«لۋجنيكي» ستاديونىندا بىرىنشىلىكتىڭ اشىلۋ سالتاناتى ءداستۇرلى تەاترلاندىرىلعان كورىنىسپەن باستالدى. ساحنالىق قويىلىمنان سوڭ ورتاعا بريتانيالىق ءانشى روببي ۋيليامس, وپەرا ءانشىسى ايدا گاريفۋللينا, سونىمەن قاتار كومپوزيتور الەكساندر بولداچەۆ شىعىپ, ءوز ونەرلەرىن ورتاعا سالدى. ال چەمپيوناتتىڭ رەسمي دوبىن رەسەيلىك تەلەجۇرگىزۋشى جانە وسى بىرىنشىلىكتىڭ ەلشىسى ۆيكتوريا لوپىرەۆا الىپ شىقتى. ءXXى الەم چەمپيوناتىنىڭ العاشقى سوققىسىن الەمگە ايگىلى برازيليالىق شابۋىلشى رونالدو مەن ءتۋرنيردىڭ تاليسمانى زابيۆاكا اتتى قاسقىر جاسادى.
مۇنان سوڭ الاڭعا امەريكالىق اكتەر, حيپ-حوپ ورىنداۋشى ۋيلل سميت پەن نيكي دجەم جانە البانيالىق ەرا يسترەفي شىعىپ, چەمپيوناتتىڭ Live It Up دەپ اتالاتىن رەسمي ءانۇرانىن ورىندادى.
بيىلعى مۋنديالعا الەمنىڭ 32 قۇراماسى مەن 736 فۋتبولشى قاتىسۋدا. وعان قوسا, ءار ستاديونعا جينالاتىن ءجۇز مىڭعا جۋىق جانكۇيەر مەن الەمنىڭ تۇكپىر-تۇكپىرىنەن تەلەەكران ارقىلى ميلليونداعان كورەرمەن ەندى ءبىر اي بويى فۋتبولمەن تىنىستايتىن بولادى.
چەمپيوناتتىڭ سالتاناتتى اشىلۋ ءرəسىمى وتكىزىلگەننەن كەيىن جاسىل الاڭعا رەسەي مەن ساۋد ارابياسى قۇرامالارى شىقتى. ماتچ باستالماي تۇرىپ رەسەي فەدەراتسياسىنىڭ پرەزيدەنتى ۆلاديمير پۋتين مەن حالىقارالىق فۋتبول فەدەراتسياسىنىڭ (فيفا) پرەزيدەنتى دجانني ينفانتينو ءسوز سويلەپ, 2018 جىلعى الەم چەمپيوناتىنىڭ رەسمي تۇردە اشىلعانىن مالىمدەدى.
رەسەي جانە ساۋد ارابياسى قۇرامالارىنىڭ اراسىنداعى ويىن 5:0 ەسەبىمەن الاڭ يەلەرىنىڭ پايداسىنا شەشىلدى. رەسەي قۇراماسىنىڭ جانە بيىلعى دوپ دوداسىنىڭ العاشقى گولىن جارتىلاي قورعاۋشى يۋري گازينسكي سوقتى. سونىمەن قاتار ماتچتىڭ 23-مينۋتىندا رەسەيلىك فۋتبولشى الان دزاگوەۆ جاراقات الىپ, ويىندى مەرزىمىنەن بۇرىن اياقتاۋعا ءماجبۇر بولدى. دارىگەرلەردىڭ ايتۋىنشا, دزاگوەۆ الاڭعا ەندى ءۇش اپتادان سوڭ ورالۋى مۇمكىن. جاراقات العان فۋتبولشىنىڭ ورنىنا يسپانيانىڭ «ۆيلياررەال» كومانداسىندا دوپ تەبەتىن شابۋىلشى دەنيس چەرىشەۆ شىعىپ, 43-ءشى جانە 90+1-ءشى مينۋتتاردا دۋبل جاساپ, كومانداسىن العا شىعاردى.
ەكىنشى تايمنىڭ 71-مينۋتىندا ارتەم دزيۋبا مەرگەندىگىمەن كوزگە تۇسسە, 90+4-ءشى مينۋتتا الەكساندر گولوۆين ماتچتىڭ نۇكتەسىن قويدى. وسىلايشا, الەم بىرىنشىلىگىنىڭ العاشقى ويىنىندا رەسەي قۇراماسى ساۋد ارابياسىنىڭ كومانداسىن ءىرى ەسەپپەن جەڭدى.
وسىمەن, 31 كۇنگە سوزىلاتىن الا دوپتىڭ الامانى دا باستالدى. 2018 جىلعى الەم چەمپيوناتى 14 ماۋسىم مەن 15 شىلدە ارالىعىندا رەسەي فەدەراتسياسىنىڭ 11 قالاسىنداعى 12 ستاديوندا وتەدى.
