بۋندەستيم – جەر شارىنداعى جۇلدەسى ەڭ كوپ قۇرامانىڭ ءبىرى. گەرمانيالىقتار بۇعان دەيىن الەم چەمپيوناتىندا ءتورت رەت جەڭىمپاز اتانسا, (1954, 1974, 1990, 2014), ءۇش رەت ەۋروپادا تەڭسىز دەپ تانىلعان (1972, 1980, 1996). سونىمەن قاتار گەرمانيا قۇراماسىنىڭ ەنشىسىندە الەم بىرىنشىلىگىنىڭ ءتورت كۇمىس جانە ءتورت قولا مەدالى بار. ەۋروپا چەمپيوناتىندا ءۇش كۇمىس جانە ءۇش قولا جۇلدە جەڭىپ العان.
يواحيم لەۆ شاكىرتتەرى بيىلعى دوپ دوداسىنىڭ باستى فاۆوريتتەرى سانالادى. جالپى, گەرمانيالىقتار ءار چەمپيونات سايىن جۇلدەگە ءۇمىتتى قۇراما سانالادى. بىراق بۇل جولعى قۇراماعا ءۇمىت ەرەكشە ارتىلىپ وتىر. ويتكەنى بيىل لەۆ گەرمانيانىڭ ەڭ ۇزدىك دەگەن فۋتبولشىلارىن تاڭداپ الدى. الەم بىرىنشىلىگى الدىندا ەۋروپانىڭ فۋتبول ساراپشىلارى, «ەگەر گەرمانيا قۇراماسى بۇل چەمپيوناتقا ەكى قۇراممەن كەلسە, ەكەۋى دە توپتان شىعىپ, فينالعا دەيىن جەتۋگە مۇمكىندىكتەرى بار», دەپ جازعان ەدى. ەستەرىڭىزدە بولسا, بۋندەستيم بىلتىر كونفەدەراتسيا كۋبوگىنا ەكسپەريمەنتتىك قۇراممەن قاتىسقان بولاتىن.
2014 جىلى برازيليا تورىندە وتكەن چەمپيوناتقا قاتىسقان فۋتبولشىلاردىڭ تەك ءبىر-ەكەۋى عانا ءجۇردى. ال بيىلعى تىزىمگە «نەمىس ماشيناسىنىڭ» بىرنەشە مىقتى فۋتبولشىسى ەنبەي قالدى. مىسالى, 2014 جىلى برازيلياداعى الا دوپ بايگەسىندە گەرمانيا قۇراماسىنىڭ «التىن دوبىن» سوققان 26 جاستاعى ماريو گەتتسە لەۆتىڭ نەگىزگى ءتىزىمى بىلاي تۇرسىن, چەمپيوناتقا دەيىنگى كەڭەيتىلگەن قۇرامىنا دا ىلىنبەگەن. سونىمەن قاتار «ارسەنالدىڭ» نەگىزگى قورعاۋشىسىنا اينالعان شكودران مۋستافي مەن شابۋىلشى اندرە شيۋررلە دە ءتورت جىلدىقتىڭ باستى باسەكەسىنە قاتىسا المادى. ەسەسىنە, جىل بويى جاراقاتىنا بايلانىستى جاسىل الاڭعا شىقپاعان قاقپاشى مانۋەل نويەردى قۇراماعا شاقىرتتى.
جالپى, گەرمانيا الەم چەمپيوناتىنا ۇزدىكسىز قاتىسىپ كەلە جاتقان XXI عاسىردىڭ ەڭ تۇراقتى قۇراماسى سانالادى. مىسالى, 2002 جىلى فينالعا, 2006 جانە 2010 جىلدارى جارتىلاي فينالعا دەيىن جەتسە, 2014 جىلى باس جۇلدەنى قانجىعالارىنا بايلادى. دەگەنمەن, ەسكەرە كەتەتىن ءبىر جايت بار. الەم چەمپيوناتىنا جەڭىسكە جەتكەننەن كەيىن كەلەسى بىرىنشىلىككە دايىندالۋ, اتاقتى قورعاپ قالۋ قۇرامالارعا قيىنعا سوعادى. ياعني, چەمپيوندىققا قول جەتكىزۋ وڭاي بولماۋى مۇمكىن, بىراق ونى قورعاپ قالۋ قيىننىڭ قيىنى.
ويتكەنى بارلىق قۇراما تەك جەڭىمپاز قۇراماعا قارسى دايىندالىپ, جەڭىسكە جەتۋ ءۇشىن بارىن سالاتىنى انىق. وسىعان بايلانىستى, مىسالدى الىستان ىزدەمەي-اق, وتكەن چەمپيوناتتاردىڭ تاريحىنا زەر سالساق, سونىڭ ءوزى جەتكىلىكتى. 1998 جىلى الەم چەمپيونى اتانعان فرانتسيا قۇراماسى كەلەسى بىرىنشىلىكتە توپتان شىعا الماسا, 2006 جىلى جاھاندا تەڭسىز دەپ تانىلعان يتاليا دا كەلەسى دودادا توپتىق كەزەڭنەن ءارى اسا المادى. ال 2008 جىلى ەۋروپا چەمپيوناتىندا, ەكى جىلدان سوڭ الەم بىرىنشىلىگىندە جەڭىسكە جەتكەن يسپانيا فۋتبولشىلارى ءتورت جىل بۇرىنعى الا دوپ الامانىندا قالاي ماسقارا بولىپ جەڭىلگەنى فۋتبول جانكۇيەرلەرىنىڭ ءالى كۇنگە دەيىن ەسىندە شىعار.
سەنساتسياعا تولى رەسەيدەگى الەم چەمپيوناتىنىڭ العاشقى كەزدەسۋىندە-اق «نەمىس ماشيناسى» «سىر بەردى». مەكسيكا قۇراماسىنا قارسى وتكەن ويىندا گەرمانيالىق فۋتبولشىلار كۇتپەگەن جەردەن 1:0 ەسەبىمەن ەسە جىبەردى. ءبىرىنشى تۋردان كەيىنگى تۋرنير كەستەسىندە گەرمانيا سوڭعى ورىندا كەلەدى. وسى بىرىنشىلىك الدىندا گەرمانيا قۇراماسى العاشقى تۋردا جەڭىلىپ, توپتا سوڭعى ورىنعا ءتۇسىپ قالادى دەسە فۋتبول جانكۇيەرلەرى تۇگىل, بۋندەستيمنىڭ فۋتبولشىلارى دا سەنبەيتىن ەدى. ەندى «نەمىس ماشيناسى» 23 ماۋسىمدا شۆەتسياعا, 27 ماۋسىمدا وڭتۇستىك كورەيا قۇراماسىنا قارسى ويىن وتكىزەدى. ەگەر وسى كەزدەسۋدە دە نەمىستەر جەڭىسكە جەتە الماسا, جوعارىدا ءبىز اتاپ وتكەن چەمپيوندار سياقتى الەم چەمپيوناتىنداعى جورىعىن توپتىق كەزەڭىنەن-اق اياقتاۋعا ءماجبۇر بولادى.
گەرمانيا قۇراماسىنىڭ ءتىزىمى:
• قاقپاشىلار: مانۋەل نويەر («باۆاريا»), كەۆين تراپپ (پسج), مارك-اندرە تەر شتەگەن («بارسەلونا»);
• قورعاۋشىلار: مارۆين پلاتتەنحاردت («گەرتا»), يوناس حەكتور («كەلن»), ماتتياس گينتەر («بورۋسسيا م»), انتونيو ريۋديگەر («چەلسي»), ماتس حۋممەلس, نيكلاس زيۋلە, جەروم بواتەنگ, يوزۋا كيمميح ء(بارى – «باۆاريا»);
• جارتىلاي قورعاۋشىلار: سامي حەديرا («يۋۆەنتۋس»), يۋليان دراكسلەر (پسج), توني كرووس («رەال»), مەسۋت وزيل («ارسەنال»), ماركو رويس («بورۋسسيا د»), لەون گورەتسكا, ساباستيان رۋدي (ەكەۋى دە – «باۆاريا»), يۋليان براندت («بايەر-04»), يلكاي گيۋندوگان («مانچەستەر سيتي»);
• شابۋىلشىلار: ماريو گومەس («شتۋتگارت»), تيمو ۆەرنەر («رب لەيپتسيگ»), توماس ميۋللەر («باۆاريا»).
ءالي بيتورە,
«ەگەمەن قازاقستان»
