8 تامىزدا 38 جاسقا تولعالى وتىرعان رودجەر فەدەرەر 32 جاسىنا دەيىن ءىرى حالىقارالىق تۋرنيرلەردە 77 مارتە باس جۇلدەنى ولجالاعان ەكەن. سونىڭ ىشىندە 17 رەت «ۇلكەن دۋلىعا» جانە 21 رەت «ماستەرس» دودالارىندا دارا شىقتى. وسى جارىستاردا ول 906 ويىندى ءوز پايداسىنا شەشىپ, 206 كەزدەسۋدە ۇتىلعان ەكەن. ال 3 ماۋسىمدا 32 جاسقا تولعان رافاەل نادال وسى كۇنگە دەيىن 79 باس جۇلدەنى قانجىعاسىنا بايلادى. ول «ۇلكەن دۋلىعادا» 17 مارتە توپ جارسا, «ماستەرستە» 17 رەت الدىنا جان سالمادى. وسى باسەكەلەر بارىسىندا پيرەنەي تۇبەگىنىڭ تۇلەگى 903 مارتە جەڭىسكە جەتىپ, 187 رەت جەڭىلىستىڭ كەرمەك ءدامىن تاتتى.
ازىرگە يسپانيا تەننيسشىسى وسى كورسەتكىشپەن شەكتەلسە, شۆەيتساريانىڭ ساڭلاعى سوڭعى بەس جىلدا ءبىراز بەلەستى باعىندىرىپ ۇلگەردى. قازىرگى كەزدە ونىڭ «ۇلكەن دۋلىعا» تۋرنيرلەرىندەگى جەڭىسى 20-عا جەتىپ وتىر. جانە فەدەرەردىڭ باسقا دا ءىرى حالىقارالىق جارىستاردا ولجالاعان جۇلدەلەرى تاعى بار.
بۇگىنگى تاڭدا ايتۋلى قوس تەننيسشى الەمدىك رەيتينگتىڭ كوش باسىندا كەلەدى. 8770 ۇپايى بار رافاەل نادال ءبىرىنشى ورىندا تۇرسا, 8670 ۇپايدى ەنشىلەگەن رودجەر فەدەرەر ەكىنشى ساتىعا جايعاستى.
عالىم سۇلەيمەن,
«ەگەمەن قازاقستان»
