1994 جىلدان بيىلعا دەيىن بىردە-ءبىر چەمپيوناتتان تىس قالماعان مەكسيكالىقتار سول جولى توپتىق كەزەڭدە جاقسى ويىن ورنەگىن كورسەتىپ, پلەي-وفف كەزەڭىنە دەيىن جەتكەن. ءبىر قىزىعى, 1994 جىلعى بىرىنشىلىكتەن بۇگىنگە دەيىن ستسەناري قاتارىنان التىنشى رەت قايتالانىپ كەلەدى. دەگەنمەن, مەكسيكالىقتاردىڭ 2002 جىلعى بىرىنشىلىكتە ءوز «رەكوردىن» جاڭارتىپ, كەلەسى كەزەڭگە وتۋىنە تاماشا مۇمكىندىگى بار ەدى. ازيا قۇرلىعىندا وتكەن فۋتبول تويىندا مەكسيكا قۇراماسى ءوز توبىنان ەكىنشى ورىنمەن شىعىپ, پلەي-وفف كەزەڭىندە اقش قۇراماسىنا تاپ كەلدى. سولتۇستىك جانە ورتالىق امەريكانىڭ قۇرلىقارالىق كەزدەسۋىندە اقش قۇراماسىن وڭاي جەڭىپ جۇرگەن مەكسيكا كۇتپەگەن جەردەن 0:2 ەسەبىمەن جەڭىلىپ قالدى.
2014 جىلى برازيليادا وتكەن دوپ دوداسىندا مەكسيكالىقتار «ا» توبىندا سىنعا ءتۇستى. توپتىق كەزەڭدە جارىس قوجايىندارى – برازيليامەن بىردەي ۇپاي جيناپ, العاشقى ەكى ورىندى ءوزارا ءبولىسىپ, ءتۋرنيردىڭ كەلەسى كەزەڭىنە جولداما الدى. پلەي-وفف باسەكەسىندە مەكسيكالىقتار نيدەرلاند قۇراماسىمەن كۇش سىناسىپ, تارتىستى وتكەن ويىندا 1:2 ناتيجەسىمەن ەسە جىبەردى. ماتچىڭ نەگىزگى ۋاقىتى 1:1 ەسەبىمەن اياقتالعان-دى. الايدا ويىننىڭ نەگىزگى ۋاقىتىنا قوسىلعان قوسىمشا مينۋتتاردا نيدەرلاند شابۋىلشىسى كلاس-يان حۋنتەلار قۇراماسىنا جەڭىس گولىن سىيلادى. وسىلايشا, مەكسيكا قۇراماسى ءتورت جىل بۇرىنعى چەمپيوناتتاعى جورىعىن 1/8 فينالدا اياقتاعان بولاتىن. بيىل مەكسيكالىقتاردىڭ ماقساتى – قالايدا الەم چەمپيوناتىندا توپ جارۋ.
رەسەيدەگى الەم چەمپيوناتىنا ىرىكتەۋ كەزەڭىندە مەكسيكا سولتۇستىك, ورتالىق امەريكا جانە كاريب باسسەينى ايماعىندا كوستا-ريكا, پاناما, گوندۋراس, اقش, ترينيداد جانە توباگو سياقتى قۇرامالارمەن ءبىر توپتا جولداماعا تالاستى. ىرىكتەۋ كەزەڭى مەكسيكا ءۇشىن اسا قيىن ءوتتى دەپ ايتا المايمىز. ء«ۇش ءتۇستى» ەلدىڭ فۋتبولشىلارى ىرىكتەۋ اياقتالۋعا ءۇش تۋر قالعاندا ءوز توبىندا ءبىرىنشى ورىن الىپ, الەم چەمپيوناتىنىڭ جولداماسىن مەرزىمىنەن بۇرىن يەلەندى. ءبىر قىزىعى, بۇل توپتاعى اقش قۇراماسى 10 ويىننان كەيىن 12 ۇپاي جيناپ, بەسىنشى ورىنمەن كوش سوڭىندا قالىپ قويدى.
الەم چەمپيوناتىنىڭ توپتىق كەزەڭىندە مەكسيكا قازىرگى الەم چەمپيونى – «نەمىس ماشيناسىمەن» ءبىر توپقا ءتۇستى. قىزىق بولعاندا, ەكى قۇراما ءبىرىنشى تۋردا-اق ءبىر-بىرىمەن جولىقتى. بىرىنشىلىك الدىندا فۋتبول ماماندارىنىڭ ءبارى گەرمانيا قۇراماسى توپتاعى بارلىق ويىندا جەڭىسكە جەتىپ, ءبىرىنشى ورىنمەن كەلەسى كەزەڭگە جولداما الادى دەپ بولجاعان بولاتىن. الايدا مەكسيكالىقتار بۇل جولى ايدى اسپانعا شىعاردى. گەرمانيامەن كەزدەسۋدىڭ 35-مينۋتىندا ء«ۇش ءتۇستى» ەلدىڭ شابۋىلشىسى يرۆينگ لوسانو گول سوعىپ, قۇراماسىنا ماڭىزدى ءۇش ۇپاي اپەرىپ قانا قويماي, ءتورت جىل بۇرىنعى الەم چەمپيونىن جەڭدى.
ەندى مەكسيكا قۇراماسى الداعى كەزدەسۋىن 23 ماۋسىم كۇنى ازيا قۇرلىعىنان كەلگەن وڭتۇستىك كورەيا قۇراماسىمەن وتكىزسە, 27 ماۋسىمعا جوسپارلانعان سوڭعى تۋردىڭ ماتچىندا ەۋروپا وكىلى شۆەتسيامەن پلەي-وفف كەزەڭىنە بەرىلەتىن جولدامانى ساراپقا سالادى. ەگەر مەكسيكالىقتار ءبىر ويىندا جەڭىسكە جەتىپ, بىرەۋىندە تەڭ ويناسا, ەش قيىندىقسىز چەمپيوناتتىڭ كەلەسى كەزەڭىنە جولداما الادى.
ءالي بيتورە,
«ەگەمەن قازاقستان»
