سەمەي ءوڭىرى تۋماسىنىڭ ەسىمى ەل سپورتى تاريحىنداعى التىن ارىپتەرمەن جازۋلى. سەۆاستوپولدە اسكەر قاتارىندا جۇرگەندە قىسقا قاشىقتىقتا جۇگىرۋدە كەرەمەت ناتيجە كورسەتكەن قوسانوۆ سول كەزدە-اق قىراعى ماماندار نازارىنا ىلىكتى. قارۋلى كۇشتەر جانە ۋكراينا مەن مولداۆيا بىرىنشىلىكتەرىندە جەڭىس تۇعىرىنا كوتەرىلگەن قازاقتىڭ ۇلى كوپ ۇزاماي حالىقارالىق دودالاردا دارالانا باستادى. ال ءوزىنىڭ ەڭ زور تابىسىنا ول 1960 جىلى ريم وليمپياداسىندا قول جەتكىزدى. قۇرامىندا عۇسمان قوسانوۆ, لەونيد بارتەنەۆ, يۋري كونوۆالوۆ جانە ەدۆين وزولين سىندى سايىپقىراندارى بار كسرو كومانداسى جەڭىل اتلەتتەردىڭ 100 مەترلىك ەستافەتا سايىسىندا كۇمىس مەدالدى يەلەندى. وسىلايشا, قوسانوۆتىڭ ەسىمى ءتورت جىلدىقتىڭ باستى دوداسىندا جۇلدە العان قازاقستاننىڭ تۇڭعىش سپورتشىسى رەتىندە تاريحتا قالدى.
قانداسىمىز 1964 جىلى توكيودا الاۋى تۇتانعان وليمپيا ويىندارىنا قاتىستى. الايدا جاپونيادا ءبىزدىڭ جىگىتتەردىڭ جولى بولمادى. 1965 جىلى كيەۆتە وتكەن كسرو مەن اقش قۇرمالارىنىڭ جولداستىق كەزدەسۋىندە كەڭەس وداعىنىڭ جەلاياقتارى ەستافەتالىق سايىستا امەريكالىقتاردى ارتقا تاستادى. سول كوماندانىڭ ساپىندا ءبىزدىڭ جەلاياق تا ونەر كورسەتكەن ەدى. ال 100 مەترگە جۇگىرۋدە قازاق سپورتشىسىنىڭ جەكە رەكوردى – 10 مينۋت 02 سەكۋند.
الاشتىڭ ابزال ازاماتى عۇسمان قوسانوۆتى ەسكە تۇسىرۋگە ارنالعان اتالعان تۋرنير الماتىدا 1991 جىلدان بەرى ۇزدىكسىز ۇيىمداستىرىلىپ كەلەدى. حالىقارالىق جەڭىل اتلەتيكا قاۋىمداستىعىنىڭ كۇنتىزبەسىنە ەنگەن بۇل جارىستىڭ جالاۋى بيىل 28-ءشى مارتە جەلبىرەيدى.
عالىم سۇلەيمەن,
«ەگەمەن قازاقستان»
الماتى
