"قازاقستان رەسپۋبليكاسى امەريكا قۇراما شتاتتارىنىڭ پرەزيدەنتى د. ترامپ جانە كورەي حالىق دەموكراتيالىق رەسپۋبليكاسى مەملەكەتتىك كەڭەسىنىڭ توراعاسى كيم چەن ىننىڭ 2018 جىلعى 12 ماۋسىمدا سينگاپۋر قالاسىندا وتكەن كەزدەسۋىن قولدايدى جانە مەملەكەتتەردىڭ ەكىجاقتى قاتىناستاردى رەتتەۋ بويىنشا كۇشتەرىن جوعارى باعالايدى.
اتالعان ءسامميتتى ۆاشينگتون مەن پحەنيان اراسىنداعى سەنىمدى نىعايتۋعا, سونداي-اق كحدر مەن حالىقارالىق قوعامداستىق اراسىنداعى قاتىناستاردى قالىپقا كەلتىرۋگە مۇمكىندىك بەرەتىن ماڭىزدى تاريحي وقيعا رەتىندە قاراستىرامىز.
بۇۇ قاۋىپسىزدىك كەڭەسىنىڭ تۇراقتى ەمەس مۇشەسى جانە يادرولىق قارۋدان ازات الەمدى قۇرۋدى قولدايتىن مەملەكەت رەتىندە قازاقستان مۇددەلى مەملەكەتتەردىڭ كەلىسسوز پروتسەسىن جالعاستىرۋ جونىندەگى كۇشتەرىن قولدايدى جانە ايماقتاعى بەيبىتشىلىك پەن تۇراقتىلىقتى قامتاماسىز ەتۋ ماقساتىندا سولتۇستىك كورەيانىڭ يادرولىق قارۋسىزدانۋى بويىنشا ناقتى ءوزارا ءتيىمدى جانە قولايلى جاعدايلاردى جاساۋعا ۇمىتتەنەدى.
بۇل تۇرعىدا استانا پحەنياننىڭ يادرولىق قارۋدى جويۋعا دەگەن ۇمتىلىسىن جوعارى باعالايدى جانە الەمدەگى ءتورتىنشى يادرولىق الەۋەتتەن ءوز ەركىمەن باس تارتىپ, ەڭ ءىرى يادرولىق سىناق ورىندارىنىڭ ءبىرىن جاپقان سونداي-اق ياقتش جانە ياسجتش اياسىندا بەلسەندى جۇمىسى ارقىلى جاھاندىق يادرولىق قارۋدى تاراتپاۋ رەجيمىن نىعايتۋعا ەلەۋلى ۇلەس قوسقان قازاقستاننىڭ جولىن تاڭداۋعا شاقىرادى.
قازاقستان سولتۇستىك كورەيا داعدارىسى تەك بەيبىت تۇردە رەتتەلۋ سيپاتىنا يە ەكەندىگىنە سەنىم ءبىلدىرىپ, بارلىق مۇددەلى تاراپتاردى كورەي تۇبەگىن يادرولىق قارۋسىزداندىرۋ جونىندەگى كەلىسسوزدەر پروتسەسىن قولداۋعا شاقىرادى", دەلىنگەن ءباسپاسوز حابارلاماسىندا.
