كريمينالدى پوليتسيا ءبولىمىنىڭ جەدەل ۋاكىلى, پوليتسيا اعا لەيتەنانتى ءسابيتجان ايازحانوۆ پەن جول پاترۋلدىك پوليتسيا ۆزۆودىنىڭ كومانديرى, پوليتسيا اعا لەيتەنانتى بەكسۇلتان كەڭەسوۆ قالاداعى قازىبەك بي كوشەسىنىڭ بويىمەن كەلە جاتتى. ويلارىندا باسقارما باستىقتارىنىڭ تاپسىرماسىن ورىنداۋ عانا بولاتىن. كەنەت ولار كوپ قاباتتى ۇيلەردىڭ بىرىنەن ءورت شىعىپ جاتقانىن بايقاپ قالدى. ويلانىپ تۇرۋعا ۋاقىت جوق. ەكەۋى بىردەي قىزىل جالىن ورانعان ۇيگە قاراي ۇمتىلدى. جاقىنداعاندا بارىپ بايقادى, ءورت №6-ءۇيدىڭ ەكىنشى قاباتىنداعى №11-پاتەردىڭ بالكونىنان شىعىپ جاتىر ەكەن. ەكى پوليتسەي باسپالداقپەن ەكىنشى قاباتقا تەز-اق كوتەرىلدى. الايدا پاتەردىڭ ەسىگى ق ۇلىپتاۋلى ەكەن. قىرسىق قىلعاندا ەسىگى تەمىردەن بولار ما! كورشىلەردەن سۇراستىرىپ كورگەندە پاتەردە ادام بولۋى مۇمكىن ەكەنىن ءبىلدى.
وسى كەزدە باسقا پاتەرلەردىڭ تۇرعىندارى دا جينالىپ, ماڭاي ازان-قازان بولدى دا كەتتى. اركىم ءوز باستارىن ويلاپ قايعىرىپ جاتىر. ەگەر مىنا ءورت ءورشىپ, قارقىن السا, قىزىل جالىننىڭ بوي بەرمەي كەتەرىن دە ويلاپ, تۇرعىندار شۋ-شۋ ەتەدى. بەكسۇلتان مەن ءسابيتجان تۇرعىنداردى سابىرعا شاقىرىپ, تەمىر ەسىك تۇتقىنىندا قالعان جاندى اجال تىرناعىنان قالاي اراشالاپ الۋ كەرەكتىگىن اقىلداستى. مۇندايدا اسىپ-ساسقان ادامداردىڭ ويىنا ەشتەڭە دە كەلمەيدى.
– ءورت سوندىرۋشىلەردى شاقىرايىق, – دەدى ءبىرى.
– تەرەزەدەن تۇسەيىك, دەدى ەكىنشىسى.
الايدا مۇنىڭ ەكەۋىنە دە ۇلگەرمەيتىن ەدى. ءورت سوندىرۋشىلەر كەلىپ جەتكەنشە ىشتەگى ادام تۇنشىعىپ ءولىپ كەتۋى مۇمكىن. ال تەرەزەدەن ءتۇسۋ ءۇشىن ساتى كەرەك. تاپ قازىر ساتىنى قايدان عانا تابا قويارسىڭ؟! ءسابيتجان №16-پاتەردىڭ تۇرعىنى ج.وماروۆادان بالتا سۇرادى. ساسقالاقتاعاندا بالتا تابىلا قويۋشى ما ەدى. ايتەۋىر ءبىر كەزدە بالتا دا تابىلدى-اۋ. ءسابيتجان مەن بەكسۇلتان ەكەۋلەپ تەمىر ەسىكتى بۇزىپ كىرۋگە كىرىستى. تەمىردىڭ اتى قاشان دا تەمىر. ونى بۇزۋ وڭاي بولا قويعان جوق. دەگەنمەن ەكەۋلەگەن سوڭ قويا ما, ەسىك ءبىر كەزدە اشىلدى-اۋ, ايتەۋىر.
ەسىك اشىلعاندا بەتتەرىن بۇرق ەتكەن ىستىق جالىن شارپىدى. بالكوندا وت لاپىلداپ تۇر. ەكى پوليتسەي قويۋ ءتۇتىن ىشىنەن پاتەردە ادام بار ما, جوق پا دەپ, ءارى-بەرى كەزىپ ىزدەستىرە باستادى. وسى كەزدە پاتەردىڭ تۇپكى بولمەسىنەن ىڭىرسىعان ادام داۋىسى ەستىلدى.
ەكەۋى تۇپكى بولمەگە ۇمتىلدى. ءورشىپ العان جالىن قىزۋى كۇيدىرىپ بارادى. ءوز ومىرلەرىنە قاۋىپ ءتونىپ تۇرعانىنا قاراماستان, ولار ىلگەرى ۇمتىلا بەردى.
تۇپكى بولمەدەگىلەر ەكەۋ ەكەن. 1980 جىلى تۋعان ماكسيم وسينتسەۆ پەن 1985 جىلى تۋعان سەرگەي اپولسكي تۇتىنگە ۋلانىپ قالىپتى. بىلق-سىلق ەتكەن ەكەۋىن سىرتقا ارقالاپ شىقتى. ولار تەز ارادا كريمينالدى پوليتسيا ءبولىمىنىڭ باستىعى, پوليتسيا مايورى نۇرجان امانقۇلوۆقا حابارلاستى. ارتىنشا شۇعىل كومەك كەلىپ, قۇتقارىلعاندارعا العاشقى مەديتسينالىق كومەك كورسەتىلدى.
ءوز ومىرلەرىنە قاۋىپ-قاتەر تونسە دە قيىندىقتاردان قايمىقپاعان قوس پوليتسەي ءتيىستى ورىنداردان لايىقتى العىس الدى. بىراق بەكسۇلتان مەن ءسابيتجان ەرلىك جاسادىق دەپ توقمەيىلسىمەيدى.
– ءبىزدىڭ ورنىمىزداعى كەز كەلگەن ادام تاپ وسىنداي قادامعا باراتىن ەدى. ءبىز ەرلىك جاساعان جوقپىز, – دەيدى ەكەۋى سىپايى عانا.
ءيا, ادامدى سۇلۋ كورسەتەتىن قاسيەتتىڭ ءبىرى وسى قاراپايىمدىلىق.
بىزگە كوبىنەسە وسى قاراپايىمدىلىق جەتىسپەي جاتاتىنى ءبارىمىزدى ويلاندىرۋى ءتيىس.
سابىربەك ولجاباي
وڭتۇستىك قازاقستان وبلىسى
