كەزدەسۋ بارىسىندا گ.ابدىقالىقوۆا ەلىمىزدىڭ ىشكى ساياساتىنداعى ماڭىزدى باعىتتارعا نازار اۋداردى. بۇگىندە قازاقستان پرەزيدەنتى ن.نازارباەۆتىڭ تاپسىرماسىمەن ەكونوميكانى, ساياساتتى جانە قوعامدىق سانانى جاڭعىرتۋدى كوزدەگەن جۇيەلى جۇمىس جۇرگىزىلۋدە. مەملەكەت باسشىسىنىڭ «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋى ىسكە اسىرىلىپ جاتىر. ماقساتىمىز – جاڭا الەمنىڭ كوشباسشى ەلدەرىنىڭ قاتارىنا قوسىلۋ. الەۋمەتتىك جاۋاپتى مەملەكەت قۇرۋعا باعىتتالعان «پرەزيدەنتتىڭ بەس الەۋمەتتىك باستاماسى» جوباسى ورىندالۋدا.
گۇلشارا ابدىقالىقوۆا كەڭ اۋقىمدى باعىتتار بويىنشا جوعارى دەڭگەيدەگى ءوزارا سەنىمگە نەگىزدەلگەن سىندارلى ساياسي ديالوگتىڭ ارقاسىندا ەكىجاقتى قارىم-قاتىناس نىعايىپ, ىنتىماقتاستىق ستراتەگيالىق مارتەبەگە يە بولعانىن ايتتى.
– تۇرىكمەنستان قازاقستان ءۇشىن ورتالىق ازياداعى تەك تاتۋ كورشى مەن سەنىمدى سەرىكتەس قانا ەمەس, باۋىرلاس مەملەكەت. ءبىزدىڭ ەلدەردى ورتاق مادەنيەت, شىنايى دوستىق پەن ءوزارا ءىس-قيمىل بايلانىستىرادى, – دەدى مەملەكەتتىك حاتشى.
بۇگىندە قازاقستان مەن تۇرىكمەنستان ءتۇرلى كوپجاقتى باسقوسۋلار (بۇۇ, تمد, يىۇ جانە ت.ب.) اياسىندا ىنتىماقتاسىپ كەلەدى. پارلامەنتارالىق جانە ۆەدومستۆوارالىق بايلانىستار نىعايۋدا. وڭىرارالىق بايلانىستاردىڭ ءورىسى كەڭەيۋدە. ەكونوميكالىق ىنتىماقتاستىق جونىندەگى ۇكىمەتارالىق كوميسسيا جۇمىسى جولعا قويىلعان.
– ارالدى قورعاۋ حالىقارالىق قورى (اقحق) وڭىرلىك ءوزارا ءىس-قيمىلدىڭ ماڭىزدى الاڭى بولىپ قالا بەرەدى, – دەدى مەملەكەتتىك حاتشى.
قازاقستان مەن تۇرىكمەنستاندا الەمدىك, سونداي-اق وڭىرلىك دەرجاۆالار يگەرۋگە جانە جەتكىزۋگە مۇددەلى بولىپ وتىرعان كومىرسۋتەك رەسۋرستارىنىڭ ەلەۋلى قورى بار. ەكى ەلدىڭ كولىك-ترانزيت الەۋەتى دە وراسان زور. ەلدەرىمىز اراسىنداعى تاۋار اينالىمى 2017 جىلى 99,3 ملن.دوللار بولدى.
كەزدەسۋ سوڭىندا مەملەكەتتىك حاتشى گ.ن.ابدىقالىقوۆا تۇرىكمەنستاننىڭ قازاقستانداعى توتەنشە جانە وكىلەتتى ەلشىسى ت.ب.كومەكوۆكە ءوزارا قارىم-قاتىناستى تاتۋ كورشىلىك پەن ستراتەگيالىق سەرىكتەستىك رۋحىندا ودان ءارى ىلگەرىلەتۋ جولىندا مول تابىس تىلەدى.
