دەنەلى دزيۋبا رەكورد جاڭارتتى
رەسەي قۇراماسى مىسىردان 3:1 باسىم ءتۇسىپ, پلەي-وففقا شىققان العاشقى كوماندا دەسەك بولادى. جارىستى ۇيىمداستىرىپ جاتقان ەلدىڭ كومانداسى ەندى ۋرۋگۆايمەن ويىندا 1 ۇپاي السا دا جەتكىلىكتى. ال مىسىر جانە ونىڭ كوشباسشىسى مۇحاممەد سالاح ءۇشىنشى ويىننان سوڭ, وتا-
نىنا قايتادى. سول ويىندا رەسەي شابۋىلشىسى ارتەم دزيۋبا 55 رەت دوپقا تالاسىپتى. بۇل الەم چەمپيوناتىنىڭ رەكوردى. الىپ دەنەلى ورىس شابۋىلشىسى سول 55 رەت تالاسقان دوپتارىنىڭ 23-ءىن وزىنە قالدىرعان. مۇنىڭ ءوزى دە رەكورد بولىپ تۇر. بۇل جاعىنان ەكىنشى ورىن ۋرۋگۆاي قورعاۋشىسى ديەگو گوديندە. ول 19 رەت قارسىلاستان دوپ تارتىپ العان.
«گريزمان مەسسيدىڭ كومەكشىسى بولمايدى»
«اتلەتيكو» مادريد كومانداسىنىڭ باسشىسى ميگەل مارين ءدال وسىلاي مالىمدەدى. «انتۋان گريزماننىڭ ءوزى دە جوعارى دەڭگەيدەگى فۋتبولشى. ول بىرەۋدىڭ كومەكشىسى بولىپ جۇرە المايدى» دەدى. جاقىندا عانا انتۋان «اتلەتيكو» كلۋبىمەن كەلىسىمىن 2023 جىلعا دەيىن ۇزارتىپ ەدى. «بارسەلونا» كومانداسى فرانتسيا قۇراماسىنىڭ ويىنشىسىنا ۇسىنىس تاستاپ, ونى ساتىپ العىسى كەلگەن. ال گريزمان بولسا مەسسيدىڭ كومەكشىسى بولىپ جۇرۋدەن باس تارتىپتى.
«رەالعا» قاقپاشى كەرەك
«رەال» مادريد كلۋبى بولسا قاقپاشى تاپپاي شارق ۇرۋدا. كوستا-ريكا قۇراماسىنىڭ قاقپاشىسى كەيلور ناۆاستىڭ كلۋبتان كەتەتىنى جايلى كوپ ايتىلۋدا. وسى ارالىقتا «رەال» باسشىلارى بەلگيا قۇراماسىنىڭ نەگىزگى قاقپاشىسى تيبو كۋرتۋامەن كەلىسىمگە كەلۋدى كوزدەيدى. سەبەبى يسپان كلۋبى «روما» قاقپاشىسى اليسسوندى كوندىرگەنىمەن, كلۋبتىڭ وزىمەن كەلىسە المادى. «رەال» 50 ميلليون ۇسىنسا, يتاليالىق ۇجىم 80 ميلليون سۇراپ وتىر. الەم چەمپيوناتى كەزىندە فۋتبول بازارى ناعىز قىزعان شاعىندا.
رونالدۋدىڭ كەزەكتى رەكوردى
نەمىس تەلەارناسى قىزىقتى اقپاراتتى جاريالادى. يسپانيا-پورتۋگاليا اراسىنداعى ويىندا كريشتيانۋ رونالدۋ ساعاتىنا 38,6 شاقىرىم جىلدامدىقپەن جۇگىرىپتى. ءوز ايىپ الاڭىنان دە حەا قورعاعان قاقپاعا قاراي دوپسىز جۇيىتكىگەن پورتۋگال شابۋىلشىسى بۇرىن-سوڭدى فۋتبولدا تىركەلمەگەن جىلدامدىق كورسەتىپتى. ارىپتەسى گونسالو گۋەدەشكە كەرەمەت پاس شىعارىپ بەرىپ, قاۋىپتى ءسات جاسادى. الايدا ارىپتەسى بۇل مۇمكىندىكتى گولعا اينالدىرا المادى.
جانكۇيەردى توناپ كەتتى
ماسكەۋدەگى «كوسموس» قوناقۇيىنە ورنالاسقان ماروككو قۇراماسىنىڭ نازىك جاندى جانكۇيەرىن ۇرىلار توناپ كەتىپتى. بۇل جايىندا «ينتەرفاكس» اگەنتتىگى جازادى. قاراقشىلار 6 مىڭ ەۋرو جانە باعالى تەحنيكالاردى قولدى قىلعان. مۇنداي وقيعاعا ارگەنتينا مەن قىتاي ازاماتى دا ۇشىراعان بولاتىن. وسىنداي كەلەڭسىز جايتتاردىڭ كوبەيۋىنە بايلانىستى ءتارتىپ ساقشىلارى قىزمەتتەرىن ودان ءارى كۇشەيتىپ جاتىر.
نەيمار جاراقات الدى
الەم چەمپيوناتىنىڭ ءفاۆوريتى برازيليا قۇراماسى ەكەنى داۋسىز. ال «سەلەساو» ۇجىمىنىڭ باستى جۇلدىزى نەيمار كەشەگى جاتتىعۋ جۇمىستارى كەزىندە جاراقاتتانىپتى. ءباسپاسوز وكىلدەرىنىڭ جازۋىنشا, نەيمار توبىعىن اۋىرتىپ, جاتتىعۋدى جالعاستىرا الماعان. قۇراما كوماندانىڭ دارىگەرلەرى ونى جاسىل الاڭنان جەتەكتەپ الىپ كەتىپتى. قازىر ونىڭ كەلەسى ويىنعا قاتىسۋ, قاتىسپاۋى انىقتالىپ جاتىر. ايتا كەتەيىك, برازيليا كەلەسى ويىنىن 22 ماۋسىم كۇنى كوستا-ريكاعا قارسى وتكىزەدى.
ەرمۇحامەد ماۋلەن,
«ەگەمەن قازاقستان»
