جۋىردا قازاق اكتەرى, قازاقستاننىڭ ەڭبەك سىڭىرگەن قايراتكەرى تولەۋبەك ارالباي قىتايدا وتكەن كينوفەستيۆالدە جۇلدەگە يە بولدى. تسينداو قالاسىندا ماۋسىمنىڭ 13-ءى مەن 17-ءى ارالىعىندا وتكەن فەستيۆالگە شانحاي ىنتىماقتاستىق ۇيىمىنا مۇشە ەلدەر كينوتۋىندىلارى قاتىستى. قازاقستاندىق اكتەرلەر ەلىمىزدىڭ مادەنيەت جانە سپورت مينيسترلىگىنىڭ تاپسىرىسى بويىنشا «اديگۋل پروداكشن» كينوكومپانياسىنىڭ قاتىسۋىمەن ش.ايمانوۆ اتىنداعى «قازاقفيلم» اق تۇسىرگەن رەجيسسەر ت.تەمەنوۆتىڭ ء«بىزدىڭ قالانىڭ حانزاداسى» ءفيلمىن اپارعان بولاتىن. بيبول ەسىمدى قامكوڭىل ۇل – بالالار ءۇيىنىڭ التى جاسار تاربيەلەنۋشىسى مەن قاسىمحان ەسىمدى مۋزىكانت قاريانىڭ كەزدەيسوق كەزدەسۋىنەن ءوربيتىن كينونىڭ درامالىق جەلىسى ودان ءارى مۇلدەم بوتەن ەكى كەيىپكەردىڭ ءوزارا ەتەنە جاقىن بولىپ, ءبىر-بىرىنە اكە مەن بالاداي باۋىر باسىپ كەتۋىنە ۇلاسادى. ادامگەرشىلىك قاسيەتتى باستى ورىنعا قويىپ, وسى ىزگى قاسيەت ارقىلى باقىتقا بولەنۋ مۇمكىندىگىن العا تارتقان مەلودراما استانادا جانە اقمولا وبلىسىنىڭ بۋراباي اۋىلىندا ءتۇسىرىلىپ, 2017 جىلى 1 ماۋسىم – حالىقارالىق بالالاردى قورعاۋ كۇنىندە تۇساۋى كەسىلدى. سول جىلى قازان ايىنان باستاپ ەلىمىزدىڭ كينوتەاترلارىنان كورسەتىلىپ, قىركۇيەك ايىندا رەسەيدە وتكەن II حالىقارالىق «ەۋرازيالىق كوپىر» كينوفەستيۆالىنىڭ نەگىزگى باعدارلاماسى اياسىندا كورسەتىلدى.
قحر مەملەكەتتىك كينەماتوگرافيا باسقارماسى مەن شاندۋن پروۆينتسياسىنىڭ اكىمشىلىگى ۇيىمداستىرعان شىۇ اياسىنداعى كينوفەستيۆالدە كورەرمەندەر نازارىنا 60 كارتينا ۇسىنىلعان بولاتىن. ء«بىزدىڭ قالانىڭ حانزاداسى» فيلمىندە باستى رولدەردى ءانۋار تولەۋعاجى مەن بۇرىن «جاۋجۇرەك مىڭ بالا», «جويۋشى», «تىعىرىقتان جول تاپقان» فيلمدەرىندە ويناعان تولەۋبەك ارالباي سومدادى جانە فيلمگە استانا قالاسىنداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ اكتەرلەرى قاتىستى. ءوز ءرولىن شەبەر, تارتىمدى سومداعان تولەۋبەك ارالباي كينوفەستيۆالدە «ۇزدىك ەر ادام» ءرولى جۇلدەسىن جەڭىپ الدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
