جيىنعا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ايگۇل شايىموۆا, مەملەكەتتىك قىزمەت دەپارتامەنتىنىڭ ديرەكتورى جارقىن تىلەۋكەنوۆ, مەملەكەتتىك قىزمەت دەپارتامەنتىنىڭ ساراپشىسى جانداربەك مولداشەۆ قاتىستى.
شارا بارىسىندا «قازاقستان رەسپۋبليكاسىنىڭ ۇزدىك مەملەكەتتىك قىزمەتشىسى» رەسپۋبليكالىق كونكۋرسىنىڭ جالپى قورىتىندىسى, قاتىسۋشىلار مەن جەڭىمپازدارى جايىندا اقپارات بەرىلىپ, مەرەكەگە ورايلاستىرىلعان سالتاناتتى ءىس-شارانىڭ جاڭا فورماتى جايىندا ءسوز قوزعالدى.
«ەلباسى جيىرما جىل بۇرىن تاعدىرلى شەشىم قابىلدادى. ەلوردامىز الماتى قالاسىنان اقمولاعا كوشىرىلدى. بۇل داتا بىزدەر ءۇشىن وتە ماڭىزدى. ويتكەنى وسىدان جيىرما جىل بۇرىن ءبىزدىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى دە قۇرىلعان بولاتىن. سوندىقتان بيىل ءبىز دە جيىرما جىلدىق مەرەيتويىمىزدى اتاپ وتەمىز. وسى ورايدا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى جىل باسىنان بەرى ءتۇرلى ءىس-شارالار وتكىزگەن بولاتىن.
ولاردىڭ بارلىعى پرەزيدەنت اكىمشىلىگىنىڭ قولداۋىمەن جۇزەگە استى. وتكىزىلگەن شارالاردىڭ ىشىندەگى ماڭىزدىسى – «قازاقستان رەسپۋبليكاسىنىڭ ۇزدىك مەملەكەتتىك قىزمەتشىسى» رەسپۋبليكالىق كونكۋرسى. ءبىز اتالعان بايقاۋ تۋرالى ءساۋىر ايىنداعى ءباسپاسوز ءماسليحاتىندا جان-جاقتى ايتىپ وتكەنبىز. العاش رەت وتكەن جىلى ۇيىمداستىرىلعان جوبانىڭ جەڭىمپازدارى ەلباسىمەن كەزدەسۋگە مۇمكىندىك العانى بەلگىلى. بيىل بايقاۋعا قاتىسۋشىلار سانى ءبىر جارىم ەسەگە كوپ. سونىڭ ىشىندە ايماقتاعى مەملەكەتتىك ورگانداردىڭ قىزمەتكەرلەرى بەلسەنە اتسالىستى. قاتىسۋشىلار الدىمەن ايماقتىق ىرىكتەۋدەن ءوتىپ, رەسپۋبليكالىق كەزەڭگە جولداما الدى. ۇزىن سانى 454 ۇمىتكەردىڭ ىشىنەن 390 ادام تاڭدالدى. ءبىز ولاردى مەملەكەتتىك قىزمەتتى قانشالىقتى يگەرگەنىن انىقتايتىن تەست تاپسىرمالارى ارقىلى ىرىكتەپ الدىق. سونىمەن 50 بالدان جوعارى العانداردان 189 ادام كەلەسى كەزەڭگە ءوتتى. سولاردىڭ ىشىنەن فينالعا 52 ۇمىتكەر قاتىستى. كەزدەسۋ قورىتىندىسى بويىنشا رەسپۋبليكالىق كوميسسيا كونكۋرستىڭ 20 جەڭىمپازىن انىقتادى. ولاردىڭ 12-ءى باسشىلىق لاۋازىمداردا, 8-ءى وزدەرىنىڭ مانسابىن ەندى باستاعاندار. جەڭىمپازداردىڭ ىشىندە 12-ءسى ەر ادام, 8-ءى ايەل ادام. 20 جەڭىمپازدىڭ 9-ى شەت تىلدەرىندە ەركىن سويلەيدى, ونىڭ ىشىندە 4-ەۋى «بولاشاق» باعدارلاماسىنىڭ ستيپەندياتتارى. ەڭ كىشىسى 24 جاستا, ەڭ ۇلكەنى 53 جاستا», دەدى ايگۇل شايىموۆا.
ونىڭ ايتۋىنشا, جەڭىمپازدار وسى اپتانىڭ سوڭىندا سالتاناتتى جاعدايدا ماراپاتتالماق.
راۋان قايدار,
«ەگەمەن قازاقستان»
