ءوزىنىڭ بايانداماسىندا ۆەدومستۆو باسشىسى ەنەرگەتيكا سالاسىندا اتقارىلعان جۇمىستار, جەتىستىكتەر جانە بولاشاق جوسپارلار, سونىمەن قاتار وتكەن جىلدا ىسكە اسىرىلعان جۇمىستاردىڭ ناتيجەسىنە توقتالدى. مۇناي-گاز سالاسىنىڭ بارلىق سەكتورىنداعى كورسەتكىشتەر 2017 جىلدىڭ سايكەس كەزەڭىمەن سالىستىرعاندا ءوسىمدى كورسەتەتىنىن كولدەنەڭ تارتتى.
«جەر قويناۋى تۋرالى كودەكسكە سايكەس جەر قويناۋىن پايدالانۋ قۇقىعىن بەرۋ ايتارلىقتاي جەڭىلدەتىلدى, مەرزىمدەر قىسقارتىلدى, اكىمشىلىك كەدەرگىلەر تومەندەتىلدى, كەلىسىمشارت 40 جۇمىس كۇنىنە دەيىن, قۇقىقتىق, ەكونوميكالىق ساراپتامالار, كەلىسىمشارتقا قول قويۋ ءۇشىن جوبالىق قۇجات قىسقارتىلدى. وسى جىلى جەر قويناۋىن پايدالانۋ قۇقىعىنا كونكۋرستار جالعاستىرىلاتىن بولادى, ءبىرىنشى 5 وڭىردە (قوستاناي, قاراعاندى, قىزىلوردا, جامبىل, ماڭعىستاۋ وبلىستارىندا) 11 جەر قويناۋى ۋچاسكەلەرى ۇسىنىلدى.
كونكۋرستىڭ ناتيجەلەرى بويىنشا كەلىسىمشارتتارعا جاڭا كودەكستىڭ نورمالارى بويىنشا قول قويىلادى. ايتا كەتەتىن تاعى ءبىر جايت, 2018 جىلى شىمكەنت زاۋىتىنداعى جاڭعىرتۋ جۇمىستارى اياقتالادى. 2018 جىلى مۇناي وڭدەۋدىڭ جالپى كولەمى 1 ملن تونناعا ءوسىپ, 16 ملن توننانى قۇرايدى. سونىمەن قاتار 2018 جىلدىڭ باسىنان باستاپ, كەدەن وداعىنىڭ تەحنيكالىق رەگلامەنتى كۇشىنە ەندى. 2018 جىلدىڭ شىلدەسىنەن باستاپ موتور وتىندارىنىڭ ساپاسى K-4 جانە 5 ەكولوگيالىق كلاستارىنا سايكەس كەلۋى ءتيىس», دەدى قانات بوزىمباەۆ.
سونىمەن قاتار مينيستر ەلەكتر ەنەرگياسىن ءوندىرۋ كولەمى 46,4 ملرد كۆت. ساعاتتى قۇراپ, بۇل 2017 جىلدىڭ سايكەس كەزەڭىنە قاراعاندا 7,7 پايىزعا وسكەنىن تىلگە تيەك ەتتى جانە ەنەرگيا ءوندىرۋشى كومپانيالاردىڭ شەكتى تاريفتەرىن قايتا قاراۋ بويىنشا جۇمىستار جۇرگىزىپ جاتقانىن ايتتى.
راۋان قايدار,
«ەگەمەن قازاقستان»
