا اعاشتان جاسالسا, كيىزى تازا تابيعي قويدىڭ ءجۇنى. ءونىم ەكولوگيالىق جاعىنان وتە پايدالى. وسى ءونىم ارقىلى كىشكەنتاي بالاپاندار اتا-بابالارى تۇرعان كيىز ءۇيدىڭ رۋحىن سەزىنسە» دەگەن ايدار جوبا ساراپشىلار نازارىنا ىلىگىپ, قارجىلاي قولداۋ تاۋىپ جاتسا ارنايى توقۋ ستانوكتارىن ساتىپ الىپ كاسىبىنىڭ اۋقىمىن ودان ءارى كەڭەيتۋدى كوزدەيدىتىن ايتادى.
قوستانايلىق مارينا زيۋۆانوۆا قالا جاستارىنىڭ شىعارماشىلىق ورتالىعىن اشۋعا ارنالعان بىرەگەي جوباسىن ۇسىنسا, قاراعاندىدان كەلگەن «PIXEL» جوبالىق ستۋدياسىنىڭ جەتەكشىسى اباي وتارباەۆ جەكەمەنشىك پاتەر يەلەرى كووپەراتيۆىنىڭ قىزمەت كورسەتۋ ساپاسىن جەتىلدىرۋگە باعىتتالعان ءوز ۇسىنىسىن ورتاعا سالدى. ال استانا مەديتسينا ۋنيۆەرسيتەتىنىڭ ستۋدەنتى رۋزي شيحوۆ «Donormyn» جۇيەسىنىڭ كومەگىمەن ەلىمىزدە وتە وزەكتى سانالاتىن دونورلىق ماسەلەسىن جولعا قويسام دەيدى.
شارا اياسىندا «قازاقستاننىڭ 100 جاڭا ەسىمى» جوباسىنىڭ جەڭىمپازدارى فورۋمعا قاتىسۋشىلار الدىندا ءوز جەتىستىكتەرىنىڭ سىرىمەن ءبولىسىپ, «ساتتىلىك تاريحى» دەگەن تاقىرىپتا ارنايى شەبەرلىك ساباعىن وتكىزدى. ولاردىڭ ىشىندە «100 جاڭا ەسىم» جوباسىنىڭ جەڭىمپازى, نەبارى 18 جاسىندا ماگيستىرلىك ديسسەرتاتسيا قورعاپ كلاسسيكالىق مۋزىكانىڭ حاس شەبەرى اتانعان پيانيست راحات-بي ابدىساعيننىڭ جارقىن جەتىستىك جولى جاستاردىڭ ارمانىنا قانات ءبىتىردى. 100 دەن استام كلاسسيكالىق تۋىندىنىڭ اۆتورى بۇگىنگى تاڭدا ريمدەگى مۋزىكا اكادەمياسىندا ءتالىم الادى.
كوپشىلىك الدىندا تانىستىرىلعان 14 جوبانىڭ ارقايسىسىنىڭ وزىندىك ەرەكشەلىكتەرى بار. ناقتى قاي جوبانىڭ قارجىلاي قولداۋ تاباتىنىن ساراپشىلار القاسى اقىلداسا كەلە انىقتايتىن بولادى. دەگەنمەن, «جاڭعىرۋ جولى» رەسپۋبليكالىق جاستار قوزعالىسىنىڭ وكىلدەرى فورۋمدا كەيبىر جاس عالىمداردىڭ جوبالارى قولداۋ تاپپاعان كۇننىڭ وزىندە, كاسىپكەرلەر مەن ۇيىمداستىرۋشىلار تاراپىنان ولارعا ناقتى كومەك كورسەتىلەتىنىن ايتادى. بۇل ءسوزدى قۋاتتاعان لەونيد پروكوپەنكو قازاقستان حالقى اسسامبلەياسى عىلىمعا دەن قويىپ, ءوزىنىڭ ۇتقىر يدەياسىن ىسكە اسىرۋعا تالاپتانعان شىعارماشىل جاستارعا اركەز قامقورلىق تانىتاتىنىن جەتكىزدى.
ارمان وكتيابر,
«ەگەمەن قازاقستان»
الماتى
